ಪಲ್ಲೆಕೆಲೆ (ಶ್ರೀಲಂಕಾ): ಏಷ್ಯಾಕಪ್ನ ಎರಡನೇ ಪಂದ್ಯದಲ್ಲಿ ನಾಳೆ (ಗುರುವಾರ) ಬಿ ಗುಂಪಿನಲ್ಲಿರುವ ಶ್ರೀಲಂಕಾ ಮತ್ತು ಬಾಂಗ್ಲಾದೇಶ ತಂಡಗಳು ಮುಖಾಮುಖಿ ಆಗುತ್ತಿವೆ. ಕಳೆದ ಟಿ20 ಮಾದರಿಯ ಏಷ್ಯಾಕಪ್ ವಿಜೇತ ಸಿಂಹಳೀಯರು ಈ ವರ್ಷ ಗಾಯದ ಸಮಸ್ಯೆಗೆ ತುತ್ತಾಗಿದ್ದಾರೆ. ಇದರಿಂದ ಅನುಭವಿ ಆಟಗಾರರ ಕೊರತೆ ಎದುರಾಗಿದೆ.
ಶ್ರೀಲಂಕಾ ಕ್ರಿಕೆಟ್ ಮಂಡಳಿ ನಿನ್ನೆಯವರೆಗೆ ಆಟಗಾರರ ಫಿಟ್ನೆಸ್ ವರದಿಗಾಗಿ ಕಾದು ತಂಡ ಪ್ರಕಟಿಸಿತು. ವನಿಂದು ಹಸರಂಗಾ, ದುಷ್ಮಂತ ಚಮೀರಾ, ಲಹಿರು ಕುಮಾರ ಮತ್ತು ದಿಲ್ಶಾನ್ ಮಧುಶಂಕ ಗಾಯದ ಸಮಸ್ಯೆಯಿಂದಾಗಿ ತಂಡದಲ್ಲಿ ಸ್ಥಾನ ಪಡೆದುಕೊಂಡಿಲ್ಲ. 2021ರಲ್ಲಿ ಕೊನೆಯ ಬಾರಿಗೆ ಏಕದಿನ ಆಡಿದ್ದ ಕುಸಲ್ ಪೆರೆರಾರನ್ನು ತಂಡಕ್ಕೆ ಆಯ್ಕೆ ಮಾಡಲಾಗಿದೆ. ಆದರೆ, ಪೆರೆರಾ ಇನ್ನೂ ಕೋವಿಡ್ನಿಂದ ಸಂಪೂರ್ಣ ಚೇತರಿಸಿಕೊಂಡಿಲ್ಲ. ಹೀಗಾಗಿ, ನಾಳಿನ ಪಂದ್ಯಕ್ಕೆ ಅಲಭ್ಯರಾಗಿದ್ದಾರೆ.
ಸಿಂಹಳೀಯರು ಭಾರತದ ವಿರುದ್ಧದ ಏಕದಿನ ಸರಣಿ (0-3) ಮತ್ತು ನ್ಯೂಜಿಲೆಂಡ್ ಎದುರು (0-2) ವೈಟ್ ವಾಶ್ ಅನುಭವಿಸಿದ್ದಾರೆ. ಹರಾರೆಯಲ್ಲಿ ನಡೆದ ಐಸಿಸಿ ವಿಶ್ವಕಪ್ನ ಕ್ವಾಲಿಫೈಯರ್‌ನಲ್ಲಿ ಉತ್ತಮ ಪ್ರದರ್ಶನ ನೀಡಿದ್ದರು. ಅದೇ ಹುಮ್ಮಸ್ಸಿನಲ್ಲಿ ಶ್ರೀಲಂಕಾ ನಾಳೆ ಏಷ್ಯಾಕಪ್ನಲ್ಲಿ ಮೈದಾನಕ್ಕಿಳಿಯಬೇಕಿದೆ. ಬಾಂಗ್ಲಾದೇಶಕ್ಕೆ ಸವಾಲೆಸೆಯಲು ಪಾಥುಮ್ ನಿಸ್ಸಾಂಕ, ದಿಮುತ್ ಕರುಣಾರತ್ನೆ ಮತ್ತು ಚರಿತ್ ಅಸಲಂಕಾ ರನ್ ಕಲೆಹಾಕುವ ಅಗತ್ಯವಿದೆ. ಭಾರತದ ವಿರುದ್ಧ ಶತಕ ಸಿಡಿಸಿದ್ದು ಬಿಟ್ಟರೆ ಇಡೀ ವರ್ಷ ಸಿಡಿದೇಳದ ನಾಯಕ ದಸುನ್ ಶನಕ ಬಾಂಗ್ಲಾ ವಿರುದ್ಧ ಫಾರ್ಮ್ಗೆ ಮರಳಲೇಬೇಕಿದೆ. ಬೌಲಿಂಗ್ನಲ್ಲಿ ಸ್ಪಿನ್ನರ್ ಮಹೇಶ್ ತೀಕ್ಷಣ ಮತ್ತು ವೇಗಿ ಕಸುನ್ ರಜಿತ ಮುಂಚೂಣಿಯಲ್ಲಿದ್ದು, ಯುವ ಬೌಲರ್ಗಳನ್ನು ತಮ್ಮೊಂದಿಗೆ ಕರೆದುಕೊಂಡು ಹೋಗುವ ಜವಾಬ್ದಾರಿ ಹೊಂದಿದ್ದಾರೆ.
ಬಾಂಗ್ಲಾ ತಂಡಕ್ಕೂ ಗಾಯದ ತಲೆನೋವು: ಬಾಂಗ್ಲಾದ ತಮೀಮ್ ಇಕ್ಬಾಲ್, ವೇಗಿ ಎಬಾಡೋಟ್ ಹೊಸೈನ್ ಮತ್ತು ವಿಕೆಟ್ ಕೀಪರ್-ಬ್ಯಾಟರ್ ಲಿಟ್ಟನ್ ದಾಸ್ ಏಷ್ಯಾಕಪ್ನಲ್ಲಿ ಗಾಯದ ಕಾರಣದಿಂದ ಹೊರಗುಳಿದಿದ್ದಾರೆ. ದಾಸ್ ಬದಲಿಗೆ 30 ವರ್ಷದ ವಿಕೆಟ್ ಕೀಪರ್ ಬ್ಯಾಟರ್ ಅನಾಮುಲ್ ಹಕ್ ಬಿಜೋಯ್ ಅವರನ್ನು ಆಯ್ಕೆ ಮಾಡಲಾಗಿದೆ. ಸಾಮಾನ್ಯವಾಗಿ ತವರಿನಲ್ಲಿ ಬಲಿಷ್ಠ ಶಕ್ತಿಯಾಗಿರುವ ಬಾಂಗ್ಲಾದೇಶ ಈ ವರ್ಷ ಇಂಗ್ಲೆಂಡ್ ಮತ್ತು ಅಫ್ಘಾನಿಸ್ತಾನ ವಿರುದ್ಧದ ಏಕದಿನ ಸರಣಿ ಸೋಲುಂಡಿತ್ತು. ಕೊನೆಯಲ್ಲಿ ಐರ್ಲೆಂಡ್ ವಿರುದ್ಧ ವಿಜಯ ಸಾಧಿಸಿತು.
ನಾಯಕ ಶಕೀಬ್ ಅಲ್ ಹಸನ್, ಮುಶ್ಫಿಕರ್ ರಹೀಮ್ ಮತ್ತು ನಜ್ಮುಲ್ ಶಾಂಟೊ ಈ ವರ್ಷ 400ಕ್ಕೂ ಹೆಚ್ಚು ರನ್ ಗಳಿಸಿದರೆ, ಯುವ ಆಟಗಾರ ತೌಹಿದ್ ಕೂಡ 300ಕ್ಕೂ ಹೆಚ್ಚು ರನ್ ಗಳಿಸಿರುವುದು ತಂಡಕ್ಕೆ ಭರವಸೆಯಾಗಿದೆ. ಆದರೆ ಈ ರೀತಿಯ ಪ್ರದರ್ಶನ ಐರ್ಲೆಂಡ್ ವಿರುದ್ಧ ಎಂಬುದು ಗಮನಾರ್ಹ. ಅನುಭವಿ ಮುಸ್ತಾಫಿಜುರ್ ರೆಹಮಾನ್, ಶೋರಿಫುಲ್ ಇಸ್ಲಾಂ ಮತ್ತು ತಸ್ಕಿನ್ ಅಹ್ಮದ್ ಬೌಲಿಂಗ್ನಲ್ಲಿ ಕಮಾಲ್ ಮಾಡಬೇಕಿದೆ. ಬೌಲರ್ಗಳೂ ಇಂಗ್ಲೆಂಡ್ ಮತ್ತು ಭಾರತದ ಮೇಲೆ ಪ್ರಭಾವ ಬೀರಿಲ್ಲ. ಎರಡೂ ತಂಡಗಳು ಈ ಎಲ್ಲಾ ಸಮಸ್ಯೆಗಳನ್ನು ಮೀರಿ ಗೆಲುವಿಗಾಗಿ ಹೋರಾಡಬೇಕಿದೆ.
ಶ್ರೀಲಂಕಾದಲ್ಲಿ ಮಳೆಯಾಗುವ ಮುನ್ಸೂಚನೆ ಇದ್ದು, ಟಾಸ್ ಗೆದ್ದವರು ಬೌಲಿಂಗ್ ಆಯ್ಕೆ ಮಾಡಿಕೊಂಡರೆ ಎರಡನೇ ಇನ್ನಿಂಗ್ಸ್ನಲ್ಲಿ ರನ್ರೇಟ್ ಆಧಾರದಲ್ಲಿ ಬ್ಯಾಟ್ ಮಾಡಲು ಅನುಕೂಲ ಆಗಲಿದೆ. ಈ ಪಂದ್ಯ ಗೆದ್ದವರಿಗೆ ಮತ್ತು ಸೋತವರಿಗೆ ಅಫ್ಘಾನಿಸ್ತಾನ ಎರಡನೇ ಎದುರಾಳಿ ಆಗಿರಲಿದೆ.
ಸಂಭಾವ್ಯ ತಂಡಗಳು ಇಂತಿವೆ.. ಶ್ರೀಲಂಕಾ: ಪಾತುಮ್ ನಿಸ್ಸಾಂಕ, ದಿಮುತ್ ಕರುಣಾರತ್ನೆ, ಕುಸಲ್ ಮೆಂಡಿಸ್, ಸದೀರ ಸಮರವಿಕ್ರಮ, ಚರಿತ್ ಅಸಲಂಕ, ಧನಂಜಯ ಡಿ ಸಿಲ್ವ, ದಸುನ್ ಶನಕ (ನಾಯಕ), ದುಶನ್ ಹೇಮಂತ, ಮಹೇಶ್ ತೀಕ್ಷಣ, ಮತೀಶ ಪತಿರಣ, ಕಸುನ್ ರಜಿತ
ಬಾಂಗ್ಲಾದೇಶ: ತಂಝಿದ್ ತಮೀಮ್, ನೈಮ್ ಶೇಖ್, ನಜ್ಮುಲ್ ಹೊಸೈನ್, ತೌಹಿದ್ ಹೃದಯೋಯ್, ಶಾಕಿಬ್ ಅಲ್ ಹಸನ್(ನಾಯಕ), ಮುಶ್ಫಿಕರ್ ರಹೀಮ್, ಮೆಹಿದಿ ಹಸನ್, ಮಹೇದಿ ಹಸನ್, ತಸ್ಕಿನ್ ಅಹ್ಮದ್, ಹಸನ್ ಮಹಮೂದ್, ಮುಸ್ತಫಿಜುರ್ ರೆಹಮಾನ್/ ಶೋರಿಫುಲ್ ಇಸ್ಲಾಂ.
ಪಂದ್ಯ: ಮಧ್ಯಾಹ್ನ 3ಕ್ಕೆ (ಭಾರತೀಯ ಕಾಲಮಾನ), ಪಲ್ಲೆಕೆಲೆ ಅಂತರರಾಷ್ಟ್ರೀಯ ಕ್ರಿಕೆಟ್ ಸ್ಟೇಡಿಯಂ, ಶ್ರೀಲಂಕಾ.
ಇದನ್ನೂ ಓದಿ: ಏಷ್ಯಾಕಪ್: ಬಾಬರ್, ಇಫ್ತಿಕರ್ ಶತಕದಾಟ; ಪಾಕಿಸ್ತಾನ ನೀಡಿದ ಈ ಗುರಿ ಸಾಧಿಸುವುದೇ ನೇಪಾಳ?
