ಟ್ರಿನಿಡಾಡ್: ಕಿರಿಯರ ವಿಶ್ವಕಪ್ನಲ್ಲಿ ಭಾರತೀಯ ಯುವಪಡೆಯ ಅಬ್ಬರ ಮುಂದುವರಿದಿದ್ದು, ಶನಿವಾರ ನಡೆದ ಕ್ರಿಕೆಟ್ನಲ್ಲಿ ಈಗಷ್ಟೇ ಕಣ್ಣುಬಿಡುತ್ತಿರುವ ಉಗಾಂಡ ವಿರುದ್ಧ ಬರೋಬ್ಬರಿ 326 ರನ್ಗಳಿಂದ ಜಯ ದಾಖಲಿಸಿ ಅಜೇಯವಾಗಿ ಕ್ವಾರ್ಟರ್ ಫೈನಲ್ ತಲುಪಿದೆ.
ಬ್ರಿಯಾನ್ ಲಾರಾ ಸ್ಟ್ರೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಭಾರತ ತಂಡ ಬರೋಬ್ಬರಿ 405 ರನ್ಗಳನ್ನು ಸೂರೆಗೈದಿತು. ಅಂಗ್ಕೃಷ್ ರಘುವಂಶಿ ಮತ್ತು ರಾಜ್ ಭಾವಾ ಬೌಂಡರಿ-ಸಿಕ್ಸರ್ಗಳ ಸುರಿಮಳೆ ಸುರಿಸಿದರು ಆರಂಭಿಕರಾಗಿ ಕಣಕ್ಕಿಳಿದಿದ್ದ ರಘುವಂಶಿ 120 ಎಸೆತಗಳಲ್ಲಿ 22 ಬೌಂಡರಿ , 4 ಸಿಕ್ಸರ್ಗಳ ಸಹಿತ 144 ರನ್ಗಳಿಸಿದರೆ, ಆಲ್ರೌಂಡರ್ ರಾಜ್ ಬಾವಾ 108 ಎಸೆತಗಳಲ್ಲಿ 14 ಬೌಂಡರಿ ಮತ್ತು 8 ಸಿಕ್ಸರ್ಗಳ ಸಹಿತ 162 ರನ್ಗಳಿಸಿದರು. ಈ ಮೂಲಕ ಕಿರಿಯರ ವಿಶ್ವಕಪ್ನಲ್ಲಿ ಗರಿಷ್ಠ ವೈಯಕ್ತಿಕ ರನ್ ಸಿಡಿಸಿದ ಭಾರತೀಯ ಎನಿಸಿಕೊಂಡರು. 2004ರಲ್ಲಿ ಶಿಖರ್ ಧವನ್ 155 ರನ್ಗಳಿಸಿದ್ದ ಈವರೆಗಿನ ದಾಖಲೆಯಾಗಿತ್ತು.
ಉಳಿದಂತೆ ನಾಯಕ ನಿಶಾಂತ್ 15, ದಿನೇಶ್ ಬಾನ 22, ಕನ್ನಡಿಗ ಅನೀಶ್ವರ್ 12, ಹರ್ನೂರ್ ಸಿಂಗ್ 15 ರನ್ಗಳಿಸಿದರು.
406 ರನ್ಗಳ ಬೃಹತ್ ಮೊತ್ತವನ್ನು ಬೆನ್ನಟ್ಟಿದ ಉಗಾಂಡವನ್ನು ಭಾರತೀಯ ಬೌಲರ್ಗಳು ಕೇವಲ 19.4 ಓವರ್ಗಳಲ್ಲಿ 70 ರನ್ಗಳಿಗೆ ಆಲೌಟ್ ಮಾಡುವ ಮೂಲಕ 326 ರನ್ ದಾಖಲೆಯ ಗೆಲುವಿಗೆ ಕಾರಣರಾದರು.
ನಿಮ್ಮ ಸೂಕ್ತ ಸಂಗಾತಿ ಹುಡುಕುತ್ತಿರುವಿರಾ? ಕನ್ನಡ ಮ್ಯಾಟ್ರಿಮೋನಿಯಲ್ಲಿ ನೋಂದಣಿ ಉಚಿತ
ಭಾರತದ ಮಾರಕ ದಾಳಿಗೆ ತತ್ತರಿಸಿದ ಉಗಾಂಡ ಪರ ನಾಯಕ ಪಸ್ಕಾಲ್ ಮುರುಂಗಿ 34 ರನ್ಗಳಿಸಿ ಗರಿಷ್ಠ ಸ್ಕೋರರ್ ಎನಿಸಿಕೊಂಡರೆ, ರೊನಾಲ್ಡ್ ಒಪಿಯೋ 11ರನ್ಗಳಿಸಿ ತಂಡದ ಪರ ಎರಡಂಕಿ ದಾಟಿ 2ನೇ ಬ್ಯಾಟರ್ ಎನಿಸಿಕೊಂಡರು. 6 ಬ್ಯಾಟರ್ಗಳು ಶೂನ್ಯಕ್ಕೆ ವಿಕೆಟ್ ಒಪ್ಪಿಸಿದರೆ, ಮೂವರು ತಲಾ 5 ರನ್ಗಳಿಸಿ ಔಟಾದರು.
ಕಿರಿಯರ ವಿಶ್ವಕಪ್ನಲ್ಲೇ 2ನೇ ಗರಿಷ್ಠ ರನ್ಗಳ ಅಂತರದ ಜಯ
ಈ ಪಂದ್ಯವನ್ನು 326 ರನ್ಗಳಿಂದ ಗೆದ್ದ ಭಾರತ ಕಿರಿಯರ ತಂಡ ಕಿರಿಯರ ವಿಶ್ವಕಪ್ ಇತಿಹಾಸದಲ್ಲಿ 2ನೇ ಗರಿಷ್ಠ ರನ್ಗಳ ಅಂತರದ ಜಯ ದಾಖಲಿಸಿತು. ಇದಕ್ಕೂ ಮುನ್ನ 2002ರಲ್ಲಿ ಆಸ್ಟ್ರೇಲಿಯಾ ಅಂಡರ್ 19 ತಂಡ ಕೀನ್ಯ ಅಂಡರ್ 19 ವಿರುದ್ದ 430 ರನ್ಗಳ ಅಂತರದ ಜಯ ಸಾಧಿಸಿ ವಿಶ್ವದಾಖಲೆ ನಿರ್ಮಿಸಿದೆ. ಆ ಪಂದ್ಯದಲ್ಲಿ ಆಸ್ಟ್ರೇಲಿಯಾ 480 ರನ್ಗಳಿಸಿದರೆ, ಇದಕ್ಕುತ್ತರವಾಗಿ ಕೀನ್ಯಾ ಕೇವಲ 50 ರನ್ಗಳಿಗೆ ಆಲೌಟ್ ಆಗಿತ್ತು.
ಇದನ್ನೂ ಓದಿ:ಭಾರತ-ವೆಸ್ಟ್ ಇಂಡೀಸ್ ಕ್ರಿಕೆಟ್ ಸರಣಿಗೆ ಸ್ಥಳ ನಿಗದಿ.. ಅಹ್ಮದಾಬಾದ್, ಕೋಲ್ಕತ್ತಾದಲ್ಲಿ ಟೂರ್ನಿ
