ಫ್ಲೋರಿಡಾ (ಅಮೆರಿಕ): ಇಲ್ಲಿನ ಬ್ರೋವರ್ಡ್ ರೀಜನಲ್ ಪಾರ್ಕ್ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಭಾರತ ಮತ್ತು ವೆಸ್ಟ್ ಇಂಡೀಸ್ ನಡುವಣ ಐದನೇ ಟಿ20 ಪಂದ್ಯದಲ್ಲಿ ಟಾಸ್ ಗೆದ್ದು ಬ್ಯಾಟಿಂಗ್ ಮಾಡಿದ ಭಾರತ ತಂಡ 9 ವಿಕೆಟ್ ನಷ್ಟಕ್ಕೆ 165 ರನ್ ಗಳಿಸಿತು. ಈ ಮೂಲಕ ವೆಸ್ಟ್ ಇಂಡೀಸ್ ತಂಡಕ್ಕೆ 166 ರನ್‌ಗಳ ಗುರಿ ನೀಡಿದೆ.
ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ಭಾರತಕ್ಕೆ ಆರಂಭಿಕ ಆಘಾತ ಎದುರಾಯಿತು. ಹಿಂದಿನ ಪಂದ್ಯದಲ್ಲಿ ಭರ್ಜರಿ ಬ್ಯಾಟಿಂಗ್ ನಡೆಸಿದ್ದ ಯಶಸ್ವಿ ಜೈಸ್ವಾಲ್ ಮತ್ತು ಶುಭ್ಮನ್ ಗಿಲ್ ಉತ್ತಮ ಇನ್ನಿಂಗ್ಸ್ ಕಟ್ಟುವಲ್ಲಿ ವಿಫರಾದರು. ಜೈಸ್ವಾಲ್ 5 ರನ್ ಗಳಿಸಿದರೆ ಅಕೀಲ್ ಹುಸೇನ್ಗೆ ವಿಕೆಟ್ ಒಪ್ಪಿಸಿದರೆ, ಶುಭ್ಮನ್ ಗಿಲ್ ಕೂಡ 9 ರನ್ ಗಳಿಸಿ ಅಕೀಲ್ ಹುಸೇನ್ ಎಸೆತದಲ್ಲಿ ಎಲ್ವಿ ಬಲೆಗೆ ಬಿದ್ದರು.
ಬಳಿಕ ಬಂದ ಸ್ಪೋಟಕ ಬ್ಯಾಟ್ಸ್ಮನ್ ಸೂರ್ಯ ಕುಮಾರ್ ಯಾದವ್ ಅರ್ಧಶತಕ ಗಳಿಸಿ ಭಾರತ ತಂಡಕ್ಕೆ ಆಸರೆಯಾದರು. ಸೂರ್ಯ ಕುಮಾರ್ 3 ಸಿಕ್ಸರ್, 4 ಬೌಂಡರಿ ನೆರವಿನಿಂದ 61 ರನ್ ಗಳಿಸಿದ್ದಾಗ ಜೇಸನ್ ಹೋಲ್ಡರ್ ಎಸೆತದಲ್ಲಿ ಎಲ್ಬಿಗೆ ಬಲಿಯಾದರು. ಬಳಿಕ ಬಂದ ತಿಲಕ್ ವರ್ಮಾ 2 ಸಿಕ್ಸರ್, 3 ಬೌಂಡರಿಯೊಂದಿಗೆ 27 ರನ್ ಗಳಿಸಿ ಔಟಾದರು. ನಂತರ ಬಂದ ಸಂಜು ಸಾಮ್ಸನ್ 13 ರನ್, ನಾಯಕ ಹಾರ್ದಿಕ್ ಪಾಂಡ್ಯ 14 ರನ್, ಅಕ್ಷರ್ ಪಟೇಲ್ 13 ರನ್, ಅರ್ಷದೀಪ್ ಸಿಂಗ್ 8 ರನ್, ಮುಕೇಶ್ ಕುಮಾರ್ 4 ರನ್ ಗಳಿಸಿದರು. ಅಂತಿಮವಾಗಿ ಭಾರತ ತಂಡ 9 ವಿಕೆಟ್ ನಷ್ಟಕ್ಕೆ 165 ರನ್ ಗಳಿಸಲಷ್ಟೇ ಶಕ್ತವಾಯಿತು.
ವೆಸ್ಟ್ ಇಂಡೀಸ್ ಪರ, ರೊಮಾರಿಯೋ ಶೆಫರ್ಡ್ 31/ 4 ವಿಕೆಟ್ ಪಡೆದು ಮಿಂಚಿದರೆ, ಅಕೀಲ್ ಹುಸೇನ್ 24/2, ಜೇಸನ್ ಹೋಲ್ಡರ್ 36/2, ರೋಸ್ಟನ್ ಚೇಸ್ 1 ವಿಕೆಟ್ ಪಡೆದರು. ಈ ಮೊತ್ತವನ್ನು ಬೆನ್ನತ್ತಿರುವ ವೆಸ್ಟ್ ಇಂಡೀಸ್ ಪಡೆ, ಎರಡನೇ ಓವರ್ನಲ್ಲಿ ಕೈಲ್ ಮೇಯರ್ಸ್ (10) ವಿಕೆಟ್ ಕಳೆದುಕೊಂಡರೂ, ಅಬ್ಬರ ಆಟ ಮುಂದುವರೆಸಿದೆ. ಬ್ರಾಂಡನ್ ಕಿಂಗ್ 30 ರನ್ ಗಳಿಸಿದ್ದು, ನಿಕೊಲಸ್ ಪೂರನ್ 27 ರನ್ ಗಳಿಸಿ ಆಟ ಮುಂದುವರೆಸಿದ್ದಾರೆ. 7 ಓವರ್ ಅಂತ್ಯಕ್ಕೆ ವೆಸ್ಟ್ ಇಂಡೀಸ್ 71 ರನ್ಗೆ 1 ವಿಕೆಟ್ ಕಳೆದುಕೊಂಡಿದೆ.
ಇಂದಿನ ಪಂದ್ಯಕ್ಕೆ ಭಾರತ ಹಿಂದಿನ ತಂಡವನ್ನೇ ಕಣಕ್ಕಿಳಿಸಿದೆ. ವೆಸ್ಟ್ ಇಂಡೀಸ್ ತಂಡದಲ್ಲಿ ಒಂದು ಬದಲಾವಣೆ ಮಾಡಿಕೊಳ್ಳಲಾಗಿದೆ. ಅಲ್ಜಾರಿ ಜೋಸೆಫ್ ಅವರನ್ನು ತಂಡಕ್ಕೆ ಸೇರಿಸಿಕೊಂಡಿದ್ದು ಮೆಕಾಯ್‌ಗೆ ವಿಶ್ರಾಂತಿ ನೀಡಲಾಗಿದೆ.
ನಿನ್ನೆ ನಾಲ್ಕನೇ ಪಂದ್ಯ ನಡೆದ ಪಿಚ್ನಲ್ಲೇ ಈ ಪಂದ್ಯವೂ ನಡೆಯುತ್ತಿದೆ. ಪಿಚ್ ವರದಿ ಪ್ರಕಾರ, ಮೊದಲು ಬ್ಯಾಟಿಂಗ್ ಮಾಡುವ ತಂಡ ಗೆಲ್ಲುವ ಸಾಧ್ಯತೆ ಹೆಚ್ಚು. ಆದರೆ ನಿನ್ನೆ ಟೀಂ ಇಂಡಿಯಾ ಈ ಲೆಕ್ಕಾಚಾರವನ್ನು ಉಲ್ಟಾ ಮಾಡಿತ್ತು. ಈ ಪಿಚ್ನಲ್ಲಿ ದೊಡ್ಡ ಮೊತ್ತವನ್ನು ಎರಡನೇ ಇನ್ನಿಂಗ್ಸ್ನಲ್ಲಿ ಚೇಸ್ ಮಾಡಬಹುದು ಎಂಬುದನ್ನು ಬ್ಲೂ ಬಾಯ್ಸ್ ಪ್ರೂವ್ ಮಾಡಿದ್ದಾರೆ.
ಭಾರತದ ಟಾಪ್ ಐದು ಬ್ಯಾಟರ್ಗಳು ಫಾರ್ಮ್ನಲ್ಲಿದ್ದು, ಸ್ಪಿನ್ ವಿಭಾಗವೂ ವೆಸ್ಟ್ ಇಂಡೀಸ್ ತಂಡವನ್ನು ಕಟ್ಟಿ ಹಾಕುವಲ್ಲಿ ಯಶಸ್ವಿಯಾಗುತ್ತಿದೆ. ಡೆತ್ ಓವರ್ಗಳಲ್ಲಿ ಮುಖೇಶ್ ಕುಮಾರ್ ವಿಕೆಟ್ ಪಡೆಯುವುದರ ಜೊತೆಗೆ ರನ್ ಗಳಿಕೆಗೆ ಕಡಿವಾಣ ಹಾಕುತ್ತಿದ್ದಾರೆ.
ಮೊದಲು ಬ್ಯಾಟಿಂಗ್ಗೆ ಇಳಿಯುತ್ತಿರುವ ಭಾರತ ದೊಡ್ಡ ಗುರಿ ನೀಡುವ ಲೆಕ್ಕಾಚಾರದಲ್ಲಿದೆ ಎಂದು ಹಾರ್ದಿಕ್ ತಿಳಿಸಿದ್ದಾರೆ. ಕಳೆದ ಪಂದ್ಯದ ಸೋಲಿಗೆ ಬೌಲರ್ಗಳು ಕಾರಣ ಎಂದಿದ್ದ ಪೊವೆಲ್, ಒಂದು ಬದಲಾವಣೆಯೊಂದಿಗೆ ಭಾರತವನ್ನು ಮಣಿಸುವ ಯೋಚನೆಯಲ್ಲಿದ್ದಾರೆ.
ಇದನ್ನೂ ಓದಿ: Fourth T20: ಗಿಲ್, ಯಶಸ್ವಿ ಬ್ಯಾಟಿಂಗ್ಗೆ ಮಂಡಿಯೂರಿದ ವಿಂಡೀಸ್.. ಭಾರತಕ್ಕೆ 9 ವಿಕೆಟ್ ಜಯ, ಇಂದು ಸರಣಿ ಕ್ಲೈಮ್ಯಾಕ್ಸ್
