ಪ್ಯಾರೀಸ್: ಯುಎಸ್ ಓಪನ್ನಲ್ಲಿ ಅನರ್ಹಗೊಂಡು ನಿರಾಶೆಯನುಭವಿಸಿದ್ದ ಟೆನ್ನಿಸ್ ಆಟಗಾರ ನೊವಾಕ್ ಜೋಕೊವಿಕ್ ಫ್ರೆಂಚ್ ಓಪನ್ನಲ್ಲಿ ಮೊದಲ ಸುತ್ತಿನ ಜಯ ಸಾಧಿಸಿದ್ದಾರೆ.
18 ಗ್ರ್ಯಾಂಡ್ಸ್ಲಾಮ್ ಗೆಲ್ಲುವ ಕನಸಿನಲ್ಲಿರುವ ಜೋಕೊವಿಕ್ ಫ್ರೆಂಚ್ ಓಪನ್ನ ಮೊದಲ ಸುತ್ತಿನ ಪಂದ್ಯದಲ್ಲಿ ಸ್ವೀಡನ್ನ ಮಿಕಾಯೆಲ್ ವೈಮರ್ ವಿರುದ್ಧ 6-0, 6-2 ಹಾಗೂ 6-3 ಸೆಟ್ಗಳ ಅಂತರದಲ್ಲಿ ಮಣಿಸಿ ಎರಡನೇ ಸುತ್ತಿಗೆ ಪ್ರವೇಶಿಸಿದ್ದಾರೆ.
ಮೂರು ವಾರಗಳ ಕೆಳಗೆ ಯುಎಸ್ ಓಪನ್ನಲ್ಲಿ ಆಕಸ್ಮಿಕವಾಗಿ ಲೈನ್ ಅಂಪೈರ್ ಕುತ್ತಿಗೆಗೆ ಚೆಂಡನ್ನು ಹೊಡೆದ ಕಾರಣ ಟೂರ್ನಿಯಿಂದ ಹೊರಬಿದ್ದಿದ್ದರು. ಆದರೆ ಫ್ರೆಂಚ್ ಓಪನ್ನಲ್ಲಿ ಸ್ವೀಡೀಸ್ ಆಟಗಾರನ ವಿರುದ್ಧ ಸುಲಭದ ಜಯ ಸಾಧಿಸಿದ್ದಾರೆ.
33 ವರ್ಷದ ವರ್ಷದ ಆಟಗಾರ ಮೊದಲ ಸೆಟ್ಅನ್ನು ಕೇವಲ 20 ನಿಮಿಷಗಳಲ್ಲಿ ಗೆದ್ದುಕೊಂಡರು. ಎರಡನೇ ಸೆಟ್ನ ಆರಂಭದಲ್ಲಿ ಸರ್ವ್ ಕಳೆದುಕೊಂಡರೂ ತಾಳ್ಮೆಯಿಂದ ವರ್ತಿಸಿದ ಜೋಕೊವಿಕ್ ಎದುರಾಳಿ ಆಟಗಾರನ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದರು. 80 ನೇ ಶ್ರೇಯಾಂಕದ ವೈಮೆರ್ ಇದೇ ಮೊದಲ ಬಾರಿಗೆ ವಿಶ್ವದ ನಂಬರ್ ಒನ್ ಆಟಗಾರನ ವಿರುದ್ಧ ಸೆಣಸಾಡಿದರು.
ಟಾಪ್ ಶ್ರೇಯಾಂಕದ ಸರ್ಬಿಯನ್ ಸ್ಟಾರ್ ಮುಂದಿನ ಪಂದ್ಯದಲ್ಲಿ ಲಿತುವೇನಿಯಾದ ರಿಚರ್ಡ್ಸ್ ಬೆರಂಕಿಸ್ ಸವಾಲನ್ನು ಎದುರಿಸಲಿದ್ದಾರೆ.
ಫ್ರೆಂಚ್ ಓಪನ್ ಕಿಂಗ್ ರಾಫೆಲ್ ನಡಾಲ್ ಕೂಡ ತಮ್ಮ ಮೊದಲ ಸುತ್ತಿನ ಪಂದ್ಯದಲ್ಲಿ 6-4, 6-4, 6-2 ರಲ್ಲಿ ಬೆಲರೂಸಿಯನ್ ಇಗೊರ್ ಗೆರಾಸಿಮೊವ್ ವಿರುದ್ಧ ಗೆಲುವು ಸಾಧಿಸಿ 2ನೇ ಸುತ್ತು ಪ್ರವೇಶಿಸಿದ್ದಾರೆ.
