ಚೆನ್ನೈ: ಕೃಷ್ಣಪ್ಪ ಗೌತಮ್ ಮತ್ತು ರೋನಿತ್ ಮೋರೆ ಅವರ ಅದ್ಭುತ ಬೌಲಿಂಗ್ ನೆರವಿನಿಂದ ರೈಲ್ವೇಸ್ ತಂಡವನ್ನು 426 ರನ್ಗಳಿಗೆ ಕಟ್ಟಿಹಾಕುವಲ್ಲಿ ಯಶಸ್ವಿಯಾದ ಕರ್ನಾಟಕ ತಂಡ ಮೊದಲ ಇನ್ನಿಂಗ್ಸ್ನಲ್ಲಿ 55 ರನ್ಗಳ ಮುನ್ನಡೆ ಸಾಧಿಸಿದೆ.
ಮೊದಲು ಬ್ಯಾಟಿಂಗ್ ಮಾಡಿದ್ದ ರಾಜ್ಯ ತಂಡ ನಾಯಕ ಮನೀಶ್ ಪಾಂಡೆ(156) ಮತ್ತು ಕೆವಿ ಸಿದ್ಧಾರ್ಥ್(146) ಅವರ ಶತಕಗಳ ಸಹಿತ 481 ರನ್ಗಳಿಸಿತ್ತು.
ಈ ಮೊತ್ತವನ್ನು ಹಿಂಬಾಲಿಸಿ ರೈಲ್ವೇಸ್ ಕೂಡ ಬ್ಯಾಟಿಂಗ್ನಲ್ಲಿ ತಕ್ಕ ಉತ್ತರ ನೀಡಿ 426 ರನ್ಗಳಿಸಿತ್ತಾದರೂ, ಇನ್ನಿಂಗ್ಸ್ ಮುನ್ನಡೆ ಪಡೆದುಕೊಳ್ಳುವಲ್ಲಿ ವಿಫಲವಾಗಿದೆ. ವಿವೇಕ್ ಸಿಂಗ್ 59, ಅರಿಂದಮ್ ಘೋಷ್ 105, ಮೊಹಮ್ಮದ್ ಸೈಫ್ 84, ಯುವರಾಜ್ ಸಿಂಗ್ 48 ರನ್ಗಳಿಸಿದರು.
ಕರ್ನಾಟಕ ಪರ ಕೃಷ್ಣಪ್ಪ ಗೌತಮ್ 127ಕ್ಕೆ 4, ವಿದ್ಯಾದರ್ ಪಾಟೀಲ್ 77ಕ್ಕೆ 2, ರೋನಿತ್ ಮೋರೆ 67ಕ್ಕೆ 3 ಹಾಗೂ ಶ್ರೇಯಸ್ ಗೋಪಾಲ್ 68ಕ್ಕೆ 1 ವಿಕೆಟ್ ಪಡೆದು 55 ರನ್ಗಳ ಇನ್ನಿಂಗ್ಸ್ ಮುನ್ನಡೆ ಪಡೆದು 3 ಅಂಕ ಗಿಟ್ಟಿಸಿಕೊಳ್ಳವುದಕ್ಕೆ ನೆರವಾದರು.
55 ರನ್ಗಳ ಮೊದಲ ಇನ್ನಿಂಗ್ಸ್ ಮುನ್ನಡೆಯೊಂದಿಗೆ 2ನೇ ಇನ್ನಿಂಗ್ಸ್ ಆರಂಭಿಸಿರುವ ಕರ್ನಾಟಕ ತಂಡ 3ನೇ ದಿನದಂತ್ಯದ ವೇಳೆಗೆ ಒಂದು ವಿಕೆಟ್ ಕಳೆದುಕೊಂಡು 63 ರನ್ಗಳಿಸಿದೆ. ಮಯಾಂಕ್ ಅಗರ್ವಾಲ್ 39 ಮತ್ತು ಆರ್ ಸಮರ್ಥ್ 20 ರನ್ಗಳಿಸಿ ಬ್ಯಾಟಿಂಗ್ ಮಾಡುತ್ತಿದ್ದಾರೆ. ಮೊದಲ ಇನ್ನಿಂಗ್ಸ್ನಲ್ಲಿ ವೈಫಲ್ಯ ಅನುಭವಿಸಿದ್ದ ಪಡಿಕ್ಕಲ್ 2ನೇ ಇನ್ನಿಂಗ್ಸ್ನಲ್ಲೂ ಕೇವಲ 4 ರನ್ಗಳಿಸಿ ವಿಕೆಟ್ ಒಪ್ಪಿಸಿದರು.
ಇದನ್ನೂ ಓದಿ: ರಣಜಿಯಲ್ಲಿ ಟಿ20 ಆಟ : 148 ಎಸೆತಗಳಲ್ಲಿ 194 ರನ್ ಚಚ್ಚಿದ ಶಾರುಖ್ ಖಾನ್
