ಬ್ರಿಸ್ಬೇನ್(ಆಸ್ಟ್ರೇಲಿಯಾ): ಅಫ್ಘಾನಿಸ್ತಾನ ಮಾಡು ಇಲ್ಲವೇ ಮಡಿ ಪಂದ್ಯದಲ್ಲಿ ಸೋಲನುಭವಿಸಿ ಸೆಮಿಫೈನಲ್ ರೇಸ್‌ನಿಂದ ಹೊರಬಿದ್ದಿದೆ. ಶ್ರೀಲಂಕಾ ತಂಡವು ಅಫ್ಘಾನ್ ನೀಡಿದ 144ರನ್ ಗುರಿಯನ್ನು ಧನಂಜಯ ಡಿ ಸಿಲ್ವ ಅವರ ಅರ್ಧ ಶತಕದ ನೆರವಿನಿಂದ 18.3 ಓವರ್ನಲ್ಲಿ 4 ವಿಕೆಟ್ ನಷ್ಟದಿಂದ ಸುಲಭವಾಗಿ ಜಯಿಸಿತು. ಸೂಪರ್ 12 ಹಂತದ ಎರಡನೇ ಗೆಲುವು ಸಾಧಿಸಿರುವ ಲಂಕಾ ಸೆಮಿಸ್ನ ಆಸೆ ಜೀವಂತ ಉಳಿಸಿಕೊಂಡಿದೆ.
ಮೊದಲು ಬ್ಯಾಟ್ ಮಾಡಿದ ಅಫ್ಘಾನಿಸ್ತಾನ 8 ವಿಕೆಟ್ ನಷ್ಟಕ್ಕೆ 144 ರನ್ ಗಳಿಸಿತು. ಆರಂಭಿಕರಾದ ಗುರ್ಬಾಜ್(28), ಘನಿ(27) ಮತ್ತು ಇಬ್ರಾಹಿಂ ಜದ್ರಾನ್ (22) ಸಾಧಾರಣ ಪ್ರದರ್ಶನ ನೀಡಿದರು. ನಂತರ ಮಧ್ಯಮ ಕ್ರಮಾಂಕದ ಆಟಗಾರರು ಕ್ರಿಸ್ನಲ್ಲಿ ನಿಲ್ಲಲಿಲ್ಲ. ನಜೀಬುಲ್ಲಾ ಜದ್ರಾನ್(18), ಗುಲ್ಬದಿನ್ ನೈಬ್(12) ಮತ್ತು ನಾಯಕ ನಬಿ 13ಕ್ಕೆ ವಿಕೆಟ್ ಚೆಲ್ಲಿದರು.
ಶ್ರೀಲಂಕಾ ಪರ ವನಿಂದು ಹಸರಂಗ ಮೂರು ವಿಕೆಟ್ ಪಡೆದರು. ಲಹಿರು ಕುಮಾರ ಎರಡು ಮತ್ತು ಧನಂಜಯ ಡಿ ಸಿಲ್ವ, ಕಸುನ್ ರಜಿತ ತಲಾ ಒಂದು ವಿಕೆಟ್ ಪಡೆದರು.
ಬೌಲಿಂಗ್ನಲ್ಲಿ ಒಂದು ವಿಕೆಟ್ ಕಬಳಿಸಿದ್ದ ಧನಂಜಯ ಡಿ ಸಿಲ್ವ ಬ್ಯಾಟಿಂಗ್ನಲ್ಲೂ ಉತ್ತಮ ಪ್ರದರ್ಶನ ನೀಡಿದರು. ಅಫ್ಘಾನಿಸ್ತಾನ ನೀಡಿದ್ದ 145 ರನ್‌ಗಳನ್ನು ಲಂಕಾ 18.3 ಓವರ್ನಲ್ಲಿ 4 ವಿಕೆಟ್ ನಷ್ಟಕ್ಕೆ ಸಾಧಿಸಿತು. 10 ರನ್ ಗಳಿಸಿದ್ದ ಪಾತುಮ್ ನಿಸ್ಸಾಂಕ ಮುಜೀಬ್ ವಿಕೆಟ್ ಒಪ್ಪಿಸಿದರು. ನಂತರ ಕುಸಲ್ ಮೆಂಡಿಸ್ (25) ಮತ್ತು ಧನಂಜಯ ಡಿ ಸಿಲ್ವ ಉತ್ತಮ ಜೊತೆಯಾಟ ಪ್ರದರ್ಶಿಸಿದರು. ಡಿ ಸಿಲ್ವ 42 ಬಾಲ್ ಎದುರಿಸಿ 6 ಬೌಂಡರಿ ಮತ್ತು 2 ಸಿಕ್ಸ್ನಿಂದ 66 ರನ್ ಗಳಿಸಿ ತಂಡಕ್ಕೆ ಉತ್ತಮ ಸಾಥ್ ನೀಡಿದರು.
ಮೆಂಡಿಸ್ ವಿಕೆಟ್ ನಂತರ ಬಂದ ಚರಿತ್ ಅಸಲಂಕಾ(18), ಭಾನುಕ ರಾಜಪಕ್ಸೆ(18) ಸಣ್ಣ ಪ್ರಮಾನ ಹೋರಾಟ ತೋರಿದರು. ಮುಜೀಬ್ ಉರ್ ರಹಮಾನ್ ಮತ್ತು ರಶೀದ್ ಖಾನ್ ತಲಾ ಎರಡು ವಿಕೆಟ್ ಪಡೆದರು. ಶ್ರೀಲಂಕಾ ಪರ ಮೂರು ವಿಕೆಟ್ ಕಬಳಿಸಿದ ವನಿಂದು ಹಸರಂಗಾ ಪಂದ್ಯ ಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು.
ಇದನ್ನೂ ಓದಿ: ಫ್ರೆಂಚ್ ಓಪನ್ ಬ್ಯಾಡ್ಮಿಂಟನ್: ಸಾತ್ವಿಕ್-ಚಿರಾಗ್‌ ಜೋಡಿ ಚಾಂಪಿಯನ್
