ಮುಂಬೈ : ದೇಶಾದ್ಯಂತ ಕೊರೊನಾ ವೈರಸ್ ವಿರುದ್ಧದ ಹೋರಾಟಕ್ಕಾಗಿ ಸಿನಿಮಾ ನಟರು, ಬ್ಯುಸಿನೆಸ್‌ಮೆನ್ಗಳು, ಕ್ರೀಡಾಪಟುಗಳು ಈಗಾಗಲೇ ರಾಜ್ಯ ಮತ್ತು ಕೇಂದ್ರ ಸರ್ಕಾರದ ಪರಿಹಾರ ನಿಧಿಗೆ ತಮ್ಮ ಕೈಲಾದಷ್ಟು ಸಹಾಯ ಮಾಡಿ ಮಾನವೀಯತೆ ಮೆರೆದಿದ್ದಾರೆ. ಇದೀಗ ಆ ಸಾಲಿಗೆ ಭಾರತ ಬ್ಯಾಡ್ಮಿಂಟನ್ನ ಮುಖ್ಯ ಕೋಚ್ ಪುಲ್ಲೇಲು ಗೋಪಿಚಂದ್ ಕೂಡ ಸೇರಿಕೊಂಡಿದ್ದಾರೆ.
ಈಗಾಗಲೇ ಭಾರತ ಕ್ರಿಕೆಟ್ ತಂಡದ ಹಾಲಿ ಹಾಗೂ ಮಾಜಿ ಕ್ರೀಡಾಪಟುಗಳು ದೇಣಿಗೆ ನೀಡಿ ಮಾನವೀಯತೆ ತೋರಿದ್ದರು. ಇದೀಗ ಬ್ಯಾಡ್ಮಿಂಟನ್ ದಿಗ್ಗಜ ಪುಲ್ಲೇಲು ಗೋಪಿಚಂದ್ ₹25 ಲಕ್ಷ ದೇಣಿಗೆ ನೀಡುವ ಮೂಲಕ ಕೊರೊನಾ ವಿರುದ್ಧದ ಹೋರಾಟಕ್ಕೆ ಕೈಜೋಡಿಸಿದ್ದಾರೆ. ಗೋಪಿಚಂದ್ ಪ್ರಧಾನಮಂತ್ರಿ ಪರಿಹಾರ ನಿಧಿಗೆ ₹15 ಲಕ್ಷ, ತೆಲಂಗಾಣ ಹಾಗೂ ಆಂಧ್ರ ಮುಖ್ಯಮಂತ್ರಿಗಳ ಪರಿಹಾರ ನಿಧಿಗೆ ತಲಾ ₹5 ಲಕ್ಷ ಸೇರಿದಂತೆ ಒಟ್ಟು 26 ಲಕ್ಷ ದೇಣಿಗೆ ನೀಡಿದ್ದಾರೆ.
ಸ್ನೂಕರ್ ಚಾಂಪಿಯನ್ ಕನ್ನಡಿಗ ಪಂಕಜ್ ಅಡ್ವಾಣಿ ಹಾಗೂ ಹಾಕಿ ಆಟಗಾರ ಧನರಾಜ್ ಪಿಳ್ಳೆ ಕೂಡ ಪ್ರಧಾನಮಂತ್ರಿ ಪರಿಹಾರ ನಿಧಿಗೆ ತಲಾ ₹5 ಲಕ್ಷ ದೇಣಿಗೆ ನೀಡಿದ್ದಾರೆ. ಐ-ಲೀಗ್ನ ಫುಟ್ಬಾಲ್ ಕ್ಲಬ್ ಮಿನೆರ್ವ್‌ ಪಂಜಾಬ್, ಪ್ರಧಾನಿ ಪರಿಹಾರ ನಿಧಿಗೆ 2 ಲಕ್ಷ ಹಾಗೂ ಪಂಜಾಬ್, ಚಂಡೀಗಢ್, ಹರಿಯಾಣ ಸರ್ಕಾರಕ್ಕೆ ತಲಾ ಒಂದು ಲಕ್ಷ ದೇಣಿಗೆ ನೀಡಿದೆ.
ಮಾರಣಾಂತಿಕ ವೈರಸ್ ತಡೆಗೆ ಕ್ರೀಡಾ ಕ್ಷೇತ್ರದ ದಿಗ್ಗಜರು ತಮ್ಮ ಕೈಲಾದಷ್ಟು ಸಹಾಯ ಮಾಡುವ ಮೂಲಕ ಮಾನವೀಯತೆ ಮೆರೆಯುತ್ತಿದ್ದಾರೆ. ಪಠಾಣ್ ಬ್ರದರ್ಸ್, ಹರ್ಭಜನ್ ಸಿಂಗ್ ಕೂಡ ಕೆಲ ಬಡಜನರಿಗೆ ಆಹಾರ ಪೂರೈಸಿದ್ದರು.
