ಕೋಲ್ಕತ್ತಾ (ಪಶ್ಚಿಮ ಬಂಗಾಳ): ವಿಶ್ವಕಪ್ನಲ್ಲಿ ಪಾಕಿಸ್ತಾನ ಇನ್ನುಳಿದಿರುವ ಎಲ್ಲಾ ಪಂದ್ಯಗಳನ್ನೂ ಗೆದ್ದರೂ ಸೆಮಿಫೈನಲ್ ಪ್ರವೇಶಿಸಲು ಸಾಧ್ಯವಿಲ್ಲ. ಅಂಕಪಟ್ಟಿಯಲ್ಲಿ ಪಾಕ್ಕ್ಕಿಂತ ಮೇಲಿರುವ ತಂಡಗಳಿಗೆ ಒಂದೆರಡು ಸೋಲಾದರೆ ಮಾತ್ರ ಸೆಮೀಸ್ ಪ್ರವೇಶ ಸಾಧ್ಯ ಎಂಬ ಪರಿಸ್ಥಿತಿ ನಿರ್ಮಾಣವಾಗಿದೆ. ಪಾಕಿಸ್ತಾನದ ಈ ದುಸ್ಥಿತಿಗೆ ಭಾರತದ ಪರಿಸ್ಥಿತಿಗಳು ಕಾರಣ ಎಂದು ಆ ತಂಡದ ಮುಖ್ಯ ಕೋಚ್ ಗ್ರಾಂಟ್ ಬ್ರಾಡ್‌ಬರ್ನ್ ತಿಳಿಸಿದರು.
ಪಾಕಿಸ್ತಾನ ಮತ್ತೆ "ಕುಣಿಯಲಾರದವಳಿಗೆ ನೆಲ ಡೊಂಕು" ಎಂಬ ಗಾದೆಯಂತೆ ತನ್ನ ಹೇಳಿಕೆ ನೀಡಿದೆ. ವಿಶ್ವಕಪ್ ಪಂದ್ಯಗಳಲ್ಲಿ ಸತತ ನಾಲ್ಕು ಸೋಲು ಕಾಣಲು ಭಾರತದ ಪರಿಸ್ಥಿತಿಗಳು ಕಾರಣ. ಭಾರತೀಯ ಪರಿಸ್ಥಿತಿಗಳು ಮತ್ತು ಸ್ಥಳಗಳ ಪರಿಚಯದ ಕೊರತೆಯಿಂದ ಉತ್ತಮ ಪ್ರದರ್ಶನ ನೀಡಲು ಆಗುತ್ತಿಲ್ಲ ಎಂದು ಕೋಚ್ ಕಳಪೆ ಪ್ರದರ್ಶನಕ್ಕೆ ಸಮಜಾಯಿಷಿ ನೀಡಿದ್ದಾರೆ.
ನಾಳೆ (ಅ.31 ಮಂಗಳವಾರ) ಬಾಂಗ್ಲಾದೇಶದ ವಿರುದ್ಧ ಕೋಲ್ಕತ್ತಾದ ಈಡನ್ಗಾರ್ಡನ್ ಮೈದಾನದಲ್ಲಿ ನಡೆಯಲಿರುವ ಪಂದ್ಯಕ್ಕೂ ಮುನ್ನ ಮಾತನಾಡಿದ ಅವರು, "ನಾವು ಈ ರೀತಿಯ ಪರಿಸ್ಥಿತಿಯನ್ನು ಬಯಸಿರಲಿಲ್ಲ. ವಿಶ್ವಕಪ್ನಲ್ಲಿ ತಂಡದ ಪ್ರದರ್ಶನದ ಬಗ್ಗೆ ಎಲ್ಲರಿಗೂ ಬೇಸರವಿದೆ. ಭಾರತದ ಪರಿಸ್ಥಿತಿಯಲ್ಲಿ ನಾವು ಯಾವುದೇ ಪಂದ್ಯವನ್ನು ಆಡಿಲ್ಲ. ಎಲ್ಲಾ ಸ್ಥಳಗಳು ಆಟಗಾರರಿಗೆ ಹೊಸದು. ತಂಡ ಯಾವುದೇ ಎದುರಾಳಿಯ ಮೇಲೆ ಜಯ ದಾಖಲಿಸುವಷ್ಟು ಬಲಿಷ್ಠವಾಗಿದೆ. ಎಲ್ಲಾ ಆಟಗಾರರು ಅವರ ಪಾತ್ರವನ್ನು ಸರಿಯಾಗಿಯೇ ನಿಭಾಯಿಸುತ್ತಿದ್ದಾರೆ" ಎಂದರು.
"ತಂಡಕ್ಕೆ ಜ್ಞಾನ, ಗುಣಮಟ್ಟ, ಕೌಶಲ್ಯ ಹಾಗು ಬೆಂಬಲದ ವಿಷಯದಲ್ಲಿ ಉತ್ತಮವಾಗಿದೆ. ವಾಸ್ತವವೆಂದರೆ, ಪ್ರತಿಯೊಂದು ಸ್ಥಳವೂ ನಮಗೆ ಹೊಸದು. ಹೀಗಾಗಿ ಗೆಲುವಿನಲ್ಲಿ ಹಿನ್ನಡೆ ಅನುಭವಿಸುತ್ತಿದ್ದೇವೆ. ಇಂತಹ ಟೂರ್ನಿಗಳಿಗೆ ನಾಲ್ಕು ವರ್ಷದಷ್ಟು ಹಿಂದಿನಿಂದ ತಯಾರಿ ನಡೆಸಬೇಕಾಗುತ್ತದೆ. ನಮ್ಮ ತಂಡ ಕಳೆದ ಆರು ತಿಂಗಳಿನಿಂದ ತಯಾರಿ ಪ್ರಾರಂಭಿಸಿತು. ಆದರೆ ಆರು ತಿಂಗಳ ಹಿಂದೆ ಪಾಕ್ ತಂಡ ಏಕದಿನ ಕ್ರಿಕೆಟ್ನಲ್ಲಿ ಒಂದು ಬ್ರ್ಯಾಂಡ್ ಆಗಿತ್ತು. ಕಳೆದ ಆರು ತಿಂಗಳಲ್ಲಿ ನಾವು ಅದರ ಕೆಲವು ಸಕಾರಾತ್ಮಕ ಚಿಹ್ನೆಗಳನ್ನು ತೋರಿಸಿದ್ದೇವೆ. ನಮ್ಮ ಕೆಲವು ಪ್ರದರ್ಶನಗಳ ಬಗ್ಗೆ ಹೆಮ್ಮೆಪಡುತ್ತೇವೆ. ಪರಿಸ್ಥಿತಿಗೆ ಹೊಂದಿಕೊಂಡು ಉತ್ತಮ ಕ್ರಿಕೆಟ್ ಆಡಲು ಬಯಸುತ್ತೇವೆ" ಎಂದು ತಿಳಿಸಿದರು.
ವಿಶ್ವಕಪ್ನಲ್ಲಿ ಪಾಕಿಸ್ತಾನ ತಂಡ ಮೊದಲ ಎರಡು ಪಂದ್ಯಗಳನ್ನು ನೆದರ್ಲೆಂಡ್ಸ್ ಮತ್ತು ಶ್ರೀಲಂಕಾ ವಿರುದ್ಧ ಗೆದ್ದುಕೊಂಡಿತು. ನಂತರ ಭಾರತ, ಆಸ್ಟ್ರೇಲಿಯಾ, ಅಫ್ಘಾನಿಸ್ತಾನ ಮತ್ತು ದಕ್ಷಿಣ ಆಫ್ರಿಕಾದ ವಿರುದ್ದ ಸೋಲನುಭವಿಸಿತು. ಪಾಕ್ ಮುಂದೆ ಬಾಂಗ್ಲಾದೇಶ, ನ್ಯೂಜಿಲೆಂಡ್ ಮತ್ತು ಇಂಗ್ಲೆಂಡ್ ಸವಾಲು ಎದುರಿಸಲಿದೆ. ಈ ಮೂರೂ ಪಂದ್ಯಗಳನ್ನು ದೊಡ್ಡ ಅಂತರದಲ್ಲಿ ಗೆದ್ದು ರನ್ರೇಟ್ ಸಾಧಿಸಿದಲ್ಲಿ ಮಾತ್ರವೇ ಸೆಮೀಸ್‌ಗೆ ಅವಕಾಶ ತೆರೆದುಕೊಳ್ಳುವ ಸಾಧ್ಯತೆ ಇದೆ.
ಇದನ್ನೂ ಓದಿ: 'ನನಗೂ ಕ್ರಿಕೆಟ್‌ಗೂ ಯಾವುದೇ ಸಂಬಂಧವಿಲ್ಲ': ರತನ್ ಟಾಟಾ ಹೀಗೆ ಹೇಳಲು ಕಾರಣವೇನು?
