ಟೋಕಿಯೋ: 2016ರ ರಿಯೋ ಪ್ಯಾರಾಲಿಂಪಿಕ್ಸ್ನಲ್ಲಿ ಚಿನ್ನ ಗೆದ್ದಿದ್ದ ಭಾರತದ ಹೈಜಂಪರ್ ಮರಿಯಪ್ಪನ್ ತಂಗವೇಲು ಈ ಬಾರಿ ಬೆಳ್ಳಿಗೆ ತೃಪ್ತಿಪಟ್ಟಿದ್ದಾರೆ. ಆದರೆ, ತಾವೂ ಚಿನ್ನ ಗೆಲ್ಲಲು ಸಾಧ್ಯವಾಗದ್ದಕ್ಕೆ ಫೈನಲ್ಸ್ ವೇಳೆ ಸುರಿದ ಮಳೆ ಕಾರಣ ಎಂದು ತಿಳಿಸಿದ್ದಾರೆ.
ಮಂಗಳವಾರ ನಡೆದ ಫೈನಲ್ಸ್ನಲ್ಲಿ ತಂಗವೇಲು 1.86 ಮೀಟರ್ ಎತ್ತರವನ್ನು ಯಶಸ್ವಿಯಾಗಿ ಜಿಗಿದರು. ಆದರೆ 1.88 ಮೀಟರ್ ಎತ್ತರವನ್ನು ಜಿಗಿಯುವಲ್ಲಿ ವಿಫಲರಾದರು. ಅಮೆರಿಕಾದ ಸ್ಯಾಮ್ ಗ್ರೇವ್ ಯಶಸ್ವಿಯಾಗಿ ಜಿಗಿದು ಚಿನ್ನ ಗಿಟ್ಟಿಸಿಕೊಂಡರು. ಆದರೆ, ಮಳೆ ಬರದಿದ್ದರೆ ತಾವೂ 1.90 ಮೀಟರ್ ಎತ್ತರವನ್ನು ಜಿಗಿಯುತ್ತಿದ್ದೆ, ತಾವೂ ಬಲಗಾಲು(ಊನಾವಾಗಿರುವ) ಮಳೆಗೆ ತೇವವಾಗಿದ್ದರಿಂದ ಸಾಧ್ಯವಾಗಲಿಲ್ಲ ಎಂದು ತಿಳಿಸಿದ್ದಾರೆ.
ಫೈನಲ್ಸ್ ಆರಂಭವಾದ ವೇಳೆ ತುಂತುರು ಮಳೆ ಆರಂಭವಾಗಿತ್ತು. ಇದೇನು ನನಗೆ ಹೆಚ್ಚು ಸಮಸ್ಯೆ ಮಾಡಲಿಲ್ಲ. ಆದರೆ ನಾನು 1.80 ಮೀಟರ್ ಜಿಗಿಯುವಲ್ಲಿ ಯಶಸ್ವಿಯಾದ ಬಳಿಕ ಮಳೆ ಜೋರಾಯಿತು. ಆ ನಂತರ ಅಲ್ಲಿ ಪರಿಸ್ಥಿತಿ ನನ್ನ ಪಾಲಿಗೆ ಕೆಟ್ಟದಾಯಿತು. ನನ್ನ ಸಾಕ್ಸ್ ಒದ್ದೆಯಾಯಿತು. ಅದು ನಾನು ಜಿಗಿಯುವ ವೇಳೆ ತೊಂದರೆಯನ್ನುಂಟು ಮಾಡಿತು ಎಂದು ತಾವೂ ಮೂರು ಪ್ರಯತ್ನದಲ್ಲೂ 1.88 ಮೀಟರ್ ಜಿಗಿಯಲು ವಿಫಲರಾಗಿದ್ದಕ್ಕೆ ಕಾರಣವನ್ನು ತಿಳಿಸಿದ್ದಾರೆ.
ಒಂದು ವೇಳೆ, ವಾತಾವರಣ ಉತ್ತಮವಾಗಿದ್ದರೆ ನಾನು 1.90 ಮೀಟರ್ ಅನ್ನೇ ಯಶಸ್ವಿಯಾಗಿ ಜಿಗಿಯುತ್ತಿದ್ದೆ ಎಂದು ತಿಳಿಸಿರುವ ಅವರು ಉದ್ಘಾಟನಾ ಸಮಾರಂಭದಲ್ಲಿ ಭಾರತದ ಧ್ವಜ ಹಿಡಿಯುವ ಅವಕಾಶ ತಪ್ಪಿಸಿಕೊಂಡಿದ್ದಕ್ಕೆ ಬೇಸರವಿತ್ತು. ಆದರೆ, ದೇಶಕ್ಕಾಗಿ ಪದಕ ಗೆಲ್ಲಬೇಕೆಂದು ಬಯಸಿದ್ದೆ ಎಂದು ಯೂರೋಸ್ಪೋರ್ಟ್ಸ್ ಆಯೋಜಿಸಿದ್ದ ವರ್ಚುವಲ್ ಮಾಧ್ಯಮ ಗೋಷ್ಠಿಯಲ್ಲಿ ತಿಳಿಸಿದ್ದಾರೆ.
2016ರಲ್ಲಿ ಚಿನ್ನ ಗೆದ್ದಿದ್ದರಿಂದ ಟೋಕಿಯೋದಲ್ಲಿ ಉದ್ಘಾಟನಾ ಕಾರ್ಯಕ್ರಮದಲ್ಲಿ ಭಾರತದ ತ್ರಿವರ್ಣ ಧ್ವಜ ಹಿಡಿದು ಸಾಗುವ ಅವಕಾಶ ಸಿಕ್ಕಿತ್ತು. ಆದರೆ, ಅವರು ಪ್ರಯಾಣಿಸಿದ್ದ ವಿಮಾನದಲ್ಲಿ ಕೊರೊನಾ ಪ್ರಕರಣ ಕಂಡುಬಂದಿದ್ದರಿಂದ ಅವರು ಕ್ವಾರಂಟೈನ್ಗೆ ಒಳಗಾಗಬೇಕಾಯಿತು.
ಇದನ್ನು ಓದಿ:Paralympics: ಭಾರತಕ್ಕೆ ಮತ್ತೆರಡು ಪದಕ: ಹೈಜಂಪ್ನಲ್ಲಿ ತಂಗವೇಲುಗೆ ಬೆಳ್ಳಿ, ಶರದ್ಗೆ ಕಂಚು
