ವೆಲ್ಲಿಂಗ್ಟನ್: ವಿಶ್ವಕಪ್ ವೈಫಲ್ಯದ ಬಳಿಕ ತಂಡದ ಸುಧಾರಣೆಗೆ ಎಲ್ಲೆಡೆ ಆಗ್ರಹ ಕೇಳಿಬಂದಿದ್ದು, ಮಾಜಿ ಲೆಜೆಂಡರಿ ಆಟಗಾರ ವಿವಿಎಸ್ ಲಕ್ಷ್ಮಣ್ ಕೂಡ ಇದಕ್ಕೆ ಧ್ವನಿಗೂಡಿಸಿದ್ದಾರೆ. ಹಿರಿಯರ ಅನುಪಸ್ಥಿತಿಯಲ್ಲಿ ನಾಳೆಯಿಂದ ಶುರುವಾಗುವ ನ್ಯೂಜಿಲ್ಯಾಂಡ್ ವಿರುದ್ಧದ ಸರಣಿ ಯುವಕರ ಸತ್ವ ಪರೀಕ್ಷೆ ನಡೆಯಲಿದೆ. ಮುಂದಿನ ಟಿ 20 ವಿಶ್ವಕಪ್ಗೆ ಯುವಪಡೆ ಕಟ್ಟಬೇಕಿದೆ ಎಂದು ಹೇಳಿದ್ದಾರೆ.
ವೈಟ್ಬಾಲ್ ಆಟಕ್ಕೆ ಬಲಿಷ್ಠ ತಂಡದ ಅಗತ್ಯವಿದೆ. ವಿಶ್ವ ಚಾಂಪಿಯನ್ ಆದ ಇಂಗ್ಲೆಂಡ್ ಇದಕ್ಕೆ ದೊಡ್ಡ ಉದಾಹರಣೆ. ತಂಡದಲ್ಲಿ ಆಲ್ರೌಂಡರ್ಗಳು ಸೇರಿ 7 ಆಟಗಾರರು ಬೌಲ್ ಮಾಡುವ ಶಕ್ತಿ ಹೊಂದಿದ್ದಾರೆ. ಇದು ತಂಡ ಕಟ್ಟುವ ರೀತಿ. ಮುಂದಿನ ವಿಶ್ವಕಪ್ಗೆ ಭಾರತ ತಂಡ ಇದೇ ಮಾದರಿಯಲ್ಲಿ ಸಿದ್ಧವಾಗಬೇಕಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಇಂಗ್ಲೆಂಡ್ ತಂಡ ಫೈನಲ್ ಪಂದ್ಯದಲ್ಲಿ ಪಾಕಿಸ್ತಾನದ ಒತ್ತಡ ನಿಭಾಯಿಸಿದ ರೀತಿ ಶ್ಲಾಘನೀಯ. ಇದು ಚಾಂಪಿಯನ್ ಆಗುವ ತಂಡದ ಲಕ್ಷಣ. ಭಾರತ ತಂಡ ಹೆಚ್ಚಿನ ಟಿ20 ಸ್ಪೆಷಲಿಸ್ಟ್ಗಳನ್ನು ಹೊಂದಬೇಕಿದೆ. ನಮ್ಮಲ್ಲೂ ಬ್ಯಾಟ್, ಬೌಲ್ ಮಾಡುವ ಸಾಮರ್ಥ್ಯದ ಆಟಗಾರರಿದ್ದಾರೆ. ಅಂಥವರಿಗೆ ಹೆಚ್ಚಿನ ಅವಕಾಶ ನೀಡಿ ಸಮರ್ಥ ಆಟಗಾರರನ್ನಾಗಿ ರೂಪಿಸಬೇಕಿದೆ ಎಂದು ಲಕ್ಷ್ಮಣ್ ಹೇಳಿದ್ದಾರೆ.
ಬದಲಾವಣೆಯ ಗುಂಡಿ ಅದುಮಿ: ಶುರುವಾಗಲಿರುವ ಕಿವೀಸ್ ಸರಣಿಯಿಂದಲೇ ತಂಡದ ಬದಲಾವಣೆ ಆರಂಭವಾಗಲಿದೆ. ಹಿರಿಯ ಆಟಗಾರರಾದ ರೋಹಿತ್ ಶರ್ಮಾ, ವಿರಾಟ್ ಕೊಹ್ಲಿ, ಕೆಎಲ್ ರಾಹುಲ್, ಅಶ್ವಿನ್, ದಿನೇಶ್ ಕಾರ್ತಿಕ್ರ ಸ್ಥಾನವನ್ನು ಯುವಕರು ತುಂಬಬೇಕಿದೆ. ಬಲಿಷ್ಠ ತಂಡ ಕಟ್ಟುವ ಕೆಲಸ ಈ ಸರಣಿಯಿಂದಲೇ ಶುರುವಾಗಲಿ ಎಂದರು.
ಹಾರ್ದಿಕ್ ಪಾಂಡ್ಯ ಮುಂದಿನ ನಾಯಕ: ತಂಡದ ಸದ್ಯದ ಸ್ಟಾರ್ ಆಲ್ರೌಂಡರ್ ಹಾರ್ದಿಕ್ ಪಾಂಡ್ಯ ಭವಿಷ್ಯದ ಟಿ20 ನಾಯಕರಾಗಲಿರುವ ಸೂಚನೆ ನೀಡಿದ್ದಾರೆ. ಟಿ20 ಕ್ರಿಕೆಟ್ಗೆ ಸಾಕಷ್ಟು ಸ್ವತಂತ್ರವಾಗಿ ಬ್ಯಾಟ್ ಬೀಸುವ, ಯೋಚಿಸುವ ಅಗತ್ಯವಿದೆ. ಇದನ್ನು ಪಾಂಡ್ಯ ತೋರಿಸಿಕೊಟ್ಟಿದ್ದಾರೆ. ನಿರ್ಭಯವಾಗಿ ಆಡುವ ಛಾತಿ ಅವರಲ್ಲಿದೆ. ಇದನ್ನು ನಾನು ಹತ್ತಿರದಿಂದ ನೋಡಿದ್ದೇನೆ. ಅದೇ ಆತನ ಶಕ್ತಿಯಾಗಿದೆ. ಪರಿಸ್ಥಿತಿಗೆ ತಕ್ಕಂತೆ ಆಟವಾಡುವುದು ಟಿ20 ಕ್ರಿಕೆಟ್ಗೆ ಬೇಕಿದೆ ಎಂದು ಲಕ್ಷ್ಮಣ್ ಹೇಳಿದರು.
ಐರ್ಲೆಂಡ್ ಸರಣಿಯಲ್ಲಿ ಹಾರ್ದಿಕ್ ಜೊತೆ ತಂಡ ಹಂಚಿಕೊಂಡಿದ್ದೇನೆ. ತಂತ್ರ ರೂಪಿಸುವ ಅಸಾಧಾರಣ ಮನಸ್ಥಿತಿ ಆತ ಹೊಂದಿದ್ದಾನೆ. ಒತ್ತಡ ನಿಭಾಯಿಸುವ ಜೊತೆಗೆ ಸಿಡಿಯುವ ತಂತ್ರ ಅಗತ್ಯ. ಹಾರ್ದಿಕ್ ಪಾಂಡ್ಯ ಮುಂದಿನ ನಾಯಕನಾಗಿ ಮುಂದುವರಿಯುವ ಎಲ್ಲ ಸಾಮರ್ಥ್ಯ ಇದೆ ಎಂದು ಅಭಿಪ್ರಾಯಪಟ್ಟರು.
ಓದಿ: ಸಮುದ್ರ ತೀರದಲ್ಲಿ ಸಿಕ್ಸ್ ಪ್ಯಾಕ್ ದೇಹದೊಂದಿಗೆ ಟೀಂ ಇಂಡಿಯಾ ಕ್ರಿಕೆಟಿಗರು: ವಿಡಿಯೋ ವೈರಲ್
