ನವದೆಹಲಿ: ಭಾರತದಲ್ಲಿ ನಡೆಯಲಿರುವ ಪಂದ್ಯಗಳ ಪ್ರಸಾರದ ಐದು ವರ್ಷಗಳ ಹಕ್ಕುಗಳನ್ನು ಪಡೆಯಲು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಟೆಂಡರ್ ಕರೆದಿದೆ. 2023 ರಿಂದ 2027ರ ವರೆಗಿನ ಪಂದ್ಯಗಳ ಡ್ರಾಫ್ಟ್ನ್ನು ಈ ವೇಳೆ ಬಿಡುಗಡೆ ಮಾಡಿದ್ದು, ಇದರಲ್ಲಿ ಭಾರತ ಇಂಗ್ಲೆಂಡ್ ಮತ್ತು ಆಸ್ಟ್ರೇಲಿಯಾವನ್ನು ಹೆಚ್ಚಿನ ಪಂದ್ಯಗಳಲ್ಲಿ ಎದುರಿಸಲಿದೆ. ಭಾರತ ತವರು ನೆಲದಲ್ಲಿ ಆಡಲಿರುವ 88 ಪಂದ್ಯಗಳಲ್ಲಿ 39ನ್ನು ಆಸಿಸ್ ಮತ್ತು ಇಂಗ್ಲೆಂಡ್ ವಿರುದ್ಧವೇ ಆಡಲಿದೆ.
ವಿಶ್ವಕಪ್ಗೆ ಮುನ್ನ ಭಾರತಕ್ಕೆ ಆಸ್ಟ್ರೇಲಿಯಾ ತಂಡ ಬರಲಿದ್ದು, 3 ಏಕದಿನ ಪಂದ್ಯಗಳ ಸರಣಿಯನ್ನು ಆಡಲಿದೆ. ನಂತರ ಅಕ್ಟೋಬರ್ 5ರಿಂದ ನವೆಂಬರ್ 19ರ ವರೆಗೆ ಏಕದಿನ ವಿಶ್ವಕಪ್ ನಡೆಯಲಿದೆ. ವಿಶ್ವಕಪ್ ನಂತರ ಆಸ್ಟ್ರೇಲಿಯಾದ ವಿರುದ್ಧ ಭಾರತ 2024ರ ಟಿ20 ವಿಶ್ವಕಪ್ ಹಿನ್ನೆಲೆಯಲ್ಲಿ 5 ಟಿ20 ಪಂದ್ಯಗಳನ್ನು ಆಡಲಿದೆ. ಈ ಐದು ಪಂದ್ಯಗಳು ನವೆಂಬರ್ 23 ರಿಂದ ಡಿಸೆಂಬರ್ 3ರ ವರೆಗೆ ನಡೆಯಲಿದೆ. 2027ರ ಜನವರಿ-ಮಾರ್ಚ್‌ನಲ್ಲಿ ಆಸ್ಟ್ರೇಲಿಯಾ ಐದು ಟೆಸ್ಟ್ ಪಂದ್ಯಕ್ಕಾಗಿ ಭಾರತಕ್ಕೆ ಬರಲಿದೆ.
ಭಾರತ ಪ್ರವಾಸದಲ್ಲಿ ಇಂಗ್ಲೆಂಡ್: 2024ರಲ್ಲಿ ಇಂಗ್ಲೆಂಡ್ ಜನವರಿ 25 ರಿಂದ ಮಾರ್ಚ್ 11ರ ವರೆಗೆ ಭಾರತದ ವಿರುದ್ಧ ಐದು ಟೆಸ್ಟ್‌ಗಳನ್ನು ಆಡಲು ಬರಲಿದೆ, ಇವುಗಳ ಸ್ಥಳಗಳು ಹೈದರಾಬಾದ್, ವಿಶಾಖಪಟ್ಟಣಂ, ರಾಜ್‌ಕೋಟ್, ರಾಂಚಿ ಮತ್ತು ಧರ್ಮಶಾಲಾ ಎಂದು ಹೇಳಲಾಗಿದೆ. 2025 ರ ಜನವರಿ ಮತ್ತು ಫೆಬ್ರವರಿಯಲ್ಲಿ ಎಂಟು ವೈಟ್ ಬಾಲ್ ಪಂದ್ಯಗಳು ನಡೆಯಲಿದೆ. ಅದರಲ್ಲಿ ಮೂರು ಏಕದಿನ ಮತ್ತು ಐದು ಟಿ20 ಪಂದ್ಯಗಳು ಇರಲಿದೆ. 2028ರ ಜನವರಿಯಿಂದ ಮಾರ್ಚ್‌ನಲ್ಲಿ ಇಂಗ್ಲೆಂಡ್ ಭಾರತದಲ್ಲಿ ಐದು ಟೆಸ್ಟ್‌ಗಳನ್ನು ಆಡುವುದರೊಂದಿಗೆ ಪ್ರಸಾರದ ಹಕ್ಕು ಮುಕ್ತಾಯವಾಗಲಿದೆ.
ಬಿಡ್ಡಿಂಗ್ ಬಗ್ಗೆ ಆಗುತ್ತಿರುವ ವಿಶ್ಲೇಷಣೆಯಲ್ಲಿ "ಆಸ್ಟ್ರೇಲಿಯಾ ಮತ್ತು ಇಂಗ್ಲೆಂಡ್ ವಿರುದ್ಧದ ಪಂದ್ಯಗಳು ಹೆಚ್ಚು ಗಮನಾರ್ಹವಾಗಿದೆ. ಇದು ಐದು ವರ್ಷದ ಋತುವಿನಲ್ಲಿ ಹೆಚ್ಚು ಗಮನ ಸೆಳೆಯುವ ಪಂದ್ಯಗಳು ಎಂದು ಪರಿಗಣಿಸಲಾಗುತ್ತದೆ. ವಿಶ್ವಕಪ್ಗೂ ಮುನ್ನ ಮತ್ತು ನಂತರ ನಡೆಯಲಿರುವ ಆಸ್ಟ್ರೇಲಿಯಾ ವಿರುದ್ಧದ ಸರಣಿಗಳು ಮೊದಲು ಆಕರ್ಷಕವಾಗಿ ಕಾಣಲಿದೆ. ವಿಶ್ವಕಪ್ನ ಪಂದ್ಯಗಳ ಪ್ರಸಾರಕ್ಕೆ ಈಗಾಗಲೇ ಮಾಧ್ಯಮಗಳು ಹೂಡಿಕೆ ಮಾಡಿರುವುದರಿಂದ ಬಿಸಿಸಿಐ ಬಿಡ್ಡಿಂಗ್ಗೆ ಹಣ ಒದಗಿಸುವುದು ಸಂಸ್ಥೆಗಳಿಗೆ ಸವಾಲಾಗಿದೆ" ಎಂದು ಹೇಳಲಾಗುತ್ತಿದೆ.
ಶ್ರೀಲಂಕಾ, ಅಫ್ಘಾನ್ ವಿರುದ್ಧ: ವೇಳಾಪಟ್ಟಿಯ ಪ್ರಕಾರ ಶ್ರೀಲಂಕಾವು 2026 ಡಿಸೆಂಬರ್ನಲ್ಲಿ ಭಾರತದಲ್ಲಿ ಒಂದು ಸರಣಿಯನ್ನು ಆಡಲಿದೆ. ಇದರಲ್ಲಿ ಮೂರು ಏಕದಿನ ಮತ್ತು ಮೂರು ಟಿ20 ಪಂದ್ಯಗಳನ್ನು ಆಡಲಾಗುವುದು. ಆದರೆ ಯಾವುದೇ ಟೆಸ್ಟ್ ಪಂದ್ಯಗಳು ಈ ಸರಣಿಯಲ್ಲಿ ಇಲ್ಲ. ಜನವರಿ 11, 14, ಮತ್ತು 17 ರಂದು ಮೊಹಾಲಿ, ಇಂದೋರ್ ಮತ್ತು ಬೆಂಗಳೂರಿನಲ್ಲಿ ಮೂರು ಟಿ20 ಆಡಲಾಗುವುದು. ಜೂನ್ 2026ರಲ್ಲಿ ಅಫ್ಘಾನಿಸ್ತಾನವು ಒಂದು ಟೆಸ್ಟ್ ಮತ್ತು ಮೂರು ಎಕದಿನ ಪಂದ್ಯಕ್ಕಾಗಿ ಭಾರತ ಪ್ರವಾಸ ಕೈಗೊಳ್ಳಲಿದೆ.
ದಕ್ಷಿಣ ಆಫ್ರಿಕಾ, ಕಿವೀಸ್ ವಿರುದ್ಧ: ನವೆಂಬರ್ ಮತ್ತು ಡಿಸೆಂಬರ್ 2025 ರಲ್ಲಿ ದಕ್ಷಿಣ ಆಫ್ರಿಕಾ ಎರಡು ಟೆಸ್ಟ್, ಮೂರು ಏಕದಿನ ಮತ್ತು ಐದು ಟಿ20 ಪಂದ್ಯಗಳನ್ನು ಆಡಲು ಭಾರತಕ್ಕೆ ಬರಲಿದೆ. ನ್ಯೂಜಿಲೆಂಡ್ 2024ರಲ್ಲಿ ಮತ್ತು 2026 ರ ಆರಂಭದಲ್ಲಿ ಕ್ರಮವಾಗಿ ಮೂರು ಟೆಸ್ಟ್ ಮತ್ತು ಎಂಟು ವೈಟ್ ಬಾಲ್ ಪಂದ್ಯಗಳನ್ನು ಆಡಲು ಭಾರತ ಪ್ರವಾಸವನ್ನು ಮಾಡಲಿದೆ.
ಬೃಹತ್ ಮೊತ್ತ ಸಾಧ್ಯತೆ: ಈ ಪ್ರಸಾರದ ಹಕ್ಕನ್ನೂ ಸಹ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಟಿವಿ ಮತ್ತು ಡಿಜಿಟಲ್ ಎಂದು ವಿಭಾಗ ಮಾಡಿ ಹರಾಜು ನಡೆಸಲಿದೆ. ಐಪಿಎಲ್ ಅನ್ನು ಈ ರೀತಿ ಹರಾಜು ಮಾಡಿದ್ದರಿಂದ ಬಿಸಿಸಿಐ ಲಾಭವನ್ನು ಮಾಡಿತ್ತು. 2023 ರಿಂದ 2028ರ ಮಾರ್ಚ ವರೆಗಿನ ಪ್ರಸಾರದ ಹಕ್ಕಿಗೆ ಭಾರತೀಯ ಕ್ರಿಕೆಟ್ ಮಂಡಳಿಯು USD 1 ಶತಕೋಟಿ ಅಂದರೆ ಭಾರತೀಯ ರೂಪಿಯಲ್ಲಿ 8200 ಕೋಟಿ ಗಳಿಸುವ ಅಂದಾಜು ಮಾಡಲಾಗುತ್ತಿದೆ. 2018ರ ಒಪ್ಪಂದದಲ್ಲಿ ಬಿಸಿಸಿಐ ಸ್ಟಾರ್ ಇಂಡಿಯಾದಿಂದ USD 944 ಮಿಲಿಯನ್ ಅಂದರೆ ₹ 6138 ಕೋಟಿ ಗಳಿಸಿತ್ತು. ಪ್ರತಿ ಅಂತಾರಾಷ್ಟ್ರೀಯ ಪಂದ್ಯಕ್ಕೆ 60 ಕೋಟಿ ರೂ. ಪಡೆದಂತಾಗಿತ್ತು. ಈ ಬಾರಿ ಇದನ್ನು ಮೀರುವ ಸಾಧ್ಯತೆ ಇದೆ.
ಪ್ರಾಯೋಜಕತ್ವದ ಬಿಡ್: ಬಿಸಿಸಿಐ ಇದರ ಜೊತೆಗೆ ಮೂರು ವರ್ಷಗಳ ಸರಣಿಯ ಶೀರ್ಷಿಕೆಯ ಟೈಟಲ್ ಅನ್ನು ಬಿಡ್ಗೆ ಕರೆದಿದೆ. ಈ ಹಿಂದೆ ಮಾಸ್ಟರ್ಕಾರ್ಡ್ ಸರಣಿಗಳ ಪ್ರಾಯೋಜಕತ್ವವನ್ನು ಹೊಂದಿತ್ತು.
ಇದನ್ನೂ ಓದಿ: ಟಿ- 20ಯಲ್ಲಿ ಅಲ್ಪ ಮೊತ್ತದ ಗುರಿಯೊಂದಿಗೆ ಟೀಂ ಇಂಡಿಯಾ ವಿರುದ್ಧ ಗೆಲುವು ಸಾಧಿಸಿದ ತಂಡಗಳು ಇವೇ ನೋಡಿ
