ಟೋಕಿಯೊ : ಟೋಕಿಯೊ ಒಲಿಂಪಿಕ್ಸ್ ಯಶಸ್ವಿಯಾಗಿ 12 ದಿನಗಳನ್ನು ಪೂರೈಸಿದೆ. ಭಾರತ ತಂಡ ಬಹುಪಾಲು ಕಹಿ ಅನುಭವಿಸಿದ್ದು, ಕೇವಲ 3 ಪದಕಗಳು ಮಾತ್ರ ಭಾರತದ ಪಾಲಿಗೆ ಸಂದಿವೆ. ಆದರೆ, ನಾಳೆ ಭಾರತೀಯ ಅಥ್ಲೀಟ್ಗಳ ಪಾಲಿಗೆ ಮಹತ್ವದ್ದಾಗಿದ್ದು, ಮತ್ತೆರಡು ಪದಕ ಖಚಿತವಾಗುವ ಸಾಧ್ಯತೆಯಿದೆ.
ಅಥ್ಲೆಟಿಕ್ಸ್ನಲ್ಲಿ ಭಾರತದ ಬಹುದೊಡ್ಡ ಪದಕದ ಭರರವಸೆಯಾಗಿರುವ ಜಾವಲಿನ್ ಥ್ರೋವರ್, ಬಾಕ್ಸಿಂಗ್ನಲ್ಲಿ ಪದಕ ಖಚಿತವಾಗಿದ್ದರೂ ಐತಿಹಾಸಿಕ ಫೈನಲ್ ಮೇಲೆ ಕಣ್ಣಟ್ಟಿರುವ ಲವ್ಲಿನಾ ಹಾಗೂ ಚೆಕ್ ದೇ ಇಂಡಿಯಾ ಸಿನಿಮಾ ರೀತಿ ಅಚ್ಚರಿಯ ಗೆಲುವಿನೊಂದಿಗೆ ಮುನ್ನಗ್ಗುತ್ತಿರುವ ಮಹಿಳಾ ಹಾಕಿ ತಂಡ ಕಣಕ್ಕಿಳಿಯಲಿದೆ. ಬುಧವಾರ ಎದುರು ನೋಡಬಹುದಾದ ಪ್ರಮುಖ ಕ್ರೀಡೆ ಮತ್ತು ಕ್ರೀಡಾಪಟುಗಳ ವಿವಿರ
ಭಾರತ ಮಹಿಳಾ ಹಾಕಿ ತಂಡ
ಸತತ 3 ಪಂದ್ಯಗಳನ್ನು ಸೋತರ ಎದೆಗುಂದದೆ ಧೈರ್ಯ ಮತ್ತು ದೃಢನಿಶ್ಚಯದಿಂದ ಮುನ್ನಗ್ಗುತ್ತಿರುವ ರಾಣಿ ರಾಂಪಾಲ್ ನೇತೃತ್ವದ ಭಾರತ ಮಹಿಳಾ ತಂಡ ಸೆಮಿಫೈನಲ್ ಪ್ರವೇಶಿಸುವ ಮೂಲಕ ಈಗಾಗಲೇ ಇತಿಹಾಸ ನಿರ್ಮಿಸಿದೆ.
ಕ್ವಾರ್ಟರ್ ಫೈನಲ್ನಲ್ಲಿ 3 ಬಾರಿಯ ಒಲಿಂಪಿಕ್ಸ್ ಚಾಂಪಿಯನ್ ಮತ್ತು 2 ಬಾರಿ ವಿಶ್ವ ಚಾಂಪಿಯನ್ ಆಸ್ಟ್ರೇಲಿಯಾವನ್ನು ಮಣಿಸಿರುವ ಭಾರತಕ್ಕೆ ಬುಧವಾರ ಸೆಮಿಫೈನಲ್ನಲ್ಲಿ ಅರ್ಜೆಂಟೀನಾ ತಂಡವನ್ನು ಎದುರಿಸಲಿದೆ. ಅರ್ಜೆಂಟೀನಾ ಅಂತಿಮ 8ರ ಘಟ್ಟದಲ್ಲಿ ಜರ್ಮನಿಯನ್ನು 3-0ಯಲ್ಲಿ ಮಣಿಸಿ ಸೆಮಿಫೈನಲ್ ಪ್ರವೇಶಿಸಿದೆ.
ಲವ್ಲಿನಾ ಬೋರ್ಗೊಹೈನ್
69 ಕೆಜಿ ವಿಭಾಗದಲ್ಲಿ ಮಾಜಿ ವಿಶ್ವ ಚಾಂಪಿಯನ್ ಚೀನಾದ ಬಾಕ್ಸರ್ ಮಣಿಸಿ ಕನಿಷ್ಠ ಕಂಚಿನ ಪದಕ ಖಚಿತಪಡಿಸಿಕೊಂಡಿರುವ ಲವ್ಲಿನಾ ಬೊರ್ಗೊಹೈನ್ ಬುಧವಾರ ನಡೆಯುವ ಸೆಮಿಫೈನಲ್ಸ್ನಲ್ಲಿ ಹಾಲಿ ವಿಶ್ವ ಚಾಂಪಿಯನ್ ಆಗಿರುವ ಟರ್ಕಿಯ ಬುಸಾನಾಜ್ ಸುರ್ಮೆನೆಲಿ ವಿರುದ್ಧ ಕಾದಾಡಲಿದ್ದಾರೆ. ಈ ಪಂದ್ಯದಲ್ಲಿ ಲವ್ಲಿನಾ ಗೆದ್ದರೆ ಒಲಿಂಪಿಕ್ಸ್ನಲ್ಲಿ ಫೈನಲ್ ಪ್ರವೇಶಿಸಿದ ಭಾರತದ ಮೊಟ್ಟ ಮೊದಲ ಬಾಕ್ಸರ್ ಎಂಬ ಶ್ರೇಯಕ್ಕೆ ಪಾತ್ರರಾಗಲಿದ್ದಾರೆ.
ನೀರಜ್ ಚೋಪ್ರಾ
ವಿಶ್ವದ 4ನೇ ಶ್ರೇಯಾಂಕಿತನಾಗಿರುವ ಭಾರತದ 23 ವರ್ಷದ ಜಾವಲಿನ್ ಥ್ರೋವರ್ ನೀರಜ್ ಚೋಪ್ರಾ ಒಲಿಂಪಿಕ್ಸ್ನಲ್ಲಿ ಪೋಡಿಯಂ ಏರಲಿದ್ದಾರೆ ಎಂಬ ಭರವಸೆ ಕೋಟ್ಯಂತರ ಭಾರತೀಯರ ಮನದಲ್ಲಿದೆ. ಅವರು ಜಾವಲಿನ್ ಸ್ಟಾರ್ ಜೋಹನೆಸ್ ವೆಟ್ಟರ್ ಇರುವ ಗುಂಪಿನಲ್ಲಿ ಅವಕಾಶ ಪಡೆದಿದ್ದಾರೆ. ಇವರ ಜೊತೆ ಭಾರತದ ಶಿವಪಾಲ್ ಸಿಂಗ್ ಕೂಡ ಪದಾರ್ಪಣೆ ಮಾಡಿದ್ದಾರೆ.
ಇದನ್ನು ಓದಿ:Olympics ಕುಸ್ತಿ: ರವಿ, ದೀಪಕ್ಗೆ ಸುಲಭ ಸವಾಲು.... ಅನ್ಶು ಮಲ್ಲಿಕ್ಗೆ ಯುರೋಪಿಯನ್ ಚಾಂಪಿಯನ್ ಎದುರಾಳಿ
