ಮುಂಬೈ: ಮಹಿಳಾ ಪ್ರೀಮಯರ್ ಲೀಗ್ನಲ್ಲಿ ಮುಂಬೈ ಇಂಡಿಯನ್ಸ್ ತಂಡ ತನ್ನ ಭರ್ಜರಿ ಪ್ರದರ್ಶನ ಮುಂದುವರೆಸಿದೆ. ಗುಜರಾತ್ ಜೈಂಟ್ಸ್ ವಿರುದ್ಧ 55 ರನ್ಗಳಿಂದ ಗೆಲುವು ಸಾಧಿಸಿದೆ. ಮೊದಲ ಬ್ಯಾಟಿಂಗ್ ಮಾಡಿದ್ದ ಮುಂಬೈ 20 ಓವರ್ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 162 ರನ್ ಪೇರಿತ್ತು. ಈ ಗುರಿ ಬೆನ್ನಟ್ಟಿದ ಗುಜರಾತ್ 9 ವಿಕೆಟ್ ನಷ್ಟಕ್ಕೆ 107 ರನ್ ಗಳಿಸಲು ಮಾತ್ರ ಶಕ್ತವಾಯಿತು. ಇದರಿಂದ ಆಡಿದ ಐದು ಪಂದ್ಯದಲ್ಲಿ ಹರ್ಮನ್ಪ್ರೀತ್ ಕೌರ್ ಪಡೆ ಗೆಲುವಿನ ನಗೆಬೀರಿದೆ.
ಮುಂಬೈ ಇಂಡಿಯನ್ಸ್ ಆಡುವ ತಂಡ: ಹೇಲಿ ಮ್ಯಾಥ್ಯೂಸ್, ಯಾಸ್ತಿಕಾ ಭಾಟಿಯಾ(ವಿಕೆಟ್ ಕೀಪರ್), ನ್ಯಾಟ್ ಸಿವರ್-ಬ್ರಂಟ್, ಹರ್ಮನ್ಪ್ರೀತ್ ಕೌರ್(ನಾಯಕಿ), ಧಾರಾ ಗುಜ್ಜರ್, ಅಮೆಲಿಯಾ ಕೆರ್, ಇಸ್ಸಿ ವಾಂಗ್, ಅಮಂಜೋತ್ ಕೌರ್, ಹುಮೈರಾ ಕಾಜಿ, ಜಿಂಟಿಮಣಿ ಕಲಿತಾ, ಸೈಕಾ ಇಶಾಕ್
ಗುಜರಾತ್ ಜೈಂಟ್ಸ್ ಆಡುವ ತಂಡ: ಸಬ್ಬಿನೇನಿ ಮೇಘನಾ, ಸೋಫಿಯಾ ಡಂಕ್ಲಿ, ಹರ್ಲೀನ್ ಡಿಯೋಲ್, ಆಶ್ಲೀಗ್ ಗಾರ್ಡನರ್, ದಯಾಲನ್ ಹೇಮಲತಾ, ಅನ್ನಾಬೆಲ್ ಸದರ್ಲ್ಯಾಂಡ್, ಸುಷ್ಮಾ ವರ್ಮಾ(ವಿಕೆಟ್ ಕೀಪರ್), ಕಿಮ್ ಗಾರ್ತ್, ತನುಜಾ ಕನ್ವರ್, ಸ್ನೇಹ ರಾಣಾ(ನಾಯಕಿ), ಮಾನ್ಸಿ ಜೋಶಿ
ಡಬಲ್ ರಾಬಿನ್ ರೌಡ್ನ ಒಂದು ಸುತ್ತಿನಲ್ಲಿ ಮುಂಬೈ ಎಲ್ಲರ ಮೇಲೆ ಗೆಲುವು ಸಾಧಿಸಿ ಅಂಕ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದೆ. ಉದ್ಘಾಟನಾ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ತಂಡ ಗುಜರಾತ್ ತಂಡವನ್ನು 143 ರನ್ಗಳ ಬೃಹತ್ ಅಂತರದಿಂದ ಮಣಿಸಿತ್ತು. ಮೊದಲ ಪಂದ್ಯದಲ್ಲೇ ನಾಯಕಿ ಹರ್ಮನ್ಪ್ರೀತ್ ಕೌರ್ 65 ರನ್ ಗಳಿಸಿದ್ದರು.
ಮುಂಬೈ ಇಂಡಿಯನ್ಸ್ ಎರಡನೇ ಪಂದ್ಯದಲ್ಲಿ ಬೆಂಗಳೂರು ತಂಡದ ವಿರುದ್ಧ 9 ವಿಕೆಟ್ನ ಭರ್ಜರಿ ಗೆಲುವು ದಾಖಲಿಸಿತ್ತು. ಬೆಂಗಳೂರು ತಂಡ ನೀಡಿದ್ದ 155 ರನ್ನ ಗುರಿಯನ್ನು 14ನೇ ಓವರ್ನಲ್ಲಿ ಪೂರ್ತಿ ಮಾಡಿತ್ತು. ನಂತರದ ಪಂದ್ಯದಲ್ಲಿ ಎರಡು ಗೆಲುವು ಸಾಧಿಸಿದ್ದ ಡೆಲ್ಲಿಯನ್ನು 105ಕ್ಕೆ ಕಟ್ಟಿಹಾಕಿ 15 ಓವರ್ಗಳಲ್ಲಿ 8 ವಿಕೆಟ್ನಿಂದ ಗೆಲುವು ಸಾಧಿಸಿತ್ತು. 12 ರಂದು ನಡೆದ ಯುಪಿ ವಾರಿಯರ್ಸ್ ಮೇಲೂ ಮುಂಬೈ ಇಂಡಿಯನ್ಸ್ ಸವಾರಿ ಮಾಡಿದ್ದರು. ನಾಲ್ಕು ಪಂದ್ಯಗಳನ್ನು ಗೆದ್ದಿರುವ ಎಂಐ ಚೊಚ್ಚಲ ಟೂರ್ನಿಯ ಬಲಿಷ್ಠತಂಡ ಎಂದು ಸಾಬೀತು ಮಾಡಿದೆ.
ಆರ್ಸಿಬಿ ಮೇಲೆ ಗೆದ್ದಿರುವ ಗುಜರಾತ್: ಮೊದಲ ಪಂದ್ಯದಲ್ಲಿ ಮುಂಬೈನಿಂದ ಹೀನಾಯವಾಗಿ ಸೋಲು ಕಂಡಿದ್ದ ಗುಜರಾತ್ ಜೈಂಟ್ಸ್ ಮತ್ತೆ ಸೋಲನ್ನೇ ಕಂಡಿದೆ. ಕೇವಲ ಒಂದು ಗೆಲುವು ಮಾತ್ರ ಗುಜರಾತ್ನ ಪಾಲಾಗಿದೆ. ಎರಡನೇ ಪಂದ್ಯದಲ್ಲಿ ಯುಪಿ ವಾರಿಯರ್ಸ್ ಎದುರಿಸಿದ್ದ ಗುಜರಾತ್ ರೋಚಕ ಹಂತದಲ್ಲಿ ಸೋಲು ಕಂಡಿತ್ತು. ಆರ್ಸಿಬಿ ಗುಜರಾತ್ಗೆ ಮೂರನೇ ಎದುರಾಳಿಯಾಗಿತ್ತು. ಈ ಪಂದ್ಯದ ವೇಳೆಗೆ ಆರ್ಸಿಬಿಯೂ ಎರಡು ಸೋಲು ಕಂಡಿತ್ತು. ಈ ಪಂದ್ಯದಲ್ಲಿ ಆರ್ಸಿಬಿಯನ್ನು 11 ರನ್ನಿಂದ ಗುಜರಾತ್ ಮಣಿಸಿ ಗೆಲುವಿನ ನಗೆ ಬೀರಿತ್ತು.
ಮೊದಲ ಮುಖಾಮುಖಿಯ ನೆನಪು: ಮೊದಲ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ತಂಡ 207 ರನ್ ಗಳಿಸಿತ್ತು. ಹೇಲಿ ಮ್ಯಾಥ್ಯೂಸ್ 47, ನ್ಯಾಟ್ ಸ್ಕಿವರ್-ಬ್ರಂಟ್ 23, ಹರ್ಮನ್ಪ್ರೀತ್ ಕೌರ್ 65 ಮತ್ತು ಅಮೆಲಿಯಾ ಕೆರ್ 47 ರನ್ ಗಳಿಸಿದ್ದರು. ಇದನ್ನೂ ಬೆನ್ನು ಹತ್ತಿದ ಗುಜರಾತ್ ಜೈಂಟ್ಸ್ ತಂಡ 64 ಕ್ಕೆ ತನ್ನೆಲ್ಲಾ ವಿಕೆಟ್ಗಳನ್ನು ಕಳೆದುಕೊಂಡಿತ್ತು. ಮುಂಬೈ ಇಂಡಿಯನ್ಸ್ ಪರ ಸೈಕಾ ಇಶಾಕ್ 4 ವಿಕೆಟ್ ಪಡೆದಿದ್ದರು.
ಇದನ್ನೂ ಓದಿ: ಮುಗಿಯದ ಆರ್ಸಿಬಿ ಗೋಳು, ಸತತ 5ನೇ ಸೋಲು: ಪ್ರಶಸ್ತಿ ರೇಸ್ನಿಂದ ಬಹುತೇಕ ಔಟ್!
