ಲಾಹೋರ್: ಪಾಕಿಸ್ತಾನದ ಮಾಜಿ ಆಲ್ರೌಂಡರ್ ಶಾಹೀದ್ ಅಫ್ರಿದಿ 2022ರ ಪಿಎಸ್ಎಲ್ ಲೀಗ್ ತಮ್ಮ ಕೊನೆಯ ಆವೃತ್ತಿ ಎಂದು ಘೋಷಿಸಿದ್ದಾರೆ. ಮುಲ್ತಾನ್ ಸುಲ್ತಾನ್ನಿಂದ ಕ್ವೆಟ್ಟಾ ಗ್ಲಾಡಿಯೇಟರ್ ತಂಡಕ್ಕೆ ವರ್ಗಾವಣೆಗೊಂಡ ನಂತರ ಈ ವಿಷಯ ತಿಳಿಸಿದ್ದಾರೆ.
2021ರ ಆವೃತ್ತಿಯಲ್ಲಿ ಅಫ್ರಿದಿ ಮುಲ್ತಾನ್ ಸುಲ್ತಾನ್ನಲ್ಲಿ ಆಡಿದ್ದರು. ಪಿಸಿಬಿ ಮಾಹಿತಿಯ ಪ್ರಕಾರ ಇಂಗ್ಲೆಂಡ್ ಬ್ಯಾಟರ್ ಜೇಮ್ಸ್ ವಿನ್ಸ್ ಜೊತೆಗೆ ಅಫ್ರಿದಿ ಗ್ಲಾಡಿಯೇಟರ್ ತಂಡಕ್ಕೆ ಡೈಮಂಡ್ ಮತ್ತು ಸಿಲ್ವರ್ ಸುತ್ತಿನಲ್ಲಿ ವರ್ಗಾವಣೆಗೊಂಡಿದ್ದಾರೆ.
2019ರಲ್ಲಿ ಕೊನೆಯ ಹೆಚ್ಬಿಎಲ್ ಟ್ರೋಫಿ ಗೆದ್ದ ನಂತರ ಹಲವಾರು ಏಳು ಬೀಳನ್ನು ಕಂಡಿರುವ ಕ್ವೆಟ್ಟಾ ಗ್ಲಾಡಿಯೇಟರ್ ತಂಡ ಸೇರಿಕೊಳ್ಳುವುದಕ್ಕೆ ಉತ್ಸುಕನಾಗಿದ್ದೇನೆ. ಇದು ನನ್ನ ಕೊನೆಯ ಪಿಎಸ್ಎಲ್ ಆಗಿದ್ದು, ಪ್ರಶಸ್ತಿ ಜಯಿಸಿ ನಿವೃತ್ತಿಯಾಗುವುದು ನನ್ನ ಕನಸಾಗಿದೆ. 2017ರಲ್ಲಿ ಪೇಜಾವರ್ ಜಾಲ್ಮಿಯ ಪರ ಕೊನೆಯ ಬಾರಿ ಪ್ರಶಸ್ತಿ ಪಡೆದಿದ್ದು, ಮತ್ತೊಂದು ಟ್ರೋಫಿ ಎತ್ತಿ ಹಿಡಿಯಲು ಬಯಸಿದ್ದೇನೆ ಎಂದು ಪಿಸಿಬಿ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
44 ವರ್ಷದ ಶಾಹೀದ್ ಅಫ್ರಿದಿ 2010ರಲ್ಲಿ ಟೆಸ್ಟ್ ಕ್ರಿಕೆಟ್ಗೆ, 2015ರ ವಿಶ್ವಕಪ್ ನಂತರ ಏಕದಿನ ಹಾಗೂ 2017ರಲ್ಲಿ ಟಿ-20 ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ನಿವೃತ್ತಿ ಘೋಷಿಸಿದ್ದರು. ಆದರೆ ಇನ್ನೂ ಫ್ರಾಂಚೈಸಿ ಲೀಗ್ಗಳಲ್ಲಿ ಆಡುವುದನ್ನು ಮುಂದುವರಿಸಿದ್ದರು. ಇದೀಗ ಕೊನೆಯ ಪಿಎಸ್ಎಲ್ನಲ್ಲಿ ಆಡುತ್ತೇನೆಂದು ಘೋಷಿಸುವ ಮೂಲಕ ಎಲ್ಲಾ ಮಾದರಿಯ ಕ್ರಿಕೆಟ್ಗೆ ನಿವೃತ್ತಿಯಾಗುವುದಾಗಿ ಸುಳಿವು ನೀಡಿದ್ದಾರೆ.
ಇದನ್ನೂ ಓದಿ:ಬೋರ್ಡ್ ನೀಡಿದ್ದ 48 ಗಂಟೆ ಸಮಯದಲ್ಲಿ ನಾಯಕತ್ವ ತ್ಯಜಿಸದ ಕೊಹ್ಲಿ, ಬಲವಂತದಿಂದ ಕೆಳಗಿಳಿಸಿದ ಬಿಸಿಸಿಐ
