ಲಿಂಬರ್ಗ್‌ನ (ಜರ್ಮನಿ): ಭಾರತ ಮಹಿಳಾ ಹಾಕಿ ತಂಡ ಜರ್ಮನಿ ಪ್ರವಾಸ ಕೈಗೊಂಡಿದ್ದು, ಜುಲೈ 16 ರಿಂದ ಜುಲೈ 19ರ ವರೆಗೆ ಚೀನಾ ಮತ್ತು ಜರ್ಮನಿ ವಿರುದ್ಧ ಆಡಲಿದೆ. ಪ್ರವಾಸದಲ್ಲಿ ಮೂರು ಪಂದ್ಯಗಳನ್ನು ಆಡಲಿರುವ ಭಾರತ, ಭಾನುವಾರ (ನಾಳೆ) ಮೊದಲ ಪಂದ್ಯದಲ್ಲಿ ಚೀನಾ ವಿರುದ್ಧ ಕಣಕ್ಕಿಳಿಯಲಿದೆ. ಗೋಲ್‌ಕೀಪರ್ ಸವಿತಾ ಮತ್ತು ವೈಸ್ ಕ್ಯಾಪ್ಟನ್ ದೀಪ್ ಗ್ರೇಸ್ ಎಕ್ಕಾ ನೇತೃತ್ವದ ತಂಡ ಲಿಂಬರ್ಗ್‌ನಲ್ಲಿ ವಿಶ್ವ ನಂ.11ರ ಚೀನಾವನ್ನು ಎದುರಿಸಲಿದೆ. ನಂತರ ಜುಲೈ 18 ಮತ್ತು ಜುಲೈ 19 ರಂದು ಕ್ರಮವಾಗಿ ವೈಸ್‌ಬಾಡೆನ್ ಮತ್ತು ರಸ್ಸೆಲ್‌ಶೀಮ್‌ನಲ್ಲಿ ಆತಿಥೇಯ ಜರ್ಮನಿ ವಿರುದ್ಧ ಎರಡು ಪಂದ್ಯಗಳನ್ನು ಆಡಲಿದೆ.
ಸೆಪ್ಟೆಂಬರ್ 23 ರಿಂದ ಅಕ್ಟೋಬರ್ 8ರ ವರೆಗೆ ಚೀನಾದ ಹ್ಯಾಂಗ್‌ಝೌನಲ್ಲಿ ನಡೆಯಲಿರುವ ಏಷ್ಯನ್ ಗೇಮ್ಸ್2023ಗೆ ಈ ಜರ್ಮನ್ ಪ್ರವಾಸವು ಪೂರ್ವಭಾವಿ ಪಂದ್ಯವಾಗಿ ಸಹಾಯಕವಾಗಲಿದೆ. ಏಷ್ಯನ್ ಗೇಮ್ಸ್‌ಗೆ ಮುಂಚಿತವಾಗಿ ತಮ್ಮ ಸಾಮರ್ಥ್ಯಗಳನ್ನು ಮೌಲ್ಯಮಾಪನ ಮಾಡಲು ಈ ಪ್ರವಾಸವು ಹೆಚ್ಚಿನ ಪ್ರಾಮುಖ್ಯತೆ ನೀಡುತ್ತದೆ.
ಈ ಕುರಿತು ಮಾತನಾಡಿದ ಭಾರತೀಯ ಮಹಿಳಾ ಹಾಕಿ ತಂಡದ ನಾಯಕಿ ಸವಿತಾ, "ಪ್ರತಿಷ್ಠಿತ ಹ್ಯಾಂಗ್‌ಝೌ ಏಷ್ಯನ್ ಗೇಮ್ಸ್ 2023ಕ್ಕೆ ಮುಂಚಿತವಾಗಿ ಏಷ್ಯಾದ ಎದುರಾಳಿಯ ವಿರುದ್ಧ ನಮ್ಮನ್ನು ಪರೀಕ್ಷಿಸಿಕೊಳ್ಳಲು ಈ ಪಂದ್ಯವು ನಮಗೆ ಉತ್ತಮ ಅವಕಾಶವಾಗಿದೆ. ಈಗಾಗಲೇ ತಂಡ ಸುದೀರ್ಘ ಅಭ್ಯಾಸವನ್ನು ನಡೆಸಿ, ಸುಧಾರಿಸಬೇಕಾದ ಅಂಶಗಳ ಕುರಿತು ಚರ್ಚಿಸಿದ್ದೇವೆ. ಮುಂಬರುವ ಪಂದ್ಯಗಳಿಗೂ ನಾವು ಸಿದ್ಧರಾಗಿದ್ದೇವೆ ಎಂದು ಹೇಳಿದ್ದಾರೆ.
ಈ ಪಂದ್ಯಕ್ಕೂ ಮುನ್ನ ಶ್ರೇಯಾಂಕಗಳನ್ನು ನೋಡುವುದಾದರೇ ಎಂಟನೇ ಶ್ರೇಯಾಂಕದ ಭಾರತ ತಂಡ 11ನೇ ಶ್ರೇಯಾಂಕದ ಚೀನಾ ತಂಡದ ವಿರುದ್ಧ ಗೆಲ್ಲುವ ಸ್ಪರ್ಧಿಯಾಗಲಿದೆ. ಕಳೆದ ಬಾರಿ ಎರಡೂ ತಂಡಗಳು ಸ್ಪೇನ್ ಮತ್ತು ನೆದರ್ಲೆಂಡ್ಸ್‌ನಲ್ಲಿ ನಡೆದ ಎಫ್‌ಐಎಚ್ ಮಹಿಳಾ ವಿಶ್ವಕಪ್ (2022) ನಲ್ಲಿ ಪರಸ್ಪರ ಮುಖಾಮುಖಿಯಾದಾಗ, ಪಂದ್ಯ 1-1 ಡ್ರಾದಲ್ಲಿ ಕೊನೆಗೊಂಡಿತು.
2013ರ ಮಹಿಳಾ ಏಷ್ಯಾ ಕಪ್‌ನಿಂದ ಎರಡು ತಂಡಗಳು ಪರಸ್ಪರ 17 ಬಾರಿ ಮುಖಾಮುಖಿಯಾಗಿದ್ದು, ಭಾರತ 10 ಪಂದ್ಯಗಳು ಜಯಸಿದ್ದು, ಚೀನಾ ಐದರಲ್ಲಿ ಗೆದ್ದಿದೆ. ಎರಡು ಪಂದ್ಯಗಳು ಡ್ರಾನಲ್ಲಿ ಕೊನೆಗೊಂಡಿವೆ.
ಈ ಬಗ್ಗೆ ಭಾರತ ಮಹಿಳಾ ಹಾಕಿ ತಂಡದ ಮುಖ್ಯ ಕೋಚ್ ಯಾಂಕೆ ಸ್ಕೋಪ್‌ಮನ್ ಪ್ರತಿಕ್ರಿಯೆ ನೀಡಿ, ಆಟಗಾರರು ಪ್ರವಾಸದಲ್ಲಿ ತಮ್ಮ ಸಾಮರ್ಥ್ಯಕ್ಕೆ ತಕ್ಕಂತೆ ಆಡಬೇಕೆಂದು ಬಯಸುತ್ತಾರೆ. ಪ್ರವಾಸಕ್ಕೂ ಮುನ್ನ ಶಿಬಿರ ಆಯೋಜಿಸಿದ್ದೆವು. ಚೀನಾ ಮತ್ತು ಜರ್ಮನಿ ಎರಡೂ ಬಲಿಷ್ಠ ಮತ್ತು ಸಮತೋಲಿತ ತಂಡಗಳನ್ನು ಹೊಂದಿವೆ. ನಾವು ನಮ್ಮ ಸಾಮರ್ಥ್ಯಕ್ಕೆ ತಕ್ಕಂತೆ ಆಡುವುದನ್ನು ಮುಂದುವರಿಸುತ್ತೇವೆ. ಪ್ರವಾಸದಲ್ಲಿ ಉತ್ತಮ ಫಲಿತಾಂಶಗಳನ್ನು ಪಡೆಯುವ ಭರವಸೆ ಇದೆ ಎಂದು ಶಾಪ್‌ಮನ್ ಹೇಳಿದರು.
ಇದನ್ನೂ ಓದಿ: India vs West Indies Test : 12 ವಿಕೆಟ್ ಪಡೆದು ಅನಿಲ್ ಕುಂಬ್ಳೆ ದಾಖಲೆ ಸರಿಗಟ್ಟಿದ ಅಶ್ವಿನ್
