ಬೆಂಗಳೂರು: ರೂಪಾಂತರಗೊಂಡ ಮಹಾಮಾರಿ ಕೋವಿಡ್ ಆರ್ಭಟ ನಿಲ್ಲಿಸಲು ರಾಜ್ಯದಲ್ಲಿ ಲಾಕ್ಡೌನ್ ಜಾರಿ ಮಾಡಲಾಯ್ತು. ಈ ಸಂದರ್ಭದಲ್ಲಿ ರೈಲು ಸೇವೆ ಇದ್ದರೂ, ಮೊದಲಿನಷ್ಟು ರೈಲುಗಳ ಸಂಚಾರವಿಲ್ಲ. ಇನ್ನು ಇರುವ ರೈಲುಗಳಲ್ಲಿ ಪ್ರಯಾಣಿಸುವ ಪ್ರಯಾಣಿಕರ ಸಂಖ್ಯೆ ಕೇವಲ ಬೆರಳೆಣಿಕೆಯಷ್ಟು ಮಾತ್ರ. ಕಡಿಮೆ ಪ್ರಯಾಣಿಕರಿಂದ ರೈಲ್ವೆ ನಿಲ್ದಾಣಗಳ ಕ್ಯಾಂಟೀನ್ಗಳು ವ್ಯಾಪಾರವಿಲ್ಲದೇ ಸಂಕಷ್ಟಕ್ಕೆ ಸಿಲುಕಿವೆ. ಪ್ರಯಾಣಿಸುವ ಕೆಲವೇ ಕೆಲವು ಪ್ರಯಾಣಿಕರು ಕೂಡ ಕ್ಯಾಂಟೀನ್ಗಳತ್ತ ಮುಖಮಾಡದೇ ಕ್ಯಾಂಟೀನ್ ಮಾಲೀಕರು ನಷ್ಟ ಅನುಭವಿಸುತ್ತಿದ್ದಾರೆ.
ಪ್ರತಿನಿತ್ಯ ಲಕ್ಷಾಂತರ ಪ್ರಯಾಣಿಕರಿಂದ ಮೆಜೆಸ್ಟಿಕ್ ರೈಲ್ವೆ ನಿಲ್ದಾಣ ತುಂಬಿ ತುಳುಕುತ್ತಿತ್ತು. ಇಲ್ಲಿರುವ ಕ್ಯಾಂಟೀನ್ಗಳ ಎದುರು ಪ್ರಯಾಣಿಕರು ಮುಗಿ ಬೀಳುತ್ತಿದ್ದರು. ಇರುವ ಕಡಿಮೆ ಕಾಲಾವಕಾಶದಲ್ಲಿ ತಮಗೆ ಬೇಕಾದ ತಿಂಡಿ ತಿನಿಸು, ಪಾನೀಯಗಳನ್ನು ಖರೀದಿಸುತ್ತಿದ್ದರು. ಇದ್ರಿಂದ ಕ್ಯಾಂಟೀನ್ಗಳಲ್ಲಿ ಉತ್ತಮ ವ್ಯಾಪಾರವಾಗಿ, ಉತ್ತಮ ಆದಾಯ ಬರುತ್ತಿತ್ತು. ಆದ್ರೀಗ ಕೆಲವೇ ಕೆಲವು ರೈಲುಗಳು ಸಂಚರಿಸುತ್ತಿವೆ. ಪ್ರತೀ ರೈಲಿನಲ್ಲಿ 25 ರಿಂದ 50 ಜನರು ಬರುತ್ತಿದ್ದಾರೆ. ಇದರಿಂದ ಇಲ್ಲಿನ ಕ್ಯಾಂಟೀನ್ಗಳು ವ್ಯಾಪಾರವಿಲ್ಲದೇ ನಷ್ಟಕ್ಕೆ ಸಿಲುಕಿವೆ.
ಇದನ್ನೂ ಓದಿ: ಪ್ರಯಾಣಿಕರ ಸಂಖ್ಯೆ ಇಳಿಮುಖ: ತುಮಕೂರು ರೈಲ್ವೆ ನಿಲ್ದಾಣದ ಕ್ಯಾಂಟೀನ್ಗಳಲ್ಲಿ ವ್ಯಾಪಾರ ಕುಂಠಿತ!
"ಕಳೆದ 2 ವರ್ಷದಿಂದ ಕ್ಯಾಂಟೀನ್ ನಡೆಸುತ್ತಿದ್ದೇವೆ. ಲಾಕ್ಡೌನ್ ಹಾಗೂ ಕೋವಿಡ್ ಭೀತಿಯಿಂದ ಪ್ರಯಾಣಿಕರ ಸಂಖ್ಯೆ ಇಳಿಕೆ ಆಗಿವೆ. ಇದಲ್ಲದೇ ಈಗ ಪ್ರಯಾಣಿಕರಿಗೆ ಕೆಲ ಸೇವಾ ಸಂಸ್ಥೆಗಳು ಉಚಿತ ಊಟ ನೀಡುತ್ತಿವೆ. ಈ ಎಲ್ಲ ಕಾರಣಗಳಿಂದ ವ್ಯಾಪಾರ ಶೇ. 10ಕ್ಕೆ ಕುಸಿದಿದ್ದು ಕೆಲವು ಕ್ಯಾಂಟೀನ್ಗಳು ಬಾಗಿಲು ಮುಚ್ಚಿವೆ. ವ್ಯಾಪಾರ ಕಡಿಮೆ ಆದರೂ ಬಾಡಿಗೆ, ವಿದ್ಯುತ್ ಶುಲ್ಕ ಹಾಗೂ ಸಂಬಳ ಕೊಡಲೇಬೇಕು."
- ಕ್ಯಾಂಟೀನ್ ಮಾಲೀಕ ಸುರೇಶ್
