ದುಬೈ: ಇಂಗ್ಲೆಂಡ್ ತಂಡದ ಆರಂಭಿಕ ಆಟಗಾರ ಜಾಸನ್ ರಾಯ್ ಗಾಯಗೊಂಡ ಪರಿಣಾಮ ಟಿ20 ವಿಶ್ವಕಪ್ನಿಂದ ಹೊರಬಿದ್ದಿದ್ದಾರೆ. ಇದರಿಂದ ರಾಯ್ ಸ್ಥಾನಕ್ಕೆ ಮೀಸಲು ಆಟಗಾರನಾಗಿದ್ದ ಜೇಮ್ಸ್ ವಿನ್ಸಿ ತಂಡವನ್ನು ಕೂಡಿಕೊಳ್ಳಲಿದ್ದಾರೆ.
ಶಾರ್ಜಾದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಶನಿವಾರ ನಡೆದ ಲೀಗ್ನ ಕೊನೆಯ ಪಂದ್ಯದಲ್ಲಿ ಉತ್ತಮವಾಗಿ ಆಡುತ್ತಿದ್ದ ಜಾಸನ್ ರಾಯ್ ಒಂಟಿ ರನ್ ಕದಿಯುವಾಗ ಗಾಯಗೊಂಡಿದ್ದರು. ಗಾಯ ತೀವ್ರವಾದ ಹಿನ್ನೆಲೆಯಲ್ಲಿ ಅಂಗಳದಿಂದ ಹೊರನಡೆಯಬೇಕಾಯಿತು. ಇದೀಗ ಟೂರ್ನಿಯಿಂದಲೇ ಹೊರಬಿದ್ದಿದ್ದಾರೆ.
'ಟೂರ್ನಿಯಿಂದ ಹೊರಬಿದ್ದರೂ ತಂಡವನ್ನು ಹುರಿದುಂಬಿಸುವ ಕೆಲಸ ಮಾಡುವೆ. ತಂಡ ಎಲ್ಲ ಪಂದ್ಯಗಳನ್ನು ಗೆದ್ದು ಟ್ರೋಫಿ ಎತ್ತಿಹಿಡಿಯಲಿದೆ ಎಂಬ ಆಶಾಭಾವವಿದೆ. ಗಾಯದಿಂದ ಚೇತರಿಸಿಕೊಂಡು ವೆಸ್ಟ್ ಇಂಡೀಸ್ ವಿರುದ್ಧ ಮುಂದಿನ ವರ್ಷ ನಡೆಯುವ ಟಿ20 ಪಂದ್ಯಾವಳಿಗೆ ಮರಳುವೆ' ಎಂದು ಜಾಸನ್ ರಾಯ್ ತಿಳಿಸಿದ್ದಾರೆ.
ಜಾಸನ್ ರಾಯ್ ಸ್ಥಾನಕ್ಕೆ ಜೇಮ್ಸ್ ವಿನ್ಸಿ ಬಂದರೂ ನ್ಯೂಜಿಲೆಂಡ್ ವಿರುದ್ಧದ ಸೆಮಿಫೈನಲ್ನಲ್ಲಿ ಸ್ಯಾಮ್ ಬಿಲ್ಲಿಂಗ್ಸ್ರನ್ನು ತಂಡ ಕಣಕ್ಕಿಳಿಸಲಿದೆ ಎನ್ನಲಾಗಿದೆ. ಬಟ್ಲರ್ ಜತೆ ಆರಂಭಿಕರಾಗಿ ಡೇವಿಡ್ ಮಲಾನ್ ಅಥವಾ ಜಾನಿ ಬೈರ್ಸ್ಟೋವ್ ಕಣಕ್ಕೆ ಇಳಿಯಲಿದ್ದಾರೆ ಎನ್ನಲಾಗಿದೆ.
ಈಗಾಗಲೇ ಜೋಫ್ರಾ ಆರ್ಚರ್, ಬೆನ್ಸ್ಟ್ರೋಕ್, ಸ್ಯಾಮ್ ಕರನ್ ಜೊತೆಗೆ ಜಾಸನ್ ರಾಯ್ ಗಾಯಗೊಂಡಿದ್ದು ಇಂಗ್ಲೆಂಡ್ ತಂಡಕ್ಕೆ ಇನ್ನಷ್ಟು ಸಂಕಷ್ಟ ತಂದೊಡ್ಡಿದೆ.
