ಮ್ಯಾಂಚೆಸ್ಟರ್(ಲಂಡನ್): ಭಾರತ- ಇಂಗ್ಲೆಂಡ್ ನಡುವೆ ನಾಳೆ ಆರಂಭಗೊಳ್ಳಬೇಕಾಗಿರುವ ಪಂದ್ಯಕ್ಕೆ ಉಂಟಾಗಿದ್ದ ವಿಘ್ನ ನಿವಾರಣೆಗೊಂಡಿದ್ದು, ನಿಗದಿಯಾಗಿರುವಂತೆ ಮ್ಯಾಂಚೆಸ್ಟರ್ ಮೈದಾನದಲ್ಲಿ ಫೈನಲ್ ಪಂದ್ಯ ನಡೆಯಲಿದೆ ಎಂದು ವರದಿಯಾಗಿದೆ.
ಟೀಂ ಇಂಡಿಯಾದ ಜೂನಿಯರ್ ಫಿಜಿಯೋ ಯೋಗೇಶ್ ಪರ್ಮಾರ್ಗೆ ಕೊರೊನಾ ಸೋಂಕು ದೃಢಗೊಂಡಿರುವ ಕಾರಣ, ನಾಳೆಯಿಂದ ಆರಂಭಗೊಳ್ಳಲಿರುವ ಮ್ಯಾಂಚೆಸ್ಟರ್ ಟೆಸ್ಟ್ ಪಂದ್ಯ ಅನುಮಾನ ಮೂಡಿಸಿತ್ತು. ಇದೀಗ ಎಲ್ಲ ಪ್ಲೇಯರ್ಸ್ಗೆ ನಡೆಸಲಾಗಿರುವ ಆರ್ಟಿ-ಪಿಸಿಆರ್ ವರದಿ ಬಂದಿದ್ದು, ಎಲ್ಲರ ವರದಿ ನೆಗೆಟಿವ್ ಆಗಿರುವ ಕಾರಣ ಪಂದ್ಯ ನಡೆಯಲಿದೆ.
ನಾಲ್ಕನೇ ಟೆಸ್ಟ್ ಪಂದ್ಯ ವೇಳೆ ತಂಡದ ಕೋಚ್ ರವಿಶಾಸ್ತ್ರಿ, ಬೌಲಿಂಗ್ ಕೋಚ್ ಭರತ್ ಅರುಣ್, ಫೀಲ್ಡಿಂಗ್ ಕೋಚ್ ಆರ್.ಶ್ರೀಧರ್ ಹಾಗೂ ಫಿಸಿಯೋ ನಿತಿನ್ ಪಟೇಲ್ ಅವರಿಗೆ ಕೊರೊನಾ ದೃಢಗೊಂಡಿದ್ದು, 10 ದಿನಗಳ ಕಾಲ ಐಸೋಲೇಷನ್ ಮಾಡಲಾಗಿದೆ. ಇದರ ಬೆನ್ನಲ್ಲೇ ತಂಡದ ಜೂನಿಯರ್ ಫಿಜಿಯೋ ಯೋಗೇಶ್ ಪರ್ಮಾರ್ಗೆ ಸೋಂಕು ದೃಢಗೊಂಡಿದ್ದ ಕಾರಣ, ಎಲ್ಲ ಪ್ಲೇಯರ್ಸ್ಗೆ ಹೋಟೆಲ್ನಲ್ಲಿ ಇರುವಂತೆ ಸೂಚನೆ ನೀಡಲಾಗಿತ್ತು. ಇದರ ಬೆನ್ನಲ್ಲೇ ಅವರಿಗೆ ಕೊರೊನಾ ಟೆಸ್ಟ್ ನಡೆಸಲಾಗಿತ್ತು.
ಇದೀಗ ಎಲ್ಲರ ವರದಿ ಹೊರಬಿದ್ದಿದ್ದು, ಅದು ನೆಗೆಟಿವ್ ಆಗಿರುವ ಕಾರಣ ನಾಳೆ ಮಧ್ಯಾಹ್ನ 3:30 (ಭಾರತೀಯ ಕಾಲಮಾನ)ಕ್ಕೆ ಪಂದ್ಯ ಆರಂಭಗೊಳ್ಳಲಿದೆ. ಐದು ಪಂದ್ಯಗಳ ಟೆಸ್ಟ್ ಪಂದ್ಯದಲ್ಲಿ ಟೀಂ ಇಂಡಿಯಾ ಈಗಾಗಲೇ 2-1 ಅಂತರದ ಮುನ್ನಡೆಯಲಿದೆ.
