IND vs NZ T20: ಪಂದ್ಯ​ ವೀಕ್ಷಣೆಗೆ ಟಿಕೆಟ್​ ಜೊತೆ RT-PCR ವರದಿ, ಲಸಿಕೆ ಪ್ರಮಾಣಪತ್ರ ಕಡ್ಡಾಯ

ನವೆಂಬರ್​ 17ರಿಂದ ಭಾರತ-ನ್ಯೂಜಿಲ್ಯಾಂಡ್ (India vs New Zealand) ತಂಡಗಳ ನಡುವೆ ಮೊದಲ ಟಿ20 ಪಂದ್ಯ ನಡೆಯಲಿದ್ದು, ಅದಕ್ಕಾಗಿ ಟಿಕೆಟ್ ಮಾರಾಟ ಶುರುವಾಗಿದೆ. ಈ ಕ್ರಿಕೆಟ್ ಪಂದ್ಯ ವೀಕ್ಷಣೆ ಮಾಡಲು ಕೆಲವೊಂದು ಮಾರ್ಗಸೂಚಿ ಹೊರಡಿಸಲಾಗಿದೆ.

ಜೈಪುರ್(ರಾಜಸ್ಥಾನ): ನವೆಂಬರ್​ 17ರಿಂದ ಭಾರತ-ನ್ಯೂಜಿಲ್ಯಾಂಡ್ (IND vs NZ) ತಂಡಗಳ ಮಧ್ಯೆ ಟಿ20 ಕ್ರಿಕೆಟ್ ಸರಣಿ ಆರಂಭಗೊಳ್ಳಲಿದೆ. ಈ ಪಂದ್ಯಾವಳಿ ವೀಕ್ಷಣೆಗೆ ಕ್ರಿಕೆಟ್​ ಅಭಿಮಾನಿಗಳಿಗೆ ಅನುಮತಿ ನೀಡಲಾಗಿದ್ದು, ರಾಜಸ್ಥಾನ ಕ್ರಿಕೆಟ್ ಸಂಸ್ಥೆ ಮಾರ್ಗಸೂಚಿ ಬಿಡುಗಡೆ ಮಾಡಿದೆ.

ಜೈಪುರ​​ದ ಸವಾಯಿ ಮಾನ್ಸಿಂಗ್​​ (SMS Stadium Jaipur) ​​ ಮೈದಾನದಲ್ಲಿ ನವೆಂಬರ್​ 17ರಂದು ಮೊದಲ ಟಿ20 ಪಂದ್ಯ ನಿಗದಿಯಾಗಿದೆ. ಅದಕ್ಕಾಗಿ ರಾಜಸ್ಥಾನ ಕ್ರಿಕೆಟ್ ಸಂಸ್ಥೆ (Rajasthan Cricket Association​) ಎಲ್ಲ ರೀತಿಯ ಸಿದ್ಧತೆ ಮಾಡಿಕೊಂಡಿದೆ.

ಕ್ರಿಕೆಟ್ ಪಂದ್ಯ ವೀಕ್ಷಣೆ ಮಾಡಲು ಹೆಚ್ಚಿನ ಜನರು ಆಗಮಿಸುವ ಸಾಧ್ಯತೆ ಇದ್ದು, ಕೊರೊನಾ ಮಾರ್ಗಸೂಚಿ ಅನುಸರಣೆ ಮಾಡಲಾಗ್ತಿದೆ. ಪ್ರೇಕ್ಷಕರು ಟಿಕೆಟ್​ನೊಂದಿಗೆ ಆರ್​ಟಿ-ಪಿಸಿಆರ್ ​(RT-PCR) ಮತ್ತು ವ್ಯಾಕ್ಸಿನೇಷನ್​​ ಪ್ರಮಾಣಪತ್ರ ತರುವುದು ಅವಶ್ಯವಾಗಿದೆ. ಪಂದ್ಯದ ಟಿಕೆಟ್​​ ಮಾರಾಟ ಪ್ರಕ್ರಿಯೆ ಈಗಾಗಲೇ ಆರಂಭವಾಗಿದ್ದು, ಮೈದಾನದ ಹೊರಗೆ ಕೌಂಟರ್ ತೆರೆಯಲಾಗಿದೆ. ಟಿಕೆಟ್​ ಖರೀದಿಸುವವರು ಕಡ್ಡಾಯವಾಗಿ ಆರ್​​ಟಿ-ಪಿಸಿಆರ್ ಹಾಗೂ ವ್ಯಾಕ್ಸಿನೇಷನ್ ಪ್ರಮಾಣಪತ್ರ ತರಬೇಕು ಎಂದು ತಿಳಿಸಲಾಗಿದೆ.

ಕೋವಿಡ್​ನ ಎರಡು ಡೋಸ್​ ಲಸಿಕೆ ಪಡೆದ ಪ್ರೇಕ್ಷಕರಿಗೆ ಮಾತ್ರ ಕ್ರೀಡಾಂಗಣದಲ್ಲಿ ಪಂದ್ಯ ವೀಕ್ಷಣೆ ಮಾಡಲು ಅವಕಾಶ ನೀಡಲಾಗುತ್ತಿದೆ. ಜೊತೆಗೆ, ಪಂದ್ಯ ಆರಂಭಗೊಳ್ಳುವುದಕ್ಕೂ 48 ಗಂಟೆಗಳ ಕಾಲ ಮೊದಲಿನ ಆರ್​ಟಿ-ಪಿಸಿಆರ್​​ ವರದಿ ಕಡ್ಡಾಯವಾಗಿದೆ.

8 ವರ್ಷಗಳ ನಂತರ ಭಾರತ ಮತ್ತು ನ್ಯೂಜಿಲ್ಯಾಂಡ್ ನಡುವೆ ಜೈಪುರದ​ ಸವಾಯಿ ಮಾನ್ಸಿಂಗ್ ಮೈದಾನದಲ್ಲಿ ಪಂದ್ಯ ನಡೆಯುತ್ತಿದೆ.