ಬೆಂಗಳೂರು : ರಾಜ್ಯ ಸೇರಿದಂತೆ ದೇಶಾದ್ಯಂತ ಕೊರೊನಾ ಸೋಂಕು ಕಡಿಮೆ ಆಗುವ ಲಕ್ಷಣ ಕಾಣ್ತಿಲ್ಲ. ಈ ನಡುವೆ ಕೋವಿಡ್ ನಿಯಂತ್ರಣಕ್ಕೆ ಲಾಕ್ಡೌನ್ ಅಸ್ತ್ರ ಪ್ರಯೋಗ ಮಾಡಿದರೂ ಯಾವುದೇ ಪ್ರಯೋಜನ ಆದಂತೆ ಕಾಣಿಸುತ್ತಿಲ್ಲ.
ಇದಕ್ಕೆ ಸಾಕ್ಷಿ ಎಂಬಂತೆ ದೇಶದ 52 ಜಿಲ್ಲೆಗಳು ಡೇಂಜರ್ ಝೋನ್ನಲ್ಲಿವೆ. 52 ಜಿಲ್ಲೆಗಳಲ್ಲಿ ಶೇ.100ಕ್ಕಿಂತ ಹೆಚ್ಚಿನ ಕೇಸ್ ನಿರಂತರ ಉಲ್ಬಣವಾಗ್ತಿವೆ.
ಏಪ್ರಿಲ್ 14ರಿಂದ ಈವರೆಗೂ ಈ 52 ಜಿಲ್ಲೆಗಳಲ್ಲಿ ಕೇಸ್ಗಳು ಏರಿಕೆಯಾಗುತ್ತಿವೆ. ಸೋಂಕು ಉಲ್ಬಣದಲ್ಲಿ ದೇಶದ ಮಹಾನಗರಗಳನ್ನೇ ಹಿಂದಿಕ್ಕಿ ರಾಜ್ಯದ 6 ಜಿಲ್ಲೆಗಳು ಮುನ್ನುಗ್ತಿವೆ. ಆದರಲ್ಲೂ ದೇಶದ ಎಲ್ಲಾ ಜಿಲ್ಲೆಗಳ ಪೈಕಿ ಪಾಸಿಟಿವ್ ಕೇಸ್ಗಳ ಪಟ್ಟಿಯ 3ನೇ ಸ್ಥಾನದಲ್ಲಿ ರಾಜ್ಯದ ಕೊಡಗು ಜಿಲ್ಲೆ ಇದೆ.
ಮೊದಲ ಸ್ಥಾನದಲ್ಲಿ ಗುಜರಾತ್ನ ತಾಪಿ ಜಿಲ್ಲೆ ಇದ್ದರೆ, 2ನೇ ಸ್ಥಾನದಲ್ಲಿ ಪಂಜಾಬ್ನ ಮಾನ್ಸಾ ಜಿಲ್ಲೆ ಇದೆ. ಪಾಸಿಟಿವ್ ಪ್ರಕರಣಗಳ ನಿರಂತರ ಬೆಳವಣಿಗೆ ದರದಲ್ಲಿ ಗುಜರಾತ್ 198%, ಪಂಜಾಬ್ನ ಮಾನ್ಸಾ 192% ಹಾಗೂ ಕರ್ನಾಟಕದ ಕೊಡಗು 184% ಕೇಸ್ ವೃದ್ದಿ ದರ ಹೊಂದಿವೆ. ಒಂದು ತಿಂಗಳ ಅವಧಿಯಲ್ಲಿ ಶೇ.100ಕ್ಕೂ ಹೆಚ್ಚು ಪ್ರಮಾಣದಲ್ಲಿ ಕೊರೊನಾ ಕೇಸ್ ಉಲ್ಬಣಗೊಂಡಿವೆ.
ಕರ್ನಾಟಕ 6 ಜಿಲ್ಲೆಗಳು ಯಾವುದು?
| ಜಿಲ್ಲೆ | ಏ. 14 | ಮೇ 5 | ಮೇ 12 | 28 ದಿನ (%) |
| ಕೊಡಗು | 613 | 14,034 | 18,798 | 184 |
| ತುಮಕೂರು | 29,516 | 55,671 | 72,573 | 146% |
| ಕೋಲಾರ | 11,445 | 21,644 | 27,038 | 136% |
| ಮಂಡ್ಯ | 21,268 | 37,037 | 46,347 | 118% |
| ರಾಮನಗರ | 7,913 | 13,134 | 15,971 | 102% |
| ಚಾ.ನಗರ | 7,552 | 13,742 | 18,326 | 143% |
ಭಾರತದ ಎಲ್ಲಾ ಜಿಲ್ಲೆಗಳ ನಡುವೆ ಕಳೆದ ಒಂದು ತಿಂಗಳ ಅವಧಿಯ ಅಂಕಿ-ಅಂಶ ಇದಾಗಿದೆ. ಶೇ.100ರಷ್ಟು ಹೆಚ್ಚು ಪ್ರಮಾಣದಲ್ಲಿ ಕೊರೊನಾ ಪ್ರಕರಣಗಳ ಏರಿಕೆಯನ್ನು ಕಂಡಿರುವ ಕರ್ನಾಟಕದ 6 ಜಿಲ್ಲೆಗಳು ಇರುವುದು ಆತಂಕಕಾರಿ ವಿಷಯವಾಗಿದೆ.
2 ಲಕ್ಷದ ಸನಿಹದಲ್ಲಿದ್ದ ಟೆಸ್ಟಿಂಗ್ ಇದೀಗ 90 ಸಾವಿರಕ್ಕೆ ಇಳಿಕೆ
ಇತ್ತ ಕೊರೊನಾ ಕಂಟ್ರೋಲ್ಗೆ ಬರ್ತಿದೆ ಅನ್ನುತ್ತಿರುವ ಸಚಿವರು, ಕೊರೊನಾ ಟೆಸ್ಟಿಂಗ್ ಪ್ರಮಾಣವನ್ನ ಕಡಿಮೆ ಮಾಡಿದ್ದಾರೆ. ನಿತ್ಯ 2 ಲಕ್ಷ ಸನಿಹದಷ್ಟು ಮಂದಿಗೆ ಕೋವಿಡ್ ಟೆಸ್ಟ್ ಮಾಡುತ್ತಿದ್ದರು, ಇದೀಗ 90 ಸಾವಿರಕ್ಕೆ ಇಳಿದಿದೆ.
ಕೋವಿಡ್ ಟೆಸ್ಟ್ ಅಂಕಿ-ಅಂಶ
| ದಿನಾಂಕ | ಟೆಸ್ಟ್ ಸಂಖ್ಯೆ | ಸೋಂಕು ದೃಢ |
| ಮೇ 14 | 1,27,105 | 41,779 |
| ಮೇ 15 | 1,18,345 | 41,664 |
| ಮೇ 16 | 1,13,219 | 31,531 |
| ಮೇ 17 | 97,236 | 38,603 |
| ಮೇ 18 | 93,247 | 30,309 |
