ಮುಂಬೈ: ಇಂಡಿಯನ್ ಪ್ರೀಮಿಯರ್ ಲೀಗ್ ಪ್ರದರ್ಶನ ರಾಷ್ಟ್ರೀಯ ತಂಡಕ್ಕೆ ಆಯ್ಕೆ ಮಾಡುವ ಮಾನದಂಡವಲ್ಲ. ಹಾಗಿದ್ದರೂ ಆಸ್ಟ್ರೇಲಿಯಾದಲ್ಲಿ ಅಕ್ಟೋಬರ್ ತಿಂಗಳಲ್ಲಿ ಜರುಗಲಿರುವ ಟಿ20 ವಿಶ್ವಕಪ್ಗೆ ಅತ್ಯುತ್ತಮ ತಂಡ ಸಂಯೋಜನೆಯನ್ನು ಸಿದ್ಧಪಡಿಸುವ ಉದ್ದೇಶದಿಂದ ಆಯ್ಕೆ ಸಮಿತಿ ಪ್ರಸ್ತುತ ಐಪಿಎಲ್ ಕಡೆಗೆ ಗಮನ ನೀಡುತ್ತಿದೆ.
ಹಾಗಾಗಿ, ವಿಶ್ವಕಪ್ ತಂಡಕ್ಕೆ ಆಯ್ಕೆಯಾಗುವ ಕನಸಿನಲ್ಲಿರುವ ಅನುಭವಿ ಆಟಗಾರರಿಗೆ ಮಾತ್ರವಲ್ಲ, ಕೆಲವು ಹೊಸ ಯುವ ಆಟಗಾರರಿಗೂ ಈ ಐಪಿಎಲ್ ವಿಶ್ವಕಪ್ ಆಯ್ಕೆಯ ಸ್ಪರ್ಧೆಗೆ ಪ್ರವೇಶಿಸುವ ಅವಕಾಶವನ್ನು ನೀಡಿದೆ. ಮಾಜಿ ಸ್ಪಿನ್ನರ್ ಹರ್ಭಜನ್ ಸಿಂಗ್ ಸನ್ರೈಸರ್ಸ್ನಲ್ಲಿರುವ ರಾಷ್ಟ್ರೀಯ ತಂಡಕ್ಕೆ ಪದಾರ್ಪಣೆ ಮಾಡದಿರುವ ಯುವ ವೇಗಿ ಉಮ್ರಾನ್ ಮಲಿಕ್ ಪರ ಬ್ಯಾಟಿಂಗ್ ಮಾಡಿದ್ದಾರೆ.
ಉಮ್ರಾನ್ ಮಲಿಕ್ ಈ ಬಾರಿಯ ಐಪಿಎಲ್ನಲ್ಲಿ ತಮ್ಮ ಮಾರಕ ವೇಗದ ಬೌಲಿಂಗ್ನಿಂದ ಗಮನ ಸೆಳೆದಿದ್ದಾರೆ. ಜೊತೆಗೆ, ನಿನ್ನೆ ನಡೆದ ಪಂಜಾಬ್ ಕಿಂಗ್ಸ್ ವಿರುದ್ಧದ ಪಂದ್ಯದಲ್ಲಿ 20ನೇ ಓವರ್ನಲ್ಲಿ ಒಂದೂ ರನ್ ಬಿಟ್ಟುಕೊಡದೆ ಮೇಡನ್ ಜೊತೆಗೆ 4 ವಿಕೆಟ್ ಪಡೆದು ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದಿದ್ದರು.
ಪಂಜಾಬ್ ಇನ್ನಿಂಗ್ಸ್ ನಂತರ ಸ್ಟಾರ್ ಸ್ಪೋರ್ಟ್ಸ್ ವಿಶ್ಲೇಷಣೆಯಲ್ಲಿ ಮಾತನಾಡಿದ ಹರ್ಭಜನ್ ಸಿಂಗ್ , ಉಮ್ರಾನ್ ಆದಷ್ಟು ಬೇಗ ಭಾರತೀಯ ಜರ್ಸಿ ತೊಡುವಂತಾಗಬೇಕು. ಆತ ಮುಂಬರುವ ಟಿ20 ವಿಶ್ವಕಪ್ ತಂಡಕ್ಕೆ ಅತ್ಯಂತ ಹೆಚ್ಚು ಅರ್ಹನಾದ ಅಭ್ಯರ್ಥಿ ಎಂದು ಅಭಿಪ್ರಾಯಪಟ್ಟಿದ್ದಾರೆ.
"ನೀಲಿ ಜರ್ಸಿ ಮಾತ್ರ ಮಿಸ್ ಆಗಿದೆ ಮತ್ತು ಅವರು ಅದನ್ನು ಬೇಗ ಪಡೆದುಕೊಳ್ಳಬೇಕು. ಆತ ಆಸ್ಟ್ರೇಲಿಯಾದಲ್ಲಿ ನಡೆಯಲಿರುವ ಟಿ20 ವಿಶ್ವಕಪ್ಗೆ ಭಾರತ ತಂಡದ ಪರ ಆಡುವುದಕ್ಕೆ ಹೆಚ್ಚು ಅರ್ಹನಾಗಿರುವ ಆಟಗಾರ ಎಂದು ನಾನು ಭಾವಿಸುತ್ತೇನೆ. ಅವರು ಅಲ್ಲಿ ನಿಮ್ಮ ಮ್ಯಾಚ್ ವಿನ್ನರ್ ಆಗಬಹುದು" ಎಂದು ಹೇಳಿದ್ದಾರೆ.
ಉಮ್ರಾನ್ ಒಂದೆರಡು ಪಂದ್ಯಗಳಲ್ಲಿ ಧಾರಾಳವಾಗಿ ರನ್ ಬಿಟ್ಟುಕೊಟ್ಟರಾದರೂ ಕಳೆದ 2 ಪಂದ್ಯಗಳಲ್ಲಿ ಅತ್ಯುತ್ತಮ ಎಕಾನಮಿಯಲ್ಲಿ ಬೌಲಿಂಗ್ ಮಾಡಿ ವಿಕೆಟ್ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ. ಪ್ರಸ್ತುತ ಅವರು ಆಡಿರುವ 6 ಪಂದ್ಯಗಳಲ್ಲಿ 9 ವಿಕೆಟ್ ಪಡೆದಿದ್ದಾರೆ.
ಇದನ್ನೂ ಓದಿ:ಪುರುಷರ ಜರ್ಸಿಗೆ ಮರುಹೊಲಿಗೆ, ಸಮೋಸವೇ ಬ್ರೇಕ್‌ಫಾಸ್ಟ್! ಮಹಿಳಾ ಕ್ರಿಕೆಟಿಗರ ಯಾತನೆ ವಿವರಿಸಿದ ವಿನೋದ್‌ ರಾಯ್!
