ದುಬೈ: ಕ್ರಿಕೆಟ್ ಆಡುವ ಕುಟುಬದಲ್ಲಿ ಹುಟ್ಟಿ, ಚಿಕ್ಕಂದಿನಿಂದಲೇ ಕ್ರಿಕೆಟ್ ನೋಡಿ, ಆಡಿ ಬೆಳೆದು, ಆಸ್ಟ್ರೇಲಿಯಾ ಕ್ರಿಕೆಟ್ನಲ್ಲಿ(Australia cricket) ದೊಡ್ಡ ಹೆಸರು ಗಳಿಸಿದ್ದ ಕುಟುಂಬದಿಂದ ಬಂದಿದ್ದ ಮಿಚಲ್ ಮಾರ್ಷ್(Mitchell marsh) ತಮ್ಮ ಪ್ರಸಿದ್ಧತೆಗೆ, ಪ್ರತಿಭೆಗೆ ತಕ್ಕಂತೆ ಆಡುವಲ್ಲಿ ವಿಫಲರಾಗಿದ್ದರು. ತಮ್ಮನ್ನು ಆಸ್ಟ್ರೇಲಿಯಾದ ಬಹುತೇಕ ಅಭಿಮಾನಿಗಳು ದ್ವೇಷಿಸುತ್ತಾರೆ ಎಂದು 2019ರ ಆ್ಯಷಸ್ ಸರಣಿಯ ವೇಳೆ ತಾವೇ ಹೇಳಿಕೊಂಡಿದ್ದರು.
"ಆಸ್ಟ್ರೇಲಿಯಾದಲ್ಲಿ ಸಾಕಷ್ಟು ಜನರು ಕ್ರಿಕೆಟ್ ಆಟವನ್ನು ಪ್ರೀತಿಸುತ್ತಾರೆ. ಅವರು ಈ ಆಟಕ್ಕೆ ಸಾಕಷ್ಟು ಉತ್ಸಾಹ ತೋರುತ್ತಾರೆ. ಆದರೆ ನಾನು ಅವರ ನಿರೀಕ್ಷೆಗೆ ತಕ್ಕಂತೆ ಆಡುವಲ್ಲಿ ವಿಫಲನಾಗಿದ್ದೇನೆ. ನಾನೊಬ್ಬ ಅಪರಿಮಿತ ಸಾಮರ್ಥ್ಯವುಳ್ಳ ಅತೃಪ್ತ ಪ್ರತಿಭೆ ಎಂದು ಒಪ್ಪಿಕೊಳ್ಳುತ್ತೇನೆ, ಆದರೆ ಒಂದಲ್ಲಾ ಒಂದು ದಿನ ಅವರಿಗಾಗಿ ಟ್ರೋಫಿ ಗೆದ್ದುಕೊಡುತ್ತೇನೆ" ಎಂದು 2019ರ ಆ್ಯಷಸ್ ಸರಣಿಯ ವೇಳೆ ಹೇಳಿಕೊಂಡಿದ್ದರು.
2019ರಲ್ಲಿ ಆಸ್ಟ್ರೇಲಿಯಾ ಟೆಸ್ಟ್ ತಂಡದ(Australia test team) ಉಪನಾಯಕನಾಗಿದ್ದ ಮಿಚ್ ಮಾರ್ಷ್ ಅದೇ ವರ್ಷ ಕ್ರಿಕೆಟ್ ಆಸ್ಟ್ರೇಲಿಯಾ ಘೋಷಿಸಿದ ಕೇಂದ್ರ ಗುತ್ತಿಗೆಯಿಂದ ಹೊರಬಿದ್ದಿದ್ದರು. ಅವರ ವೃತ್ತಿ ಬದುಕು ಸಾಕಷ್ಟು ಏಳು ಬೀಳುಗಳಿಂದ ಕೂಡಿದ್ದು, ಗಾಯ ಕೂಡ ಅವರ ಸ್ಥಿರತೆಗೆ ತೊಂದರೆಯನ್ನುಂಟು ಮಾಡಿತ್ತು. 2020ರಲ್ಲಿ ಆಸ್ಟ್ರೇಲಿಯಾ ತಂಡದಿಂದ ಹೊರಬಿದ್ದಿದ್ದರು. ಆಗ ಅವರ ಟಿ20 ಸರಾಸರಿ 23.45, ಆದರೆ 2021ರಲ್ಲಿ ಫಿನಿಕ್ಸ್ ಪಕ್ಷಿಯಂತೆ ಎದ್ದು ಬಂದ ಅವರು, 21 ಪಂದ್ಯಗಳಿಂದ 36.88ರ ಸರಾಸರಿಯಲ್ಲಿ 627 ರನ್ಗಳಿಸಿ ಆಸ್ಟ್ರೇಲಿಯಾ ತಂಡದಲ್ಲಿ ಖಾಯಂ ಸ್ಥಾನ ಗಿಟ್ಟಿಸಿಕೊಂಡರು.
ಮಾರ್ಷ್ ತಮ್ಮ ವೃತ್ತಿ ಜೀವನದಲ್ಲಿ ಬಹುಪಾಲು ಕೆಳಕ್ರಮಾಂಕದಲ್ಲೇ ಆಡಿದರು. ಕೆಲವು ಪಂದ್ಯಗಳಲ್ಲಿ ಸ್ಪಿನ್ನರ್ ಆಶ್ಟನ್ ಅಗರ್ ಅವರಿಗಿಂತ ಕೆಳ ಕ್ರಮಾಂಕದಲ್ಲೂ ಬ್ಯಾಟಿಂಗ್ ಮಾಡಿದ್ದರೆಂದರೆ ಆಶ್ಚರ್ಯ ಪಡಬೇಕಾಗಿಲ್ಲ. ಆದರೆ ವೆಸ್ಟ್ ಇಂಡೀಸ್ ಮತ್ತು ಬಾಂಗ್ಲಾದೇಶ ಸರಣಿಗಳಲ್ಲಿ ಅವರು 3ನೇ ಕ್ರಮಾಂಕದಲ್ಲಿ ನೀಡಿದ ಆಕರ್ಷಕ ಪ್ರದರ್ಶನ ಎಲ್ಲರ ಗಮನ ಸೆಳೆದಿತ್ತು. ಅವರ ಪ್ರದರ್ಶನ ಎಷ್ಟರ ಮಟ್ಟಿಗಿತ್ತೆಂದರೆ ಶೇನ್ ವಾರ್ನ್ ಅಂತಹ ದಿಗ್ಗಜನೇ ಸ್ಟಾರ್ ಬ್ಯಾಟರ್ ಸ್ಮಿತ್ಗಿಂತ ಆ ಸ್ಥಾನಕ್ಕೆ ಮಾರ್ಷ್ ಸೂಕ್ತ ಎಂದು ಬಹಿರಂಗವಾಗಿ ಹೇಳಿದರು.
ನಂತರ ತಂಡದ ಸಹ ಆಟಗಾರ ಮ್ಯಾಕ್ಸ್ವೆಲ್ ಕೂಡ "ಈ ಟೂರ್ನಮೆಂಟ್ನಲ್ಲಿ ಮಾರ್ಷ್ ಉತ್ತಮ ಪ್ರದರ್ಶನ ಹೊಂದಲಿದ್ದಾರೆ, ಅವರಂತೆ ಚೆಂಡನ್ನು ಉತ್ತಮವಾಗಿ ದಂಡಿಸುವ ಬೇರೊಬ್ಬ ಉತ್ತಮ ಬ್ಯಾಟರ್ ನಾನು ನೋಡಿಲ್ಲ. ನಾವೆಲ್ಲಾ ಅವರು ನೆಟ್ಸ್ನಲ್ಲಿ ಅಭ್ಯಾಸ ಮಾಡುವಾಗಿ ಅಲ್ಲಿ ಸೇರಿ ಅವರು ಚೆಂಡನ್ನು ದಂಡಿಸುವುದನ್ನ ನೋಡುತ್ತೇವೆ, ಅದ ತುಂಬಾ ಅದ್ಭುತವಾಗಿರುತ್ತದೆ " ಎಂದಿದ್ದ ಅವರು, ಒಂದು ವೇಳೆ ಮಾರ್ಷ್ ಉತ್ತಮ ಟೂರ್ನಿಯನ್ನು ಹೊಂದದಿದ್ದರೆ ನಾನು ಖಂಡಿತ ಆಶ್ಚರ್ಯಕ್ಕೊಳಗಾಗುತ್ತೇನೆ ಎಂದು ಸ್ಟಾರ್ ಆಲ್ರೌಂಡರ್ ಟೂರ್ನಿಗೆ ಮೊದಲೇ ಹೇಳಿದ್ದರು. ಇದೀಗ ಅವರ ಅಭಿಪ್ರಾಯವನ್ನು ಮಾರ್ಷ್ ಅಕ್ಷರಶಃ ಸತ್ಯ ಮಾಡಿ ತೋರಿಸಿದ್ದಾರೆ. ಮ್ಯಾಕ್ಸಿ ಹೇಳಿದಂತೆ ಮಾರ್ಷ್ ಫೈನಲ್ ಪಂದ್ಯದಲ್ಲಿ ಸಿಡಿಸಿದ ಒಂದೊಂದು ಸಿಕ್ಸರ್ಗಳು ಅದ್ಬುತವಾಗಿದ್ದವು ಎನ್ನುವುದು ಕೂಡ ಸತ್ಯ.
ನನ್ನ ಪ್ರದರ್ಶನ ಅತ್ಯುತ್ತಮವಾಗಿಲ್ಲ ಅದಕ್ಕೆ ನನ್ನನ್ನು ನನ್ನ ದೇಶದ ಜನರು ಪ್ರೀತಿಸುವುದಿಲ್ಲ ಎಂದಿದ್ದ ಆಲ್ರೌಂಡರ್ ಕಿವೀಸ್ ವಿರುದ್ಧ ಅಜೇಯ 77 ರನ್ ಸಿಡಿಸುವ ಮೂಲಕ ಅದೇ ದೇಶದ ಕ್ರಿಕೆಟ್ ಅಭಿಮಾನಿಗಳಿಂದ ಪ್ರೀತಿಯನ್ನು ಗಳಿಸಿಕೊಂಡಿದ್ದಾರೆ. 14 ವರ್ಷಗಳಿಂದ ಕನಸಾಗಿದ್ದ ಟಿ20 ವಿಶ್ವಕಪ್ (T20I world cup) ದೇಶಕ್ಕೆ ಸಲ್ಲುವಲ್ಲಿ ಪ್ರಮುಖ ಪಾತ್ರವಹಿಸಿದ್ದಾರೆ. ಜೊತೆಗೆ ಕ್ರಿಕೆಟ್ನಲ್ಲಿ ಆಸ್ಟ್ರೇಲಿಯಾದ ತಾಕತ್ತು ಅಷ್ಟು ಬೇಗ ಕ್ಷೀಣಿಸುವುದಿಲ್ಲ, ಬಿದ್ದರೂ ಹೇಗೆ ಹೇಳಬೇಕೆಂದು ತಮ್ಮ ತಂಡಕ್ಕೆ ತಿಳಿದಿದೆ ಎನ್ನುವುದನ್ನ ತೋರಿಸಿಕೊಟ್ಟಿದ್ದಾರೆ.
ಟಿ20 ವಿಶ್ವಕಪ್ಗೂ ಮುನ್ನ ಆಸ್ಟ್ರೇಲಿಯಾ ವೆಸ್ಟ್ ಇಂಡೀಸ್ ವಿರುದ್ಧ 4-1 ಮತ್ತು ಬಾಂಗ್ಲಾದೇಶ ವಿರುದ್ಧ 4-1ರಲ್ಲಿ ಟಿ20 ಸರಣಿಯನ್ನು ಕಳೆದುಕೊಂಡಿತ್ತು. ಹಾಗಾಗಿ ಯಾರೊಬ್ಬರು ಆಸ್ಟ್ರೇಲಿಯಾ ಸ್ಪಿನ್ ಸ್ನೇಹಿ ಯುಎಇಯಲ್ಲಿ ವಿಶ್ವಕಪ್ ಗೆಲ್ಲುವ ತಂಡ ಎಂದು ಭಾವಿಸಿರಲಿಲ್ಲ. ಆದರೆ ಕಾಂಗರೂ ಪಡೆ form is temporary class is permanent' ಎಂದು ತೋರಿಸಿಕೊಟ್ಟಿದೆ.
ಇದನ್ನು ಓದಿ:11 ಬಾರಿ ಐಸಿಸಿ ಟೂರ್ನಿಯಲ್ಲಿ ಫೈನಲ್ ಪ್ರವೇಶಿಸಿ , 8ನೇ ಟ್ರೋಪಿ ಗೆದ್ದ ಆಸ್ಟ್ರೇಲಿಯಾ
