ಬೆಂಗಳೂರು ಕೇಂದ್ರ ವಿವಿಯ 2ನೇ ಸೆಮಿಸ್ಟರ್ ಪರೀಕ್ಷೆ ರದ್ದಾದ್ರೂ ಕಟ್ಟಬೇಕು ಪರೀಕ್ಷಾ ಶುಲ್ಕ

ಕೋವಿಡ್-19 ವ್ಯಾಪಕತೆಯಿಂದಾಗಿ ಮುಂದೂಡಲ್ಪಟ್ಟಿದ್ದ 2019-20ನೇ ಸಾಲಿನ ನಾಲ್ಕನೇ ಸೆಮಿಸ್ಟರ್‌ನ ಸ್ನಾತಕೋತ್ತರ ಪರೀಕ್ಷೆಗಳು ಸೆಪ್ಟೆಂಬರ್ 1 ರಿಂದ 14 ರವರೆಗೆ ನಡೆಯಲಿವೆ.

ಬೆಂಗಳೂರು: ಜುಲೈ 10 ರಂದು ಸರ್ಕಾರ ಹೊರಡಿಸಿದ ಆದೇಶದಂತೆ ಬೆಂಗಳೂರು ಕೇಂದ್ರ ವಿಶ್ವವಿದ್ಯಾಲಯದ ಎರಡನೇ ಸೆಮಿಸ್ಟರ್ ವಿದ್ಯಾರ್ಥಿಗಳಿಗೆ ಪರೀಕ್ಷೆಗಳನ್ನು ನಡೆಸಲಾಗುವುದಿಲ್ಲ. ಪರೀಕ್ಷೆ ಬದಲಾಗಿ ಆಂತರಿಕ ಅಂಕಗಳು ಮತ್ತು‌ ಹಿಂದಿನ ಸೆಮಿಸ್ಟರ್ ಅಂಕಗಳ ಸರಾಸರಿಯ ಆಧಾರದಲ್ಲಿ ಫಲಿತಾಂಶ ಪ್ರಕಟಿಸಲಾಗುವುದು ಎಂದು ಬೆಂಗಳೂರು ಕೇಂದ್ರ ವಿವಿ ತಿಳಿಸಿದೆ.

ಬೆಂಗಳೂರು ವಿವಿ 2ನೇ ಸೆಮಿಸ್ಟರ್ ಪರೀಕ್ಷೆ ರದ್ದು

ಪರೀಕ್ಷೆ ರದ್ದಾಗಿದ್ದರೂ ಸಹ ಪರೀಕ್ಷೆ ಶುಲ್ಕ ಕಟ್ಟುವಂತೆ ವಿವಿ ಆಡಳಿತ ವಿದ್ಯಾರ್ಥಿಗಳಿಗೆ ಸೂಚಿಸಿದೆ. ಎರಡನೇ ಸೆಮಿಸ್ಟರ್ ವಿದ್ಯಾರ್ಥಿಗಳು ಪರೀಕ್ಷಾ ಶುಲ್ಕ ಪಾವತಿಸುವುದು ಮತ್ತು ಪರೀಕ್ಷಾ ಅರ್ಜಿಗಳನ್ನು ಸಲ್ಲಿಸುವುದು ಕಡ್ಡಾಯವಾಗಿದ್ದು ಆ.15 ರಂದು ಕೊನೆಯ ದಿನಾಂಕ ಎಂದು ಆದೇಶಿಸಿದೆ. ಹೀಗಾಗಿ, ಪರೀಕ್ಷೆ ರದ್ದಾದ ಮೇಲೆ ಶುಲ್ಕವೇಕೆ‌ ಎನ್ನುವ ಪ್ರಶ್ನೆ ಉದ್ಭವಿಸಿದೆ.

4ನೇ ಸೆಮಿಸ್ಟರ್ ಪಿಜಿ ವಿದ್ಯಾರ್ಥಿಗಳಿಗೆ ಸೆ.1 ರಿಂದ 14 ರವರೆಗೆ ಪರೀಕ್ಷೆ:

ಕೋವಿಡ್-19 ವ್ಯಾಪಕತೆಯಿಂದಾಗಿ ಮುಂದೂಡಲ್ಪಟ್ಟಿದ್ದ 2019-20ನೇ ಸಾಲಿನ ನಾಲ್ಕನೇ ಸೆಮಿಸ್ಟರ್‌ನ ಸ್ನಾತಕೋತ್ತರ ಪರೀಕ್ಷೆಗಳು ಸೆಪ್ಟೆಂಬರ್ 1 ರಿಂದ 14 ರವರೆಗೆ ನಡೆಯಲಿವೆ. ನಾಲ್ಕನೇ ಸೆಮಿಸ್ಟರ್ ವ್ಯಾಸಂಗ ಮಾಡುತ್ತಿದ್ದು, ಎರಡನೇ ಸೆಮಿಸ್ಟರ್‌ನಲ್ಲಿ‌ ಬಾಕಿ‌ ಉಳಿಸಿಕೊಂಡಿರುವ ವಿದ್ಯಾರ್ಥಿಗಳಿಗೆ ಸೆಪ್ಟೆಂಬರ್ 22 ರಿಂದ 30 ರವರೆಗೆ ಮರು ಪರೀಕ್ಷೆ ನಿಗದಿಗೊಳಿಸಲಾಗಿದೆ. ಪ್ರಾಯೋಗಿಕ ಪರೀಕ್ಷೆ, ಪ್ರಾಜೆಕ್ಟ್ ವರ್ಕ್, ಮೌಖಿಕ ಪರೀಕ್ಷೆ ಸೆಪ್ಟೆಂಬರ್ 15-21ರೊಳಗೆ ನಡೆಸಲು ಸೂಚಿಸಲಾಗಿದೆ.