ಹೈದರಾಬಾದ್: 7ನೇ ಆವೃತ್ತಿಯ ಪ್ರೊ ಕಬಡ್ಡಿ ಲೀಗ್‌ನಲ್ಲಿ ಹಾಲಿ ಚಾಂಪಿಯನ್ ಬೆಂಗಳೂರು ಬುಲ್ಸ್ ತಂಡ ತನ್ನ ಮೊದಲ ಪಂದ್ಯದಲ್ಲಿ ಪಾಟ್ನಾ ಪೈರೇಟ್ಸ್ ವಿರುದ್ಧ 34-32 ಅಂತರದಲ್ಲಿ ರೋಚಕ ಗೆಲುವು ದಾಖಲು ಮಾಡಿದೆ.
ಹೈದರಾಬಾದ್‌ನ ಗಚಿಬೌಲಿ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಉಭಯ ತಂಡಗಳು ಆರಂಭದಿಂದಲೇ ಆಕ್ರಮಣ ಹಾಗೂ ರಕ್ಷಣಾತ್ಮಕವಾಗಿ ಆಟಕ್ಕೆ ಮೊರೆ ಹೋದವು.
ಬುಲ್ಸ್ ತಂಡ 18-22 ಅಂಕಗಳಿಂದ ಹಿನ್ನಡೆ ಅನುಭವಿಸಿ ಸೋಲಿನ ಸುಳಿಗೆ ಸಿಲುಕಿಕೊಂಡಿತ್ತು. ಆದರೆ ಪವನ್, ಮಹೇಂದ್ರ ಸಿಂಗ್ ಉತ್ತಮವಾಗಿ ಆಡಿ ತಂಡಕ್ಕೆ ಅಂಕ ತಂದುಕೊಟ್ಟರು.
ಒಂದು ಹಂತದಲ್ಲಿ ಉಭಯ ತಂಡ 24-24 ಅಂಕಗಳಿಂದ ಸಮಬಲ ಸಾಧಿಸಿದ್ದವು. ಆದರೆ ಈ ವೇಳೆ ಬುಲ್ಸ್ ತಂಡದ ಆಟಗಾರರು ಅದ್ಭುತ ಪ್ರದರ್ಶನದ ಮೂಲಕ ಮುನ್ನಡೆ ಪಡೆದುಕೊಂಡರು. ಇದಾದ ಬಳಿಕ ಪಾಟ್ನಾ ಅಂಕಗಳಿಕೆ ಮಾಡಲು ವಿಫಲಗೊಂಡಿತು. ಹೀಗಾಗಿ ಬುಲ್ಸ್ ತನ್ನ ಆಟ ಮುಂದುವರಿಸಿ ಗೆಲುವು ದಾಖಲು ಮಾಡಿದೆ.
ಪವನ್ ಕುಮಾರ್ 9 ಅಂಕ, ಅಮಿತ್ ಶಿರೋನ್ 5, ಸುಮಿತ್ ಸಿಂಗ್ 4, ಆಶೀಷ್ ಸಿಂಗ್ 4. ಮಹೇಂದ್ರ ಸಿಂಗ್ 4, ರೋಹಿತ್ ಕುಮಾರ್ 4, ಬಂಟಿ 2 ಅಂಕ ಸಂಪಾದಿಸಿದರು.
ಪಾಟ್ನಾ ಪರ ಪರ್ದೀಪ್ ನರ್ವಾಲ್ 10,ಮೊಹಮ್ಮದ್ ಇಸ್ಮಾಯಿಲ್ 9, ವಿಕಾಸ್ ಜಗ್ಲಾನ್ 3, ನೀರಜ್ ಕುಮಾರ್ 2, ಹದಿ ಒಸ್ತೊರಾಕ್ 3, ಜಾನ್ ಕುಂಗ್ ಲೀ 1, ಜೈದೀಪ್ 1 ಅಂಕ ಪಡೆದುಕೊಂಡರು.
