ಹೈದರಾಬಾದ್ (ತೆಲಂಗಾಣ): ಸತತ ಎರಡು ಸೋಲಿಗಳಿಂದ ಕಂಗೆಟ್ಟಿದ್ದ ಸನ್ರೈಸರ್ಸ್ ಹೈದರಾಬಾದ್ ತಂಡ ಇಂದು ತವರಿನಲ್ಲಿ ನಡೆದ ಪಂಜಾಬ್ ಕಿಂಗ್ಸ್ ವಿರುದ್ಧದ ಪಂದ್ಯದಲ್ಲಿ ಭರ್ಜರಿ ಗೆಲುವು ದಾಖಲಿಸಿದೆ. ಬಿಗಿ ಬೌಲಿಂಗ್ ಮತ್ತು ಬ್ಯಾಟಿಂಗ್ ಮೂಲಕ ಹೈದರಾಬಾದ್ ಎಂಟು ವಿಕೆಟ್ಗಳಿಂದ ಜಯ ಸಾಧಿಸಿದೆ. ಪಾದಾರ್ಪಣೆ ಪಂದ್ಯದಲ್ಲೇ 4 ವಿಕೆಟ್ ಉರುಳಿಸಿದ ಮಯಾಂಕ್ ಮಾರ್ಕಂಡೆ ಮತ್ತು ಅಜೇಯ 74 ರನ್ ಸಿಡಿಸಿದ ರಾಹುಲ್ ತ್ರಿಪಾಠಿ ತಂಡದ ಗೆಲುವಿನ ರೂವಾರಿಗಳಾದರು.
ಇಲ್ಲಿನ ರಾಜೀವ್ ಗಾಂಧಿ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದ ಹೈದರಾಬಾದ್ ಮೊದಲ ಬೌಲಿಂಗ್ ಮಾಡಿಕೊಂಡಿತ್ತು. ಇದರಿಂದ ಬ್ಯಾಟಿಂಗ್ಗೆ ಇಳಿದ ಪಂಜಾಬ್ ತಂಡವು ನಾಯಕ ಶಿಖರ್ ಧವನ್ ಅವರ 99 ರನ್ಗಳ ಅಜೇಯ ಆಟದ ನಡುವೆಯೂ 20 ಓವರ್ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ ಕೇವಲ 143 ರನ್ಗಳನ್ನು ಕಲೆಹಾಕಿತು. ಈ ಸಾಧಾರಣ ಗುರಿಯನ್ನು ಹೈದರಾಬಾದ್ ಕೇವಲ 2 ವಿಕೆಟ್ ನಷ್ಟಕ್ಕೆ 17.1 ಓವರ್ಗಳಲ್ಲಿ ತಲುಪಿತು.
ಸನ್ರೈಸರ್ಸ್ ಪರ ಆರಂಭಿಕ ಆಟಗಾರರಾದ ಹ್ಯಾರಿ ಬ್ರೂಕ್ 13 ಮತ್ತು ಮಯಾಂಕ್ ಅಗರ್ವಾಲ್ 21 ರನ್ ಬಾರಿಸಿ ವಿಕೆಟ್ ಒಪ್ಪಿಸಿದರು. ನಂತರದಲ್ಲಿ ರಾಹುಲ್ ತ್ರಿಪಾಠಿ ಹಾಗೂ ನಾಯಕ ಏಡೆನ್ ಮಾರ್ಕ್ರಾಮ್ ಭರ್ಜರಿ ಬ್ಯಾಟಿಂಗ್ ಪ್ರದರ್ಶಿಸಿದರು. ಅದರಲ್ಲೂ ತ್ರಿಪಾಠಿ 48 ಎಸೆತಗಳಲ್ಲಿ 10 ಬೌಂಡರಿ ಮತ್ತು ಮೂರು ಸಿಕ್ಸರ್ಗಳೊಂದಿಗೆ 74 ರನ್ ಸಿಡಿಸಿ ಅಜೇಯರಾಗಿ ಉಳಿದರು. ನಾಯಕ ಮಾರ್ಕ್ರಾಮ್ 21 ಬಾಲ್ಗಳಲ್ಲಿ 6 ಬೌಂಡರಿಗಳ ನೆರವಿನೊಂದಿಗೆ ಅಜೇಯ 37 ರನ್ ಬಾರಿಸಿ ತಂಡದ ಗೆಲುವಿಗೆ ಕಾಣಿಕೆ ನೀಡಿದರು. ಪಂಜಾಬ್ ಪರ ಆರ್ಷದೀಪ್ ಸಿಂಗ್ ಮತ್ತು ರಾಹುಲ್ ಚಹಾರ್ ತಲಾ ಒಂದು ವಿಕೆಟ್ ಪಡೆದರು.
ಇದಕ್ಕೂ ಮುನ್ನ ಸನ್ರೈಸರ್ಸ್ ಹೈದರಾಬಾದ್ ತಂಡಕ್ಕೆ ಪಾದಾರ್ಪಣೆ ಮಾಡಿದ ಪಂದ್ಯದಲ್ಲೇ 4 ವಿಕೆಟ್ ಉರುಳಿಸಿದ ಮಯಾಂಕ್ ಮಾರ್ಕಂಡೆ ಪಂಜಾಬ್ ತಂಡವನ್ನು 143 ರನ್ಗೆ ಕಟ್ಟಿಹಾಕುವಲ್ಲಿ ಪ್ರಮುಖ ಪಾತ್ರವಹಿಸಿದರು. ಒಂದೆಡೆ ವಿಕೆಟ್‌ಗಳು ಉರುಳುತ್ತಿದ್ದಂತೆ ಪಂಜಾಬ್ ನಾಯಕ ಶಿಖರ್ ಧವನ್ ಜವಾಬ್ದಾರಿಯುತವಾಗಿ ಕ್ರೀಸ್ ಕಚ್ಚಿ ನಿಂತು ಆಕರ್ಷಕ 99 ರನ್ ಕಲೆ ಹಾಕಿದರು.
ಪಂಜಾಬ್ ಕಿಂಗ್ಸ್ಗೆ ಆರಂಭಿಕ ಆಘಾತ ನೀಡಿದ ಭುವನೇಶ್ವರ್ ಕುಮಾರ್ ಮೊದಲ ಓವರ್ನ ಮೊದಲ ಎಸೆತದಲ್ಲಿ ಪ್ರಭ್‌ಸಿಮ್ರಾನ್ ಸಿಂಗ್ ಎಲ್ಬಿಡಬ್ಲ್ಯೂಗೆ ಬಲಿಯಾದರು. ನಂತರ ಬಂದ ಮ್ಯಾಥ್ಯೂ ಶಾರ್ಟ್ (1) ಮತ್ತು ಜಿತೇಶ್ ಶರ್ಮಾ (4) ಬೇಗನೇ ಪೆವಿಲಿಯನ್ಗೆ ಸೇರಿದರು. ಈ ನಡುವೆ ಸ್ಯಾಮ್ ಕರ್ರಾನ್, ನಾಯಕ ಶಿಖರ್ ಧವನ್ ಜೊತೆ ಸೇರಿ 40 ರನ್ ಜೊತೆಯಾಟ ನೀಡಿದರು. 15 ಎಸೆತಗಳಲ್ಲಿ 22 ರನ್ ಗಳಿಸಿ ಆಡುತ್ತಿದ್ದ ಸ್ಯಾಮ್ ಅವರನ್ನು ಮಯಾಂಕ್ ಮಾರ್ಕಂಡೆ ಔಟ್ ಮಾಡಿದರು. ಸತತ ವಿಕೆಟ್ ಪತನದಿಂದ ಕಂಗೆಟ್ಟ ಪಂಜಾಬ್ ತಂಡ ಸಿಕಂದರ್ ರಾಜಾ ಅವರನ್ನು ಪ್ರಭಾವಿ ಆಟಗಾರನಾಗಿ ತಂಡಕ್ಕೆ ಸೇರಿಸಿತು. ಆದರೆ, ಸಿಕಂದರ್ ಕೇವಲ 5 ರನ್ಗೆ ವಿಕೆಟ್ ಒಪ್ಪಿಸಿ ಹೊರ ನಡೆದರು.
ಕೆಳ ಕ್ರಮಾಂಕದ ಶಾರುಖ್ ಖಾನ್ (4), ಹರ್‌ಪ್ರೀತ್ ಬ್ರಾರ್(1), ರಾಹುಲ್ ಚಾಹರ್(0), ನಾಥನ್ ಎಲ್ಲಿಸ್ (0) ಪೆವಿಲಿಯನ್ ಪರೇಡ್ ನಡೆಸಿದರು. 14ನೇ ಓವರ್ಗೆ 9 ವಿಕೆಟ್‌ಗಳನ್ನು ಪಂಜಾಬ್ ಕಳೆದುಕೊಂಡಿತ್ತು. ಹತ್ತನೇ ವಿಕೆಟ್ ಆಗಿ ಬಂದ ಮೋಹಿತ್ ರಥಿ (1) ನಾಯಕನ ಜೊತೆ 50 ರನ್ ಜೊತೆಯಾಟ ಕೊಟ್ಟರು. ಅಂತಿಮವಾಗಿ ಪಂಜಾಬ್ 9 ವಿಕೆಟ್ ನಷ್ಟಕ್ಕೆ 143 ರನ್ ಗಳಿಸಿತ್ತು. ಸನ್ ರೈಸರ್ಸ್ ಪರ ಮಯಾಂಕ್ ಮಾರ್ಕಂಡೆ 4, ಉಮ್ರಾನ್ ಮಲಿಕ್ ಮತ್ತು ಮಾರ್ಕೊ ಜಾನ್ಸೆನ್ ತಲಾ 2 ಹಾಗೂ ಭುವನೇಶ್ವರ್ ಕುಮಾರ್ ಒಂದು ವಿಕೆಟ್ ಕಬಳಿಸಿದರು.
