ಆಗಸ್ಟ್​ ಮೊದಲ ವಾರದಿಂದ ಕ್ರೀಡಾಪಟುಗಳಿಗೆ ಕುಸ್ತಿ ತರಬೇತಿ ಶುರು

ಕೊರೊನಾ ವೈರಸ್ ಕಾರಣದಿಂದಾಗಿ ಎಲ್ಲಾ ಕ್ರೀಡಾಪಟುಗಳು ತರಬೇತಿಯಿಂದ ದೂರವಿದ್ದಾರೆ. ಆದರೆ ಇನ್ನೂ ಕೂಡ ತರಬೇತಿ ಆರಂಭಿಸದಿದ್ದರೆ ಮುಂದಿನ ಒಲಿಂಪಿಕ್ಸ್‌ಗೆ ಹಿನ್ನೆಡೆಯಾಗುವುದನ್ನು ಅರಿತ ರೆಸ್ಲಿಂಗ್ ಫೆಡರೇಶನ್ ತರಬೇತಿ ಶಿಬಿರ ಆರಂಭಕ್ಕೆ ಸಿದ್ಧತೆಯಲ್ಲಿ ತೊಡಗಿದೆ.

ನವದೆಹಲಿ: ಭಾರತೀಯ ಕುಸ್ತಿ ಒಕ್ಕೂಟ (ರೆಸ್ಲಿಂಗ್​ ಫೆಡೆರೇಶನ್​ ಆಫ್​ ಇಂಡಿಯಾ) ಆಗಸ್ಟ್​ ಮೊದಲ ವಾರದಿಂದ ಮಹಿಳಾ ಮತ್ತು ಪುರುಷರಿಗೆ ತರಬೇತಿ ಶಿಬಿರ ಆರಂಭಿಸಲು ಚಿಂತಿಸಿದೆ.

ಕೊರೊನಾ ವೈರಸ್‌ನ ಕಾರಣದಿಂದಾಗಿ ಎಲ್ಲಾ ಕ್ರೀಡಾಪಟುಗಳು ತರಬೇತಿಯಿಂದ ದೂರವಿದ್ದಾರೆ. ಆದರೆ ಇನ್ನೂ ಕೂಡ ತರಬೇತಿ ಆರಂಭಿಸದಿದ್ದರೆ ಮುಂದಿನ ಒಲಿಂಪಿಕ್ಸ್‌ಗೆ ಹಿನ್ನೆಡೆಯಾಗುವುದನ್ನು ಅರಿತ ರೆಸ್ಲಿಂಗ್ ಫೆಡರೇಶನ್ ಈ ನಿಟ್ಟಿನಲ್ಲಿ ಕೆಲಸ ಶುರು ಮಾಡಿದೆ. ರೆಸ್ಲರ್‌ಗಳಿಗೆ ತರಬೇತಿ ಶಿಬಿರವನ್ನು ಆರಂಭಿಸಲು ಉತ್ಸುಕವಾಗಿರುವುದಾಗಿ ಫೆಡರೇಶನ್ ಸಹಾಯಕ ಕಾರ್ಯದರ್ಶಿ ವಿನೋದ್ ತೋಮರ್ ಖಚಿತಪಡಿಸಿದ್ದಾರೆ.

ಮಹಿಳೆಯರ ಕುಸ್ತಿ ಪಂದ್ಯ (ಸಂಗ್ರಹ ಚಿತ್ರ)

ಭಾರತೀಯ ಕ್ರೀಡಾ ಪ್ರಾಧಿಕಾರ, ರೆಸ್ಲಿಂಗ್ ಫೆಡರೇಶನ್ ಆಫ್ ಇಂಡಿಯಾ (ಡಬ್ಲ್ಯುಎಫ್‌ಐ) ಜೊತೆಗೂಡಿ ತರಬೇತಿ ಪುನರಾರಂಭಕ್ಕೆ ದಿನಾಂಕವನ್ನು ನಿಗದಿಪಡಿಸುತ್ತಿದೆ.

ಆರಂಭದಲ್ಲಿ ಒಲಿಂಪಿಕ್ಸ್‌ಗೆ ತೆರಳುವ ಕ್ರೀಡಾಪಟುಗಳನ್ನು ತರಬೇತಿಗೆ ಆಹ್ವಾನಿಸಲಾಗುತ್ತದೆ. ಬಳಿಕ ಉಳಿದ ವಿಭಾಗಗಳಿಗೂ ವಿಸ್ತರಿಸಲಾಗುಗುವುದು ಎಂದು ವಿನೋದ್​ ತೋಮರ್ ಹೇಳಿದ್ದಾರೆ.

ಪುರುಷರ ತರಬೇತಿ ಶಿಬಿರವನ್ನು ಸೋನಿಪತ್‌ನಲ್ಲಿ, ಮಹಿಳೆಯರ ಶಿಬಿರವನ್ನು ಲಕ್ನೋದಲ್ಲಿ ನಡೆಯಲಿದೆ ಎಂದು ತೋಮರ್ ಸ್ಪಷ್ಟಪಡಿಸಿದ್ದಾರೆ.

ಈಗಾಗಲೇ ಭಾರತದ ನಾಲ್ಕು ಕುಸ್ತಿಪಟುಗಳಿಗೆ ವಿವಿಧ ತೂಕದ ವಿಭಾಗದಲ್ಲಿ ಒಲಿಂಪಿಕ್ಸ್​ ಕೋಟಾವನ್ನು ಪಡೆದುಕೊಂದಿದ್ದಾರೆ. ಪುರುಷರಲ್ಲಿ ರವಿ ದಾಹಿಯಾ (57 ಕೆ.ಜಿ), ಭಜರಂಗ್ ಪುನಿಯಾ (65 ಕೆ.ಜಿ), ಮತ್ತು ದೀಪಕ್ ಪುನಿಯಾ (86 ಕೆ.ಜಿ) ಒಲಿಂಪಿಕ್​ಗೆ ಅರ್ಹತೆ ಗಿಟ್ಟಿಸಿಕೊಂಡಿದ್ದರೆ, ಮಹಿಳಾ ಕುಸ್ತಿಯಲ್ಲಿ ವಿನೇಶ್ ಪೊಗಾಟ್ (53) ಅರ್ಹತೆ ಪಡೆದಿದ್ದಾರೆ.