ಚೆನ್ನೈ (ತಮಿಳುನಾಡು): ಭಾರತ ಮತ್ತು ಮುಂಬೈ ಇಂಡಿಯನ್ಸ್ (MI) ನಾಯಕ ರೋಹಿತ್ ಶರ್ಮಾ ಶನಿವಾರ ತಮ್ಮ ಹೆಸರಿಗೆ ಅನಗತ್ಯ ದಾಖಲೆಯೊಂದನ್ನು ಬರೆದಿದ್ದಾರೆ. ಇಂಡಿಯನ್ ಪ್ರೀಮಿಯರ್ ಲೀಗ್‌ನ ಇತಿಹಾಸದಲ್ಲಿ ಅತಿ ಹೆಚ್ಚು ಡಕ್ಗೆ ಔಟ್ ಆದ ಆಟಗಾರ ಎಂಬ ದಾಖಲೆ ಬರೆದರು. ಶನಿವಾರ ಚೆನ್ನೈ ಸೂಪರ್ ಕಿಂಗ್ಸ್ (CSK) ವಿರುದ್ಧದ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2023 ರ ಪಂದ್ಯದಲ್ಲಿ ಅನುಭವಿ ಬ್ಯಾಟರ್ ರೋಹಿತ್ ಈ ದಾಖಲೆ ಮಾಡಿದ್ದಾರೆ.
ಮುಂಬೈ ಇಂಡಿಯನ್ಸ್ನ ಆರಂಭಿಕರಲ್ಲಿ ಇಂದು ಬದಲಾವಣೆ ಮಾಡಲಾಯಿತು. ಧೋನಿ ಅವರ ಪ್ರಯೋಗದಿಂದ ಆರಂಭಿಕ ಬ್ಯಾಟರ್ ಆಗಿ ಬಡ್ತಿ ಪಡೆದ ರೋಹಿತ್ ಶರ್ಮಾ ನಂತರ ಅಂತಾರಾಷ್ಟ್ರೀಯ ಹಾಗೂ ಲೀಗ್ ಪಂದ್ಯದಲ್ಲಿ ಆರಂಭಿಕರಾಗಿಯೇ ಕಣಕ್ಕಿಳಿಯುತ್ತಿದ್ದಾರೆ. ಆದರೆ, ಇಂದು ರೋಹಿತ್ ಶರ್ಮಾ ಬದಲಾಗಿ ಇಶಾನ್ ಕಿಶನ್ ಜೊತೆ ಆಸ್ಟ್ರೇಲಿಯದ ಆಲ್ ರೌಂಡರ್ ಕ್ಯಾಮರೂನ್ ಗ್ರೀನ್ ಇನ್ನಿಂಗ್ಸ್ ಆರಂಭಿಸಿದರು. ಮೂರನೇ ಸ್ಥಾನದಲ್ಲಿ ಬರುವ ಗ್ರೀನ್ಗೆ ರೋಹಿತ್ ಬಡ್ತಿ ನೀಡಿ ಆರಂಭಿಕರಾಗಿ ಮೈದಾನಕ್ಕಿಳಿಸಿದರು.
ಆದರೆ, ಮುಂಬೈ ಇಂಡಿಯನ್ಸ್ನ ಈ ಪ್ರಯೋಗ ಫಲ ನೀಡಲಿಲ್ಲ. ಕಳೆದ ಪಂದ್ಯಗಳಲ್ಲಿ ತಂಡಕ್ಕೆ ಆಸರೆಯಾಗಿದ್ದ ಗ್ರೀನ್ ಆರಂಭಿಕರಾಗಿ 6 ರನ್ ಗಳಿಸಿದ್ದಾಗ ತುಷಾರ್ ದೇಶಪಾಂಡೆಗೆ ವಿಕೆಟ್ ಕೊಟ್ಟರು. ಇವರ ಬೆನ್ನಲ್ಲೇ ಆರಂಭಿಕ ಇಶಾನ್ ಕಿಶನ್ ಸಹ 7 ರನ್ಗೆ ಔಟ್ ಆದರು. ನಾಯಕ ರೋಹಿತ್ ಶರ್ಮಾ ಗ್ರೀನ್ ವಿಕೆಟ್ ಪಡೆದ ನಂತರ ಮೂರನೇ ಬ್ಯಾಟರ್ ಆಗಿ ಕ್ರೀಸ್ಗೆ ಬಂದರು. ಇಂದು ಮೂರು ಬಾಲ್ ಎದುರಿಸಿದ ರೋಹಿತ್ ಶರ್ಮಾ ಶೂನ್ಯಕ್ಕೆ ವಿಕೆಟ್ ಒಪ್ಪಿಸಿದರು.
ಇದು ಐಪಿಎಲ್ನಲ್ಲಿ ರೋಹಿತ್ ಶರ್ಮಾ ಅವರ 16 ನೇ ಡಕ್ ಔಟ್ ಆಗಿದೆ. ಇಂಡಿಯನ್ ಪ್ರೀಮಿಯರ್ ಲೀಗ್ನಲ್ಲಿ ಅತೀ ಹೆಚ್ಚು ಡಕ್ಗೆ ಔಟ್ ಆದ ಆಟಗಾರ ಎಂಬ ದಾಖಲೆಗೆ ರೋಹಿತ್ ಸೇರಿದರು. ವೆಸ್ಟ್ ಇಂಡೀಸ್‌ನ ಆಲ್‌ರೌಂಡರ್ ಸುನಿಲ್ ನರೈನ್, ಭಾರತದ ಬ್ಯಾಟ್ಸ್‌ಮನ್‌ಗಳಾದ ದಿನೇಶ್ ಕಾರ್ತಿಕ್ ಮತ್ತು ಮನ್‌ದೀಪ್ ಸಿಂಗ್ ತಲಾ 15 ಬಾರಿ ಡಕ್ ಔಟ್ ಆಗಿದ್ದು ಎರಡನೇ ಸ್ಥಾನದಲ್ಲಿದ್ದಾರೆ.
ಮುಂಬೈ ಇಂಡಿಯನ್ಸ್ ನಾಯಕ ರೋಹಿತ್ ಶರ್ಮಾ ಈ ಆವೃತ್ತಿಯ ಐಪಿಎಲ್ನಲ್ಲಿ ಉತ್ತಮ ಫಾರ್ಮ್ನಲ್ಲಿಲ್ಲ. ಅವರು ಈ ವರೆಗೆ ಆಡಿದ 10 ಪಂದ್ಯಗಳಲ್ಲಿ, ಅವರು 18.40 ರ ಸರಾಸರಿಯಲ್ಲಿ ಮತ್ತು 129.58 ರ ಸ್ಟ್ರೈಕ್ ರೇಟ್ನಲ್ಲಿ 184 ರನ್‌ಗಳನ್ನು ಮಾತ್ರ ಗಳಿಸಿದ್ದಾರೆ. 10 ಪಂದ್ಯದಲ್ಲಿ ಹಿಟ್ ಮ್ಯಾನ್ ಎಂದು ಖ್ಯಾತರಾಗಿರುವ ರೋಹಿತ್ ಬ್ಯಾಟ್ನಿಂದ ಒಂದು ಅರ್ಧಶತಕ ಮಾತ್ರ ದಾಖಲಾಗಿದೆ. ಅವರ ಈ ಸೀಸನ್ನ ಅತ್ಯುತ್ತಮ ಸ್ಕೋರ್ 65 ಆಗಿದೆ.
ದೀಪಕ್ ಚಹಾರ್ಗೆ ಮೂರನೇ ಬಾರಿಗೆ ಔಟ್: ಚೆನ್ನೈನ ಮಧ್ಯಮ ವೇಗಿ ದೀಪಕ್ ಚಹಾರ್ ಬೌಲಿಂಗ್ನಲ್ಲಿ ರೋಹಿತ್ ಶರ್ಮಾ ಮೂರನೇ ಬಾರಿ ವಿಕೆಟ್ ಕೊಟ್ಟರು. ಒಟ್ಟಾರೆ ಐಪಿಎಲ್ನಲ್ಲಿ ಚಹಾರ್ ಅವರ 49 ಬಾಲ್ ಎದುರಿಸಿರುವ ರೋಹಿತ್ 122.44 ರ ಸ್ಟ್ರೈಕ್ ರೇಟ್ನಲ್ಲಿ 60 ರನ್ ಗಳಿಸಿದ್ದು, 3 ಬಾರಿ ವಿಕೆಟ್ ಒಪ್ಪಿಸಿದ್ದಾರೆ.
ಇದನ್ನೂ ಓದಿ: IPLನಲ್ಲಿ ಇಂದು: ಡಿಸಿ ವಿರುದ್ಧ ಜಯದ ನಿರೀಕ್ಷೆಯಲ್ಲಿ ಆರ್‌ಸಿಬಿ, ತವರಿನಲ್ಲಿ ವಿಜೃಂಭಿಸುವರೇ ಕೊಹ್ಲಿ?
