ಯಲಹಂಕ: ಜಮೀನು ಖರೀದಿದಾರರೊಬ್ಬರಿಗೆ ಪೊಲೀಸ್ ರಕ್ಷಣೆ ನೀಡಲು ಲಂಚ ಪಡೆದಿದ್ದ ಪ್ರಕರಣದಲ್ಲಿ ಭ್ರಷ್ಟಾಚಾರ ನಿಗ್ರಹ ದಳ (ಎಸಿಬಿ) ಅಧಿಕಾರಿಗಳು ಕಂದಾಯ ನಿರೀಕ್ಷಕ, ಚಿಕ್ಕಜಾಲ ಪೊಲೀಸ್ ಠಾಣೆಯ ಕಾನ್ಸ್ಟೇಬಲ್ವೊಬ್ಬರನ್ನು ಬಂಧಿಸಿದ್ದು, ಇನ್ಸ್ಪೆಕ್ಟರ್ ಪರಾರಿಯಾಗಿದ್ದಾರೆ.
ಆರ್ಐ ಪುಟ್ಟ ಹನುಮಯ್ಯ, ಕಾನ್ಸ್ಟೇಬಲ್ ರಾಜು ಬಂಧಿತರು. ಯಶವಂತ್ ಮೂರು ದಿನಗಳಿಂದ ನಾಪತ್ತೆಯಾದ ಇನ್ಸ್ಪೆಕ್ಟರ್. ಬೆಂಗಳೂರು ಉತ್ತರ ತಾಲೂಕಿನ ಜಾಲ ಹೋಬಳಿಯಲ್ಲಿ ವ್ಯಕ್ತಿಯೊಬ್ಬರು 2018ರಲ್ಲಿ 5 ಎಕರೆ ಜಮೀನು ಖರೀದಿಸಿದ್ದರು. ಆದರೆ, ಅದೇ ಜಮೀನನ್ನು ಮೂಲ ಮಾಲೀಕರು ಬೇರೆಯವರಿಗೆ ಮಾರಲು ಮುಂದಾಗಿದ್ದರು. ಈ ಕುರಿತು ಜಮೀನು ಖರೀದಿದಾರರು ಕೋರ್ಟ್ ಮೊರೆ ಹೋಗಿ ತಡೆಯಾಜ್ಞೆ ತಂದಿದ್ದರು.
ಇದನ್ನೂ ಓದಿ: ಪರಿಷತ್ ಗಲಾಟೆ ವಿಚಾರದಲ್ಲಿ ನಾವು ಯಾವುದೇ ತಂತ್ರಗಾರಿಕೆ ಮಾಡಿಲ್ಲ : ಸಚಿವ ಮಾಧುಸ್ವಾಮಿ
ಕೋರ್ಟ್ ತಡೆಯಾಜ್ಞೆ ನೀಡಿರುವ ಕುರಿತು ಜಮೀನಿನಲ್ಲಿ ಫಲಕ ಅಳವಡಿಸಬೇಕು. ಮೂಲ ಜಮೀನು ಮಾಲೀಕರಿಂದ ತನಗೆ ರಕ್ಷಣೆ ನೀಡಬೇಕು ಎಂದು ಇನ್ಸ್ಪೆಕ್ಟರ್ ಯಶವಂತ್ಗೆ ಕೋರಿದಾಗ ಲಂಚಕ್ಕೆ ಬೇಡಿಕೆಯಿಟ್ಟಿದ್ದರು. ಪುಟ್ಟ ಹನುಮಯ್ಯ ಕೂಡ ಮ್ಯುಟೇಷನ್‌ ಬದಲಾಯಿಸಿ ಕೊಡುವುದಕ್ಕೆ ಮತ್ತು ಜಮೀನಿನಲ್ಲಿ ಕೋರ್ಟ್ ತಡೆಯಾಜ್ಞೆ ಫಲಕ ಹಾಕುವುದಕ್ಕೆ ₹50 ಲಕ್ಷ ಲಂಚ ನೀಡುವಂತೆ ಹೇಳಿದ್ದರು.
ಈ ಕುರಿತು ಜಮೀನು ಖರೀದಿದಾರರು ಎಸಿಬಿ ಮೊರೆ ಹೋಗಿದ್ದರು. ಶುಕ್ರವಾರ (ಜನವರಿ 8ರಂದು) ಹನುಮಯ್ಯಗೆ ಮೊದಲ ಕಂತಿನ ₹6 ಲಕ್ಷ ಹಣ ನೀಡುವಾಗ ಮತ್ತು ಇನ್ಸ್ಪೆಕ್ಟರ್ ಪರವಾಗಿ ₹5 ಲಕ್ಷ ಪಡೆಯುತ್ತಿದ್ದ ರಾಜುಗೆ ಸಿಸಿಬಿ ಅಧಿಕಾರಿಗಳು ಶಾಕ್ ನೀಡಿದ್ದಾರೆ. ಈ ಇಬ್ಬರ ಬಂಧನದ ನಂತರ ಕಾಲ್ಕಿತ್ತಿರುವ ಯಶವಂತ್ ಮೂರು ದಿನಗಳಾದರೂ ಠಾಣೆಯತ್ತ ಮುಖಮಾಡಿಲ್ಲ. ಹಿರಿಯ ಅಧಿಕಾರಿಗಳ ಗಮನಕ್ಕೂ ತಾರದೆ ನಾಲ್ಕು ದಿನಗಳಿಂದ ಕೆಲಸಕ್ಕೆ ಗೈರಾಗಿದ್ದಾರೆ.
