ನಮ್ಕುಮ್(ರಾಂಚಿ): ಜಾರ್ಖಂಡ್ ರಾಜ್ಯ ಭಾರತಕ್ಕಾಗಿ ಅಥ್ಲೀಟ್ಗಳನ್ನು ಸೃಷ್ಠಿಸಿಕೊಡುವ ಕೇಂದ್ರ ಎಂದು ಕರೆಯಲಾಗುತ್ತದೆ. ಯಾಕೆಂದರೆ, ಈಗಾಗಲೇ ಆ ರಾಜ್ಯ ದೇಶಕ್ಕಾಗಿ ಪದಕ ತಂದುಕೊಟ್ಟಿರುವ ಹಾಗೂ ಅದ್ಭುತ ಕೌಶಲ್ಯಗಳನ್ನು ಹೊಂದಿರುವ ಸಾಕಷ್ಟು ಕ್ರೀಡಾಪಟುಗಳನ್ನು ದೇಶಕ್ಕೆ ನೀಡಿದೆ. ಅಲ್ಲಿನ ಸರ್ಕಾರ ಕೂಡ ಹಲವಾರು ಯೋಜನೆಗಳನ್ನು ಜಾರಿಗೆ ತಂದಿದ್ದು, ಅಥ್ಲೀಟ್ಗಳ ಬೆಳವಣಿಗೆಗೆ ಶ್ರಮಿಸುತ್ತಿದೆ.
ಆದಾಗ್ಯೂ, ದೇಶಕ್ಕಾಗಿ ಹಾಗೂ ರಾಜ್ಯಕ್ಕಾಗಿ ಸಾಕಷ್ಟು ಪದಕ ಗೆದ್ದುಕೊಟ್ಟಿರುವ ಪ್ರಸ್ತುತ ಮತ್ತು ನಿವೃತ್ತಿ ಹೊಂದಿರುವ ಹಲವಾರು ಕ್ರೀಡಾಪಡುಗಳು ಹಣಕಾಸಿನ ದುಸ್ಥಿತಿ ಎದುರಿಸುತ್ತಿದ್ದಾರೆ. ಅಂತಹವರಲ್ಲಿ ಮರಿಯಾ ಗೊರೆಟ್ಟಿ ಖಲ್ಖಾ ಕೂಡ ಒಬ್ಬರು. ಮರಿಯಾ ಜಾವಲಿನ್ ಥ್ರೋನಲ್ಲಿ ರಾಜ್ಯಕ್ಕೆ ಹಾಗೂ ದೇಶಕ್ಕೆ ಹಲವಾರು ಪದಕ ತಂದುಕೊಟ್ಟಿದ್ದಾರೆ.
ಆದರೆ, ಅವರ ಇಂದಿನ ಪರಿಸ್ಥಿತಿ ದಯನೀಯಾವಾಗಿದೆ. ಅವರು ತಮ್ಮ ಜೀವನ ನಿರ್ವಹಣೆಗೂ ಪರಿತಪಿಸುತ್ತಿದ್ದು, ಸರ್ಕಾರದ ಮುಂದೆ ನೆರವಿಗಾಗಿ ಬೇಡಿಕೊಳ್ಳುತ್ತಿದ್ದಾರೆ. ಕೇವಲ ಆರ್ಥಿಕ ಪರಿಸ್ಥಿತಿಯಿಲ್ಲದೆ ಅವರ, ಅರೋಗ್ಯ ಸ್ಥಿತಿ ಕೂಡ ತೀರಾ ಹದಗೆಟ್ಟಿದೆ. ಕಳೆದ ಒಂದೆರಡು ವರ್ಷಗಳ ಹಿಂದೆ ಮರಿಯಾ ಶ್ವಾಸಕೋಶ ಖಾಯಿಲೆಯಿಂದ ಬಳಲಿ ರಿಮ್ಸ್ಗೆ ದಾಖಲಾಗಿದ್ದರು. ಅವರ ಒಂದು ಶ್ವಾಸಕೋಶ ಕೆಲಸ ಮಾಡುತ್ತಿಲ್ಲ ಎಂದು ವೈದ್ಯರು ತಿಳಿಸಿದ್ದರು. ಆಗ ಸರಿಯಾದ ಸಮಯಕ್ಕೆ ನೆರವಿಗೆ ಬಂದ ರಾಜ್ಯ ಕ್ರೀಡಾ ನಿರ್ದೇಶಕ ಅನಿಲ್ ಕುಮಾರ್ ಸಿಂಗ್ ಮತ್ತು ಸ್ಪೋರ್ಟ್ಸ್ ಇನ್ಸ್ಟ್ರಕ್ಟರ್ ಪ್ರವೀಣ್ ಕುಮಾರ್ ಮರಿಯಾ ಅವರ ಜೀವವನ್ನು ಉಳಿಸಿದ್ದರು.
ಆದರೆ, ಅಂದು ಆಸ್ಪತ್ರೆಯಿಂದ ಬಂದ ನಂತರ ಯಾರೊಬ್ಬರು ತಮ್ಮನ್ನು ಭೇಟಿಯಾಗಿಲ್ಲ. ತಮ್ಮ ಆರೋಗ್ಯ ಹೇಗಿದೆ ಎಂದು ವಿಚಾರಿಸಿಲ್ಲ ಎಂದು ಮರಿಯಾ ತಮ್ಮ ನೋವನ್ನು ಈಟಿವಿ ಭಾರತದೊಂದಿಗೆ ತೋಡಿಕೊಂಡಿದ್ದಾರೆ. ಪ್ರಸ್ತುತ ಅವರು ತಮ್ಮ ಸಹೋದರಿ ಮನೆಯಲ್ಲಿ ವಾಸವಿದ್ದು, ತಮಗೆ ಹಣಕಾಸಿನ ನೆರವು ನೀಡಬೇಕೆಂದು ಸರ್ಕಾರವನ್ನು ಕೇಳಿಕೊಂಡಿದ್ದಾರೆ.
1974ರಲ್ಲಿ ಮರಿಯಾ ಅವರು ತಮ್ಮ 8ನೇ ವಯಸ್ಸಿನಲ್ಲಿ ಮೊದಲ ಚಿನ್ನದ ಪದ ಗೆದ್ದಿದ್ದರು. ನಂತರದ ವರ್ಷದಲ್ಲೇ ಆಲ್ ಇಂಡಿಯಾ ರೂರಲ್ ಸಮ್ಮಿಟ್ನಲ್ಲಿ ಮತ್ತೊಂದು ಚಿನ್ನದ ಪದಕ ಪಡೆದಿದ್ದರು. 1975ರಲ್ಲಿ ಮಣಿಪುರದಲ್ಲಿ ನಡೆದಿದ್ದ ನ್ಯಾಷನಲ್ ಸ್ಕೂಲ್ ಇವೆಂಟ್ನಲ್ಲೂ ಚಿನ್ನದ ಪದಕ ಪಡೆದಿದ್ದರು.
1976ರಲ್ಲಿ ಜಲಂಧರ್‌ನಲ್ಲಿ ನಡೆದ ಅಂತಾರಾಷ್ಟ್ರೀಯ ಜಾವೆಲಿನ್ ಈವೆಂಟ್‌ನಲ್ಲಿ ಮರಿಯಾ ಚಿನ್ನ ಗೆದ್ದಾಗ ಅವರು ಹೆಸರು ಬೆಳಕಿಗೆ ಬಂದಿತು. ಅವರು ಮತ್ತೆ 1976-77ರಲ್ಲಿ ಬನಾರಸ್ ಜಾವೆಲಿನ್ ಮೀಟ್‌ನಲ್ಲಿ ಚಿನ್ನ ಗೆದ್ದರು. ಅವರು 1980ರಿಂದ 2018ರವರೆಗೆ ಹಲವಾರು ಆಥ್ಲೀಟ್ಗಳಿಗೂ ತರಬೇತಿ ನೀಡಿದ್ದಾರೆ.
ಇಷ್ಟೆಲ್ಲಾ ಸಾಧನೆ ಮಾಡಿರುವ ಮರಿಯಾ ಅವರ ಬಾಳಲ್ಲಿ ಈಗ ಕತ್ತಲೆ ಕವಿದಿದೆ. ಅವರು ತಮ್ಮ ಜೀವನ ನಿರ್ವಹಣೆ ಮಾಡಲು ಸಂಪೂರ್ಣ ಅವರ ಸಹೋದರಿಯನ್ನು ಅವಲಂಬಿಸಿದ್ದಾರೆ. ರಾಂಚಿಯ 20 ಕಿ.ಮೀ. ದೂರದಲ್ಲಿರುವ ನಮ್ಕುಮ್ ಎಂಬಲ್ಲಿ ವಾಸಿಸುತ್ತಿರುವ ಅವರು ತಮಗೆ ನೆರವು ನೀಡಬೇಕೆಂದು ಸರ್ಕಾರ ಹಾಗೂ ಕ್ರೀಡಾ ಪೋಷಕರನ್ನು ಮನವಿ ಮಾಡಿಕೊಂಡಿದ್ದಾರೆ.
ಇದನ್ನು ಓದಿ:ಮತ್ತೊಂದು ಬಯೋ ಬಬಲ್ಗೆ ಸಿದ್ಧತೆ: ಜ. 27ರಂದು ಚೆನ್ನೈಗೆ ಬರಲಿದೆ ಟೀಂ ಇಂಡಿಯಾ
