ಬೆಂಗಳೂರು: ಪ್ರೊ ಕಬಡ್ಡಿ ಲೀಗ್ 10ನೇ ಆವೃತ್ತಿಯ ಪಂದ್ಯದಲ್ಲಿ ದಬಾಂಗ್ ಡೆಲ್ಲಿ ತಂಡ ಬೆಂಗಳೂರು ಬುಲ್ಸ್ ತಂಡ ವಿರುದ್ಧ 38-31 ಅಂಕಗಳ ಅಂತರದಿಂದ ಭರ್ಜರಿ ಗೆಲುವು ದಾಖಲಿಸಿದೆ. ಡೆಲ್ಲಿ ತಂಡದ ನಾಯಕ ನವೀನ್ 13 ಅಂಕ ಗಳಿಸಿ ಮುನ್ನಡೆ ಸಾಧಿಸಿದರೆ, ಅಶು ಮಲಿಕ್ 9 ಅಂಕ ಗಳಿಸಿದರು. 5ನೇ ನಿಮಿಷದಲ್ಲಿ ಬುಲ್ಸ್ ಮತ್ತು ದಬಾಂಗ್ ಡೆಲ್ಲಿ ತಂಡಗಳು 3- 3ರ ಸಮಬಲ ಸಾಧಿಸಿದ್ದವು. ಆದರೆ, 8ನೇ ನಿಮಿಷದಲ್ಲಿ ವಿಕಾಸ್ ಖಂಡೋಲಾರನ್ನ ಟ್ಯಾಕಲ್ ಮಾಡಿದ ಡೆಲ್ಲಿ 6-3ರಲ್ಲಿ ಮುನ್ನಡೆ ಸಾಧಿಸಿತು. 12ನೇ ನಿಮಿಷದಲ್ಲಿ ಬುಲ್ಸ್ಗಳನ್ನ ಆಲ್ಔಟ್ ಮಾಡುವ ಮೂಲಕ ಡೆಲ್ಲಿ 14-7ರ ಮುನ್ನಡೆ ಸಾಧಿಸಿತು. 18ನೇ ನಿಮಿಷದಲ್ಲಿ ಅಶು ಮಲಿಕ್ ರನ್ನ ಸೂಪರ್ ಟ್ಯಾಕಲ್ ಮಾಡಿದ ಬುಲ್ಸ್ ತಿರುಗೇಟು ನೀಡಿತಾದರೂ ಡೆಲ್ಲಿ ತಂಡ ಮೊದಲಾರ್ಧದ ಅಂತ್ಯಕ್ಕೆ 17-12ರ ಮುನ್ನಡೆ ಕಾಯ್ದುಕೊಂಡಿತು.
ದ್ವಿತೀಯಾರ್ಧದ ಆರಂಭದಲ್ಲೇ ಸೌರಭ್ ನಂದಾಲ್ ಅವರು ಡೆಲ್ಲಿಯ ನವೀನ್ ಅವರನ್ನು ಟ್ಯಾಕಲ್ ಮಾಡುವಲ್ಲಿ ಯಶಸ್ವಿಯಾದರು. ಹೀಗಾಗಿ ಬುಲ್ಸ್ ತಂಡದ ಅಂತರವನ್ನು 17-20 ಅಂಕಗಳಿಗೆ ಇಳಿಸಿತು. ನಂತರ ಸುಶೀಲ್ ರೈಡ್ ಪಾಯಿಂಟ್ ಗಳಿಸಿದರೆ, ಬುಲ್ಸ್ ಪರ ನಂದಾಲ್ ಡೆಲ್ಲಿಯ ಅಶು ಮಲಿಕ್ ಅವರನ್ನು ನಿಭಾಯಿಸಿದರು. ಆದರೆ ಡೆಲ್ಲಿ ತಂಡವು 26ನೇ ನಿಮಿಷದಲ್ಲಿ 23-20ರಲ್ಲಿ ಮುನ್ನಡೆ ಸಾಧಿಸುವಲ್ಲಿ ಯಶಸ್ವಿಯಾಯಿತು. 31ನೇ ನಿಮಿಷದಲ್ಲಿ ಡೆಲ್ಲಿ 29-23 ಅಂಕಗಳ ಮುನ್ನಡೆ ಸಾಧಿಸಿತು.
‘33ನೇ ನಿಮಿಷದಲ್ಲಿ ಹಿಮ್ಮತ್ ಅಂತಿಲ್, ಯೋಗೇಶ್ ಮತ್ತು ಮೋಹಿತ್ಗಳಿಸಿದ ಅಂಕದಿಂದ ಡೆಲ್ಲಿ 32-29 ಅಂಕಗಳ ಮುನ್ನಡೆ ಸಾಧಿಸಿತು. 38ನೇ ನಿಮಿಷದಲ್ಲಿ ನವೀನ್ ಗಳಿಸಿದ ಅಂಕದಿಂದ ದಬಾಂಗ್ ಡೆಲ್ಲಿ 36-30 ಅಂಕಗಳ ಮುನ್ನಡೆ ಸಾಧಿಸಿತು. ಪಂದ್ಯದ ಕೊನೆಯ ನಿಮಿಷಗಳಲ್ಲಿ ಅಶು ಮಲಿಕ್ ಮತ್ತೊಂದು ರೈಡ್ನೊಂದಿಗೆ ದಬಾಂಗ್ ಡೆಲ್ಲಿಯ ಗೆಲುವಿನ ಅಂತರವನ್ನ ಹೆಚ್ಚಿಸಿದರು.
ಬೆಸ್ಟ್ ರೈಡರ್ ಮತ್ತು ಡಿಫೆಂಡರ್
ದಬಾಂಗ್ ದೆಹಲಿ
ಅತ್ಯುತ್ತಮ ರೈಡರ್ - ನವೀನ್ ಕುಮಾರ್ (12 ರೇಡ್ ಪಾಯಿಂಟ್)
ಅತ್ಯುತ್ತಮ ಡಿಫೆಂಡರ್ - ವಿಶಾಲ್ ಭಾರದ್ವಾಜ್ (3 ಟ್ಯಾಕಲ್ ಪಾಯಿಂಟ್ಸ್)
ಬೆಂಗಳೂರು ಬುಲ್ಸ್
ಅತ್ಯುತ್ತಮ ರೈಡರ್ - ಭರತ್ (12 ರೇಡ್ ಅಂಕಗಳು)
ಅತ್ಯುತ್ತಮ ಡಿಫೆಂಡರ್ - ಅಮನ್ (3 ಟ್ಯಾಕಲ್ ಪಾಯಿಂಟ್ಸ್ )
ಇಂದಿನ ಪಂದ್ಯಗಳು
- ಇಂದು ಎರಡು ಪಂದ್ಯಗಳಿದ್ದು, ಮೊದಲ ಪಂದ್ಯ ಬೆಂಗಳೂರು ಬುಲ್ಸ್ ಮತ್ತು ಹರಿಯಾಣ ಸ್ಟೀಲರ್ಸ್ ನಡುವೆ ನಡೆಯಲಿದೆ. 8 ಗಂಟೆಗೆ ಪಂದ್ಯ ಆರಂಭಗೊಳ್ಳಲಿದೆ.
- ಎರಡನೇ ಪಂದ್ಯ ಯುಪಿ ಯೋಧಾಸ್ ಮತ್ತು ತೆಲುಗು ಟೈಟಾನ್ಸ್ ನಡುವೆ ನಡೆಯಲಿದೆ. 9 ಗಂಟೆಗೆ ಪಂದ್ಯ ಆರಂಭ.
ಸ್ಥಳ: ಶ್ರೀ ಕಂಠೀರವ ಮೈದಾನ, ಬೆಂಗಳೂರು
ವೀಕ್ಷಣೆ: ಪ್ರೊ ಕಬಡ್ಡಿ ಸೀಸನ್ 10ರ ಪಂದ್ಯಗಳನ್ನು ಸ್ಟಾರ್ ಸ್ಪೋರ್ಟ್ಸ್ ನೆಟ್‌ವರ್ಕ್‌ ಮತ್ತ ಡಿಸ್ನಿ+ಹಾಟ್‌ಸ್ಟಾರ್ ಮೊಬೈಲ್ ಅಪ್ಲಿಕೇಶನ್‌ನಲ್ಲಿ ವೀಕ್ಷಿಸಬಹುದಾಗಿದೆ.
ಇದನ್ನೂ ಓದಿ: ಇಂಗ್ಲೆಂಡ್‌ ವಿರುದ್ಧ 2ನೇ ಟಿ20: ಸರಣಿ ಜೀವಂತ ಉಳಿಸಿಕೊಳ್ಳುವುದೇ ಹರ್ಮನ್ಪ್ರೀತ್ ಪಡೆ?
