ಬೆಂಗಳೂರು: ಪಾಟ್ಲಾ ಪೈರೇಟ್ಸ್ ಪ್ರಬಲ ಡಿಫೆಂಡರ್ಗಳ ಮುಂದೆ ಮಂಕಾದ ಬೆಂಗಳೂರು ಬುಲ್ಸ್ 31-38 ಅಂಕಗಳ ಅಂತರದಿಂದ ಸೋಲು ಕಂಡಿದೆ. ಆದರೂ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನವನ್ನು ಉಳಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದೆ.
ಆರಂಭದಿಂದಲೂ 2 ಅಂಕಗಳ ಅಂತರವನ್ನು ಕಾಯ್ದುಕೊಂಡಿದ್ದ ಪಾಟ್ನಾ ಮೊದಲಾರ್ಧದ ವೇಳೆಗೆ 20-16ರಲ್ಲಿ ಮುನ್ನಡೆ ಕಾಯ್ದುಕೊಂಡಿತು. ಮೊದಲಾರ್ಧದ ಮೊದಲ ನಿಮಿಷದಲ್ಲೇ ಬುಲ್ಸ್ ತಂಡವನ್ನ ಆಲೌಟ್ ಮಾಡಿದ ಪಾಟ್ನಾ ಅಂತ್ಯದ ವರೆಗೂ ಪ್ರಾಬಲ್ಯ ಸಾಧಿಸಿ ಪಂದ್ಯದಲ್ಲಿ ವಿಜಯ ಸಾಧಿಸಿದ್ದಲ್ಲದೆ, ಅಂಕಪಟ್ಟಿಯಲ್ಲಿ ದಬಾಂಗ್ ಡೆಲ್ಲಿಯನ್ನು ಹಿಂದಿಕ್ಕಿ 2ನೇ ಸ್ಥಾನಕ್ಕೆ ಬಡ್ತಿಪಡೆಯಿತು.
ಪಾಟ್ನಾಪರ ಡಿಫೆಂಡರ್ ಸುನಿಲ್ 9 ಟ್ಯಾಕಲ್ ಪಾಯಿಂಟ್ ಪಡೆದು ತಂಡದ ಪರ ಹೆಚ್ಚು ಅಂಕಗಳಿಸಿದ ಪ್ಲೇಯರ್ ಎನಿಸಿಕೊಂಡರು. ರೈಡರ್ ಸಚಿನ್ 8, ಗುಮನ್ ಸಿಂಗ್ ಒಟ್ಟು 7 ಅಂಕ ಪಡೆದರು. ಸುನಿಲ್ಗೆ ಸಾಥ್ ನೀಡಿದ ನೀರಜ್ ಕುಮಾರ್ ಮತ್ತು ಮೊಹಮದ್ರೇಜಾ ತಲಾ 3 ಟ್ಯಾಕಲ್ ಅಂಕ ಪಡೆದರು.
ಬೆಂಗಳೂರು ಪರ ಪವನ್ 5 ಬೋನಸ್ ಸಹಿತ 10 ಅಂಕ ಪಡೆದರು. ಇಂದು ರೈಡಿಂಗ್ನಲ್ಲಿ ಮಂಕಾಗಿ ಕಂಡದ್ದು ಒಂದುಕಡೆಯಾದರೆ, ಬೇರೆ ರೈಡರ್ಗಳು ದಯಾನೀಯ ವೈಫಲ್ಯ ಅನಭವಿಸಿದ್ದರಿಂದ ಅವರು ಪಂದ್ಯದಲ್ಲಿ 25ಕ್ಕೂ ಹೆಚ್ಚು ನಿಮಿಷ ಹೊರಗುಳಿಯಬೇಕಾಯಿತು. ಈ ಕಾರಣ ಪಾಟ್ನಾ ವಿರುದ್ಧ ತಿರುಗಿ ಬೀಳುವುದಕ್ಕೆ ಬುಲ್ಸ್ಗೆ ಅವಕಾಶ ಸಿಗಲಿಲ್ಲ. ಮಹೇಂದ್ರ ಸಿಂಗ್ 3 ಟ್ಯಾಕಲ್ ಸಹಿತ 6, ಸೌರಭ್ ನಂಡಲ್ 2 ಬೋನಸ್ ಸಹಿತ 6 ಅಂಕ ಪಡೆದರೆ, ಚಂದ್ರನ್ ರಂಜಿತ್ ಕೇವಲ 3 ಅಂಕ ಪಡೆದು ನಿರಾಶೆ ಮೂಡಿಸಿದರು.
ತಮಿಳ್ ತಲೈವಾಸ್ ಮತ್ತು ಜೈಪುರ್ ಪಿಂಕ್ ಪ್ಯಾಂಥರ್ಸ್ ನಡುವಿನ ಮತ್ತೊಂದು ಪಂದ್ಯ 31-31ರಲ್ಲಿ ರೋಚಕ ಟೈನಲ್ಲಿ ಅಂತ್ಯಗೊಂಡಿತು.
ಇದನ್ನೂ ಓದಿ:ವಿಶ್ವಚಾಂಪಿಯನ್ ಲೋಹ್ ಕೀನ್ ಮಣಿಸಿ ಇಂಡಿಯಾ ಓಪನ್ ಗೆದ್ದ ಲಕ್ಷ್ಯ ಸೇನ್
