ಹೈದರಾಬಾದ್: ಕೊರೊನಾ ನಡುವೆ ಉತ್ತಮ ಆರಂಭ ಪಡೆದಿರುವ ಇಂಡಿಯನ್ ಸೂಪರ್ ಲೀಗ್ ಸೀಸನ್ 7 ಲೀಗ್ ಹಂತದ ಪಂದ್ಯಾವಳಿಗಳು ನಡೆಯುತ್ತಿವೆ. ಎಟಿಕೆ ಮೋಹನ್ ಬಗಾನ್ ತಂಡ ಉತ್ತಮ ಲಯದಲ್ಲಿದ್ದರೆ. ಇತ್ತ ಬೆಂಗಳೂರು ಎಫ್ಸಿ-ಗೋವಾ ಎಫ್ಸಿ ನಡುವಿನ ಪಂದ್ಯ ಡ್ರಾದಲ್ಲಿ ಅಂತ್ಯ ಕಂಡಿದೆ.
ಈ ಬಾರಿಯ ಸೀಸನ್ನಲ್ಲಿ ಹೈದರಾಬಾದ್ ಎಫ್ಸಿ ಇಂದು ತನ್ನ ಮೊದಲ ಪಂದ್ಯವನ್ನು ಒಡಿಶಾ ಎಫ್ಸಿ ವಿರುದ್ಧ ಆಡಲಿದೆ. ಆದರೆ, ಕಳೆದ ಸೀಸನ್ನಲ್ಲಿ ಹೈದರಾಬಾದ್ ತಂಡ ಉತ್ತಮ ಪ್ರದರ್ಶನ ನೀಡುವಲ್ಲಿ ವಿಫಲವಾಗಿತ್ತು. ಆಡಿದ 18 ಪಂದ್ಯಗಳಲ್ಲಿ ಕೇವಲ ಎರಡು ಪಂದ್ಯ ಗೆದ್ದು, 10 ಅಂಕಗಳಿಸುವಲ್ಲಿ ಮಾತ್ರ ಯಶಸ್ವಿಯಾಗಿತ್ತು.
ಕಳೆದ ಸೀಸನ್ನಲ್ಲಿ ಪಿಲ್ ಬ್ರೌನ್ ಕೋಚ್ ಆಗಿ ಹಾಗೂ ಮಧ್ಯಂತರ ಕೋಚ್ ಆಗಿ ಬೆಂಗಳೂರು ಎಫ್ಸಿಯ ಮಾಜಿ ಮ್ಯಾನೇಜರ್ ಆಲ್ಬರ್ಟ್ ರೋಕಾ ನೇಮಕವಾಗಿದ್ದರು.
ಬಳಿಕ ರೋಕಾ ಬಾರ್ಸಿಲೋನಾ ಪರ ಫಿಟ್ನೆಸ್ ಕೋಚ್ ಆಗಿ ನೇಮಕ ಹೊಂದಿದ ಕಾರಣ ಹೈದರಾಬಾದ್ ಎಫ್ಸಿ ತೊರೆದಿದ್ದರು. ಇದೆಲ್ಲದರ ನಡುವೆ ಹೈದರಾಬಾದ್ ಕೋಚ್ ಹುಡುಕಾಟ ನಡೆಸಿ ಮ್ಯಾನುಯೆಲ್ ಮಾರ್ಕ್ವೆಜ್ ರೋಕಾ ಅವರನ್ನು ಕೋಚ್ ಆಗಿ ನೇಮಿಸಿದೆ.
ಮನೋಲೋ ಮಾರ್ಕ್ವೆಜ್ ಎಂದು ಜನಪ್ರಿಯವಾಗಿ ಕರೆಯಲ್ಪಡುವ ಮ್ಯಾನುಯೆಲ್ ಮಾರ್ಕ್ವೆಜ್ ರೋಕಾ, ಸ್ಪೇನ್, ಕ್ರೊಯೇಷಿಯಾ ಮತ್ತು ಥಾಯ್ಲೆಂಡ್‌ನ ಉನ್ನತ ವಿಭಾಗದ ಫುಟ್ಬಾಲ್ ಕ್ಲಬ್‌ಗಳನ್ನು ನಿರ್ವಹಿಸಿದ ಅನುಭವ ಹೊಂದಿದ್ದಾರೆ.
ಇದೀಗ ಟೀಂ ಕುರಿತು ಈಟಿವಿ ಭಾರತ ಜೊತೆ ಮಾತನಾಡಿರುವ ಕೋಚ್ ಮಾಕ್ವೆರ್ಜ್, ನಾವು ಹೆಚ್ಚಿನ ಯುವ ಆಟಗಾರರನ್ನು ಹೊಂದಿದ್ದೇವೆ. ರೋಹಿತ್ ದಾನು, ಆಕಾಶ್ ಮಿಶ್ರಾ, ಬಿಯಾಕ, ಓಪಿ, ಫರ್ನಾಂಡಿಸ್ಗಳಂತ ಆಡಗಾರರು ಮುಂದೆ ತಂಡದ ಸ್ಟಾರ್ ಪ್ಲೇಯರ್ಸ್ ಆಗಲಿದ್ದಾರೆ. ಇವರೆಲ್ಲ ತಂಡಕ್ಕೆ ಹೊಸ ಚೈತನ್ಯ ತುಂಬಲಿದ್ದಾರೆ ಎಂದಿದ್ದಾರೆ.
ನಮಗೆ ಮೊದಲ ಪಂದ್ಯವೆ ಮುಖ್ಯ ಎನಿಸಿದೆ, ಟೂರ್ನಿಯಲ್ಲಿ ಗೆಲುವಿನಿಂದ ಆರಂಭ ಪಡೆದರೆ ಉತ್ತಮ. ಇಂದಿನ ಪಂದ್ಯದಲ್ಲಿ ಉತ್ತಮ ಪ್ರದರ್ಶನ ತೋರಲಿದ್ದೇವೆ. ತಂಡ ಸಹ ಸಂಪೂರ್ಣ ಸಜ್ಜಾಗಿದೆ. ಇಷ್ಟೇ ಅಲ್ಲದೆ ಭಾರತೀಯ ಫುಟ್ಬಾಲ್ ಆಟಗಾರರಿಗೆ ಉತ್ತಮ ಭವಿಷ್ಯವಿದೆ ಎಂದಿದ್ದಾರೆ.
ಭಾರತದ ಕೆಲವು ಹಿರಿಯ ಆಟಗಾರರ ಕಠಿಣ ಪರಿಶ್ರಮವನ್ನು ನೋಡಿ ನನಗೆ ಆಶ್ಚರ್ಯವಾಗಿದೆ. ಅವರು ಉತ್ತಮ ಆಟಗಾರರು. ನನ್ನ ಪ್ರಕಾರ, ಭಾರತದ ಕಿರಿಯ ಆಟಗಾರರಿಗೆ ಉತ್ತಮ ಭವಿಷ್ಯವಿದೆ ಎಂದಿದ್ದಾರೆ.
