ಬೆಂಗಳೂರು: ಲೋಕಸಭಾ ಚುನಾವಣೆ-2019ರ ಮೊದಲನೇ ಹಂತದ ಮತದಾನವು ಕರ್ನಾಟಕ ರಾಜ್ಯ ವ್ಯಾಪ್ತಿಯ ಹಲವಾರು ಜಿಲ್ಲೆಗಳಲ್ಲಿ ನಾಳೆ ನಡೆಯಲಿದೆ. ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮವು ಚುನಾವಣೆ ಕಾರ್ಯಕ್ಕೆ ಮತ್ತು ಪೊಲೀಸ್ ಇಲಾಖೆಗೆ ಹೆಚ್ಚಿನ ಸಂಖ್ಯೆಯಲ್ಲಿ ಬಸ್ಸುಗಳನ್ನು ಒದಗಿಸುತ್ತಿದೆ. ಆದರಿಂದ ಇಂದಿನಿಂದ 18ರವರೆಗೆ ನಿಗಮದ ವಾಹನಗಳು ಬಳಕೆಯಾಗಲಿದ್ದು, ಸಂಚಾರದಲ್ಲಿ ವ್ಯತ್ಯಯ ಉಂಟಾಗುತ್ತದೆ. ಪ್ರಯಾಣಿಕರು ಸಹಕರಿಸುವಂತೆ ನಿಗಮ ಮನವಿ ಮಾಡಿದೆ.
ಕೆಎಸ್ಆರ್ಟಿಸಿ ಹಾಗೂ ಬಿಎಂಟಿಸಿ ನಿಗಮ ಚುನಾವಣೆ ಕಾರ್ಯಕ್ಕೆ ಮತ್ತು ಪೊಲೀಸ್ ಇಲಾಖೆಗೆ ಹೆಚ್ಚಿನ ಸಂಖ್ಯೆಯ ಬಸ್ಗಳನ್ನು ಒದಗಿಸಿದೆ. ಆದ್ದರಿಂದ ಕೆಎಸ್ಆರ್ಟಿಸಿ, ಬಿಎಂಟಿಸಿ ಬಸ್ ಕಾರ್ಯಾಚರಣೆಯಲ್ಲಿ ಹೆಚ್ಚಿನ ರೀತಿಯಲ್ಲಿ ವ್ಯತ್ಯಯ ಉಂಟಾಗಲಿದೆ. ಊರಿಗೆ ತೆರಳುವ ಮತದಾರರಿಗೆ ಬಸ್ ವ್ಯವಸ್ಥೆ ಕಡಿಮೆ ಇರುತ್ತದೆ. ಚುನಾವಣೆಗೆ ಶೇ. 70ರಷ್ಟು ಬಸ್‍ಗೆ ಚುನಾವಣಾ ಆಯೋಗದಿಂದ ಬೇಡಿಕೆ ಬಂದಿತ್ತು. ಆದರೆ ಜನರಿಗೆ ಹೆಚ್ಚಾಗಿ ಸಮಸ್ಯೆ ಆಗುತ್ತೆ ಅನ್ನೋ ಕಾರಣಕ್ಕೆ ಶೇ. 50ರಷ್ಟು ಬಸ್ ನೀಡಲು ಸಾರಿಗೆ ನಿಗಮಗಳು ಸಮ್ಮತಿಸಿವೆ. ರಜೆ ದಿನ ಮತದಾನ ನಡೆಯುವ ಕಾರಣ ನಾನಾ ಊರುಗಳಿಗೆ ತೆರಳುವವರು ಸಾಕಷ್ಟು ಮಂದಿ ಇರುತ್ತಾರೆ. ಅದಾಗಲೇ ಮುಂಗಡ ಪಾವತಿ ಫುಲ್‍ ಆಗಿದ್ದು, ಹೆಚ್ಚುವರಿ ಬಸ್‍ಗಳ ಅಗತ್ಯ ಎದುರಾಗಲಿದೆ. ಎರಡು ದಿನ ಬಸ್ ಸಂಚಾರದಲ್ಲಿ ವ್ಯತ್ಯಯ ಕಂಡುಬರಲಿದ್ದು, ಜನರು ಸಹಕರಿಸಬೇಕು ಎಂದು ಕೆಎಸ್ಆರ್ ಟಿಸಿಯ ವಿಭಾಗೀಯ ನಿಯಂತ್ರಣಾಧಿಕಾರಿ ಇನಾಯತ್ ಬಾಗಬಾತ್ ತಿಳಿಸಿದರು.
ಕೆಎಸ್ಆರ್ಟಿಸಿ ಸದ್ಯ 8 ಸಾವಿರ ಬಸ್ಗಳನ್ನು ಹೊಂದಿದೆ. ಇದರಲ್ಲಿ 3 ಸಾವಿರಕ್ಕೂ ಹೆಚ್ಚು ಬಸ್ಗಳನ್ನು ಚುನಾವಣಾ ಸೇವೆಗೆ ನೀಡಲಾಗಿದೆ. ಬಿಎಂಟಿಸಿಯು 6,500 ಬಸ್ಗಳನ್ನು ಹೊಂದಿದ್ದು, 2000 ಬಸ್ಗಳನ್ನ ನಿಯೋಜನೆ ಮಾಡಲಾಗಿದೆ. ಇದರಿಂದ ಬಸ್ ಸಂಚಾರದಲ್ಲಿ ವ್ಯತ್ಯಯವಾಗಲಿದೆ. ಏಪ್ರಿಲ್ 18 ರಂದು ಮತದಾನ ನಡೆಯುವುದರಿಂದ 17 ರ ಸಂಜೆಯೊಳಗೆ ಚುನಾವಣಾ ಸಿಬ್ಬಂದಿ ಹಾಗೂ ಪೊಲೀಸರು ನಿಗದಿತ ಮತಗಟ್ಟೆಗಳಿಗೆ ತೆರಳುತ್ತಾರೆ. ಅವರೆಲ್ಲರ ಸಂಚಾರಕ್ಕೆ ಬಸ್ಗಳನ್ನು ನೀಡಲಾಗಿದೆ. ಇದರಿಂದ ರಾಜ್ಯದ ವಿವಿಧೆಡೆ ತೆರಳುವ ಪ್ರಯಾಣಿಕರಿಗೆ ಕೊಂಚ ಅಡಚಣೆಯಾಗಲಿದೆ.
ಇತ್ತ ಇದನ್ನ ಬಂಡವಾಳ ಮಾಡಿಕೊಂಡ ಖಾಸಗಿ ಬಸ್ ಮಾಲೀಕರು ಆರ್ಟಿಒ ಆದೇಶವನ್ನ ಧಿಕ್ಕರಿಸಿ ಬಸ್ ದರ ಏರಿಕೆ ಮಾಡಿವೆ. ಈ ಸಂಬಂಧ ಲೈಸನ್ಸ್ ಕೂಡ ರದ್ದು ಮಾಡಲಾಗಿದೆ.
ಅದನೇ ಇರಲಿ, ತಮ್ಮ ತಮ್ಮ ಊರಿಗೆ ತೆರಳಿ ಮತ ಚಲಾಯಿಸೋ ಮತದಾರರಿಗೆ ಖಾಸಗಿ ಬಸ್ ಮಾಲೀಕರು ಪ್ರಯಾಣ ದರ ಏರಿಸಿದ ಬಿಸಿ ಒಂದೆಡೆ ಆದರೆ, ಸರ್ಕಾರಿ ಬಸ್ ಸರಿಯಾಗಿ ಸಿಗದೇ ಮತ್ತೊಂದು ತರಹದ ಬಿಸಿ ಮುಟ್ಟಲಿದೆ. ಈ ಮೂಲಕ ಸರಿಯಾದ ಸಮಯಕ್ಕೆ ಊರಿಗೆ ಹೋಗಿ ತಮ್ಮ ಮತವನ್ನ ಚಲಾಯಿಸೋಕೆ ಆಗುತ್ತೋ ಇಲ್ಲವೋ ಎಂಬ ಅನುಮಾನ ಸಾರ್ವಜನಿಕರಲ್ಲಿ ಹುಟ್ಟುಹಾಕುವಂತೆ ಮಾಡಿದೆ.
