ಜೋಹಾನ್ಸಬರ್ಗ್: ಐಪಿಎಲ್ನಲ್ಲಿ ಆಡುತ್ತಿದ್ದ ದಕ್ಷಿಣ ಆಫ್ರಿಕಾ ಕ್ರಿಕೆಟರ್ ಮತ್ತು ರಾಜಸ್ಥಾನ ರಾಯಲ್ಸ್ ತಂಡದ ಆಲ್ ರೌಂಡರ್ ಕ್ರಿಸ್ ಮಾರಿಸ್ ತಾವು ತವರಿಗೆ ಮರಳಿದ್ದಕ್ಕೆ ನಿಟ್ಟುಸಿರು ಬಿಟ್ಟಿದ್ದಾರೆ. ಐಪಿಎಲ್ ಬಯೋ ಬಬಲ್ನಲ್ಲಿದ್ದ ಆಟಗಾರರಿಗೂ ಕೊರೊನಾ ಸೋಂಕು ತಗುಲಿದ ನಂತರ ಉಂಟಾದ ಗೊಂದಲದಿಂದ ಪಾರಾದ ಬಗ್ಗೆ ಅವರು ಈಗ ನಿರಾಳರಾಗಿದ್ದಾರೆ.
ಭಾರತದಲ್ಲಿ ನಡೆಯುತ್ತಿದ್ದ ಐಪಿಎಲ್ನಲ್ಲಿ ಭಾಗಿಯಾಗಿದ್ದ ನಾಲ್ವರು ಆಟಗಾರರು ಹಾಗೂ ಇಬ್ಬರು ಕೋಚ್ಗಳಿಗೆ ಕೊರೊನಾ ಸೋಂಕು ತಗುಲಿದ ನಂತರ ಐಪಿಎಲ್ ಪಂದ್ಯಾವಳಿಯನ್ನು ಅರ್ಧಕ್ಕೆ ಮೊಟಕುಗೊಳಿಸಿ, ಮುಂದೂಡಲಾಗಿತ್ತು. ಹೀಗಾಗಿ ಮಾರಿಸ್ ತಮ್ಮ ದೇಶದ ಇತರ 10 ಆಟಗಾರರೊಂದಿಗೆ ದಕ್ಷಿಣ ಆಫ್ರಿಕಾಗೆ ಮರಳಿದ್ದಾರೆ.
"ನಿಜ, ನಾನೀಗ ಸಾಕಷ್ಟು ನಿರಾಳನಾಗಿದ್ದೇನೆ. ಬಯೋಬಬಲ್ ನಲ್ಲಿದ್ದ ಆಟಗಾರರಿಗೂ ಸೋಂಕು ಕಾಣಿಸಿಕೊಳ್ಳಲಾರಂಭಿಸಿದಾಗ ಸಹಜವಾಗಿಯೇ ಬಯೋಬಬಲ್ ಬಗ್ಗೆ ಎಲ್ಲರೂ ಪ್ರಶ್ನೆ ಕೇಳಲಾರಂಭಿಸಿದರು. ಎಲ್ಲರೂ ಇದರಿಂದ ಖಂಡಿತವಾಗಿಯೂ ಆತಂಕಕ್ಕೊಳಗಾದರು. ಕೋಲ್ಕತ್ತಾ ಮತ್ತು ರಾಯಲ್ ಚಾಲೆಂಜರ್ಸ್ ಮಧ್ಯೆ ನಡೆಯಬೇಕಿದ್ದ ಪಂದ್ಯವನ್ನು ಅವರು ಮುಂದೂಡಿದಾಗ ಇಡೀ ಪಂದ್ಯಾವಳಿಯೇ ಮುಂದೂಡಲ್ಪಡುವ ಒತ್ತಡದಲ್ಲಿದೆ ಎಂಬುದು ನಮಗೆ ತಿಳಿದಿತ್ತು." ಎಂದು ಕ್ರಿಸ್ ಮಾರಿಸ್ ಮಾಧ್ಯಮಗಳಿಗೆ ಹೇಳಿದ್ದಾರೆ. ಸದ್ಯ ಮಾರಿಸ್ ತಮ್ಮ ಮನೆಯಲ್ಲಿ 10 ದಿನಗಳ ಕ್ವಾರಂಟೈನ್ನಲ್ಲಿದ್ದಾರೆ.
