ನವದೆಹಲಿ: ನಾಯಕತ್ವ ತ್ಯಜಿಸಿರುವ ವಿರಾಟ್ ಕೊಹ್ಲಿ ಇತ್ತೀಚಿನ ದಿನಗಳಲ್ಲಿ ಒತ್ತಡರಹಿತರಾಗಿ ಕಾಣುತ್ತಿದ್ದಾರೆ. ಇದು ಮುಂಬರುವ ಐಪಿಎಲ್ನಲ್ಲಿ ಎದುರಾಳಿ ತಂಡಗಳಿಗೆ ಅಪಾಯಕಾರಿಯಾಗುವ ಸಂಕೇತ ಎಂದು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಆಲ್ರೌಂಡರ್ ಗ್ಲೇನ್ ಮ್ಯಾಕ್ಸ್ವೆಲ್ ಅಭಿಪ್ರಾಯಪಟ್ಟಿದ್ದಾರೆ.
ಕಳೆದ ಐಪಿಎಲ್ ಆವೃತ್ತಿ ಮುಗಿಯುತ್ತಿದ್ದಂತೆ ವಿರಾಟ್ ಕೊಹ್ಲಿ ಆರ್ಸಿಬಿ ನಾಯಕತ್ವ ತ್ಯಜಿಸಿದ್ದರು. ನಂತರ ಟಿ20 ನಾಯಕತ್ವದಿಂದ ತಾವಾಗಿಯೇ ಕೆಳಗಿಳಿದರೆ, ಏಕದಿನ ಕ್ಯಾಪ್ಟನ್ಸಿಯಿಂದ ಬಿಸಿಸಿಐ ತೆಗೆದು ಹಾಕಿತ್ತು. ಇದರ ಬೆನ್ನಲ್ಲೆ ಜನವರಿಯಲ್ಲಿ ಟೆಸ್ಟ್ ನಾಯಕತ್ವದಿಂದಲೂ ಹೊರಬಂದರು.
"ನಾಯಕತ್ವವನ್ನು ಹಸ್ತಾಂತರಿಸಿದ್ದೇನೆ ಎಂಬುದು ಕೊಹ್ಲಿಗೆ ತಿಳಿದಿದೆ, ಅದು ಅವರಿಗೆ ದೊಡ್ಡ ಹೊರೆಯಾಗಿತ್ತು ಎಂದು ನಾನು ಭಾವಿಸುತ್ತೇನೆ. ಅಲ್ಲದೆ ಸ್ವಲ್ಪ ಸಮಯದವರೆಗೆ ಅವರ ಪ್ರದರ್ಶನ ಮಟ್ಟ ಕುಸಿಯಲು ಕೂಡಾ ಕಾರಣವಾಗಿತ್ತು. ಈಗ ಅವರು ನಾಯಕತ್ವ ತ್ಯಜಿಸಿ ಒತ್ತಡ ಮುಕ್ತರಾಗಿದ್ದಾರೆ. ಇದು ವಿರೋಧಿ ಬಳಗಕ್ಕೆ ಅಪಾಯಕಾರಿ ಮುನ್ಸೂಚನೆಯಾಗಿದೆ" ಎಂದು ಮ್ಯಾಕ್ಸ್ವೆಲ್ RCB ಪಾಡ್ಕಾಸ್ಟ್‌ನಲ್ಲಿ ತಿಳಿಸಿದ್ದಾರೆ.
ಕೊಹ್ಲಿ ಆಟ ಆನಂದಿಸುವ ಸಮಯ: ನಾಯಕತ್ವ ಮುಕ್ತರಾಗಿರುವುದು ಕೊಹ್ಲಿಗೆ ಸ್ವಲ್ಪ ಆರಾಮ ಪಡೆದುಕೊಳ್ಳಲು ಮತ್ತು ಮುಂದಿನ ಕೆಲವು ವರ್ಷಗಳ ಕಾಲ ಯಾವುದೇ ಹೆಚ್ಚುವರಿ ಒತ್ತಡವಿಲ್ಲದೆ ಆಟವನ್ನು ಆನಂದಿಸಲು ಸಿಕ್ಕಿರುವ ಅದ್ಭುತ ಅವಕಾಶ. ಹಿಂದಿನ ದಿನಗಳಲ್ಲಿ ಕೊಹ್ಲಿ ವಿರುದ್ಧ ಆಡುತ್ತಿದ್ದಾಗ ಅವರು ಸದಾ ಭಾವೋದ್ರಿಕ್ತ ಆಟಗಾರನಾಗಿರುತ್ತಿದ್ದರು. ಯಾವಾಗಲೂ ಪಂದ್ಯದಲ್ಲಿ ತೊಡಗಿಸಿಕೊಳ್ಳಲು ಮತ್ತು ಎದುರಾಳಿಯ ಮೇಲೆ ಸವಾರಿ ಮಾಡಲು ಬಯಸುತ್ತಿದ್ದರು ಎಂದು ಆಸ್ಟ್ರೇಲಿಯಾದ ಆಲ್ರೌಂಡರ್ ಹೇಳಿದ್ದಾರೆ.
ವಿರಾಟ್ ಕೊಹ್ಲಿ ಕಳೆದ ಆವೃತ್ತಿಯಿಂದ ಆರಂಭಿಕನಾಗಿ ಕಣಕ್ಕಿಳಿಯುತ್ತಿದ್ದಾರೆ. ಈ ಬಾರಿ ನಾಯಕ ಫಾಫ್ ಡು ಪ್ಲೆಸಿಸ್ ಜೊತೆಗೂಡಿ ಇನ್ನಿಂಗ್ಸ್ ಆರಂಭಿಸುವ ಸಾಧ್ಯತೆಯಿದೆ. ಒತ್ತಡ ರಹಿತರಾಗಿರುವ ಕೊಹ್ಲಿ ನೈಜ ಆಟವನ್ನು ನೋಡುವುದಕ್ಕೆ ಆರ್ಸಿಬಿ ಅಭಿಮಾನಿಗಳು ಕೂಡ ಕಾಯುತ್ತಿದ್ದಾರೆ. ಆರ್ಸಿಬಿ ಮಾರ್ಚ್ 27ರಂದು ತನ್ನ ಮೊದಲ ಪಂದ್ಯದಲ್ಲಿ ಪಂಜಾಬ್ ಕಿಂಗ್ಸ್ ವಿರುದ್ಧ ಕಣಕ್ಕಿಳಿಯಲಿದೆ.
ಇದನ್ನೂ ಓದಿ: ಐಪಿಎಲ್ ಬೆಸ್ಟ್ ಸ್ಪಿನ್ನರ್ಸ್ ಅಶ್ವಿನ್-ಚಹಲ್ ನಮ್ಮ ತಂಡದ ಬಲ: ಸಂಗಕ್ಕಾರ ಪ್ರಶಂಸೆ
