ಹೈದರಾಬಾದ್ : ಸನ್ರೈಸರ್ಸ್ ಹೈದರಾಬಾದ್ ಆಧಾರ ಸ್ತಂಭವಾಗಿದ್ದ ಡೇವಿಡ್ ವಾರ್ನರ್ ಮತ್ತು ಆರಂಭಿಕ ಬ್ಯಾಟರ್ ಜಾನಿ ಬೈರ್ಸ್ಟೋವ್ ತಮ್ಮ ಫ್ರಾಂಚೈಸಿಗೆ ಧನ್ಯವಾದ ಅರ್ಪಿಸಿದ್ದಾರೆ. ರಿಟೆನ್ಷೆನ್ ಘೋಷಣೆಗೂ ಮುನ್ನವೇ ಇವರಿಬ್ಬರು ತಂಡದಿಂದ ಹೊರ ಬಿದ್ದಿರುವುದು ಖಚಿತವಾಗಿದೆ.
ಕಳೆದ ಕೆಲವು ವರ್ಷಗಳಿಂದ ತಂಡಕ್ಕಾಗಿ ಕೊಡುಗೆ ನೀಡಿರುವ ಎಲ್ಲಾ ಆಟಗಾರರಿಗೂ ಫ್ರಾಂಚೈಸಿ ಧನ್ಯವಾದವನ್ನು ಹೇಳಲು ಇಷ್ಟಪಡುತ್ತದೆ. ಇದು ಆಟಗಾರರಿಗೆ ಗುಡ್ ಬೈ ಅಲ್ಲ. ನಾವು ಹರಾಜಿನಲ್ಲಿ ಮತ್ತೆ ನಮ್ಮ ಕೆಲವು ಆಟಗಾರರನ್ನು ಖರೀದಿಸಲಿದ್ದೇವೆ ಎಂದು ಸನ್ರೈಸರ್ಸ್ ಹೈದರಾಬಾದ್ ಟ್ವೀಟ್ ಮಾಡಿದೆ.
2014ರಿಂದ ಫ್ರಾಂಚೈಸಿಯ ಭಾಗವಾಗಿದ್ದ ಡೇವಿಡ್ ವಾರ್ನರ್ ಇದಕ್ಕೆ ಉತ್ತರಿಸಿದ್ದು, ಕಳೆದ ಕೆಲವು ವರ್ಷಗಳಿಂದ ಬೆಂಬಲಿಸಿದ ಎಲ್ಲರಿಗೂ ಧನ್ಯವಾದಗಳು. ನನ್ನ ಏಳು-ಬೀಳುಗಳಲ್ಲಿ ನೀವು ತೋರಿದ ಪ್ರೀತಿಗೆ ನಾನು ಮತ್ತು ತಂಡ ಎಷ್ಟು ಧನ್ಯವಾದ ಹೇಳಿದರೂ ಸಾಲದು. ನಾನು ಮತ್ತು ಕ್ಯಾಂಡಿಸ್( ಪತ್ನಿ) ಎಲ್ಲಾ ಅಭಿಮಾನಿಗಳಿಗೆ ಧನ್ಯವಾದ ಹೇಳುತ್ತೇವೆ ಎಂದು ಬರೆದುಕೊಂಡಿದ್ದಾರೆ.
ಬೈರ್ಸ್ಟೋವ್ ಕೂಡ, ನಮಗೆ ಬೆಂಬಲ ನೀಡಿದ ಪ್ರತಿಯೊಬ್ಬರಿಗೂ ಧನ್ಯವಾದಗಳು. ಭವಿಷ್ಯದಲ್ಲಿ ಮುಂದೆ ಎಂದಾದರೂ ಮತ್ತೆ ಒಂದಾಗೋಣ ಎಂದು ಆಶಿಸುತ್ತೇನೆ ಎಂದು ತಿಳಿಸಿದ್ದಾರೆ.
ರಶೀದ್ ಖಾನ್ ರಿಟೈನ್ ಸಾಧ್ಯತೆ ಕಡಿಮೆ : ವಿಶ್ವದ ಟಾಪ್ ಸ್ಪಿನ್ ಬೌಲರ್ಗಳಲ್ಲಿ ಒಬ್ಬರಾಗಿರುವ ರಶೀದ್ ಖಾನ್ ಈ ಬಾರಿ ಸನ್ರೈಸರ್ಸ್ನಲ್ಲಿ ಉಳಿಯುವ ಸಾಧ್ಯತೆ ಕಷ್ಟವಾಗಿದೆ. ಅವರು ಫ್ರಾಂಚೈಸಿ ಮುಂದೆ ತಮ್ಮನ್ನು ಮೊದಲ ಆಟಗಾರನಾಗಿ ಉಳಿಸಿಕೊಳ್ಳುವುದಕ್ಕೆ ಬೇಡಿಕೆ ಇಟ್ಟಿದ್ದಾರೆಂದು ತಿಳಿದು ಬಂದಿದೆ.
ಆದರೆ, ಎಸ್ಆರ್ಹೆಚ್ ಕೇನ್ ವಿಲಿಯಮ್ಸನ್ರಿಗೆ ಮೊದಲ ಆದ್ಯತೆ ನೀಡಲು ಬಯಸುತ್ತಿರುವುದರಿಂದ ರಶೀದ್ ಖಾನ್ ತಮ್ಮ 5 ವರ್ಷಗಳ ಫ್ರಾಂಚೈಸಿಯ ಒಡನಾಟಕ್ಕೆ ತೆರೆ ಎಳೆಯಲಿದ್ದಾರೆ ಎನ್ನಲಾಗುತ್ತಿದೆ. ವರದಿಗಳ ಪ್ರಕಾರ ಫ್ರಾಂಚೈಸಿ ಕೇನ್ ವಿಲಿಯಮ್ಸನ್, ಅಬ್ದುಲ್ ಸಮದ್ ಮತ್ತು ಉಮರ್ ಮಲಿಕ್ ಅವರನ್ನು ರಿಟೈನ್ ಮಾಡಿಕೊಂಡಿದೆ ಎಂದು ತಿಳಿದು ಬಂದಿದೆ.
ಇದನ್ನೂ ಓದಿ:IPL Retention : ಮ್ಯಾಕ್ಸ್ವೆಲ್, ಕೊಹ್ಲಿ ನಂತರ ಸಿರಾಜ್ರನ್ನು ಉಳಿಸಿಕೊಳ್ಳಲು RCB ನಿರ್ಧಾರ
