ಮುಂಬೈ: ಇಂಡಿಯನ್ ಪ್ರೀಮಿಯರ್ ಲೀಗ್ನ ಇಂದಿನ ಪಂದ್ಯದಲ್ಲಿ ಲಖನೌ ತಂಡದ ವಿರುದ್ಧ 18 ರನ್ಗಳ ಗೆಲುವು ದಾಖಲು ಮಾಡಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ, ಪಾಯಿಂಟ್ ಪಟ್ಟಿಯಲ್ಲಿ 2ನೇ ಸ್ಥಾನಕ್ಕೆ ಲಗ್ಗೆ ಹಾಕಿದೆ.
ಮುಂಬೈನ ಡಿವೈ ಪಾಟೀಲ್ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಸೋತು ಬ್ಯಾಟಿಂಗ್ ಇಳಿದಿದ್ದ ಆರ್ಸಿಬಿ ಇಂದೂ ಕೂಡ ಉತ್ತಮ ಆರಂಭ ಪಡೆದುಕೊಳ್ಳುವಲ್ಲಿ ವಿಫಲವಾಯಿತು. ಇದರ ಹೊರತಾಗಿ ಕೂಡ ನಾಯಕನ ಆಟ ಪ್ರದರ್ಶಿಸಿದ ಡುಪ್ಲೆಸಿ 63 ಎಸೆತಗಳಲ್ಲಿ 96ರನ್ಗಳಿಕೆ ಮಾಡಿ ಎದುರಾಳಿ ತಂಡಕ್ಕೆ ಸ್ಪರ್ಧಾತ್ಮಕ ರನ್ಗಳ ಗುರಿ ನೀಡುವಲ್ಲಿ ಯಶಸ್ವಿಯಾದರು.
ಆರ್ಸಿಬಿ ಪರ ಆರಂಭಿಕ ಬ್ಯಾಟರ್ ಅನುಜ್ ರಾವತ್(4) ಮತ್ತು ವಿರಾಟ್ ಕೊಹ್ಲಿ(0) ಮೊದಲ ಓವರ್ನಲ್ಲೇ ದುಷ್ಮಂತ ಚಮೀರ ಬೌಲಿಂಗ್ನಲ್ಲಿ ವಿಕೆಟ್ ಒಪ್ಪಿಸಿದರು.ಆದರೆ 3ನೇ ವಿಕೆಟ್ಗೆ ಮ್ಯಾಕ್ಸ್ವೆಲ್ ಜೊತೆಗೂಡಿ 37 ರನ್ಗಳ ಜೊತೆಯಾಟ ನಡೆಸಿದರು. ಚಮೀರ ಬೌಲಿಂಗ್ನಲ್ಲಿ 2 ಬೌಂಡರಿ ಮತ್ತು ಒಂದು ಸಿಕ್ಸರ್ ಸಿಡಿಸಿ ಅಬ್ಬರದ ಮುನ್ಸೂಚನೆ ನೀಡಿದರಾದರೂ, ಕೃನಾಲ್ ಪಾಂಡ್ಯ ಸ್ಪಿನ್ ಮೋಡಿಗೆ ಬಲಿಯಾದರು. ನಂತರ ಬಂದಂತಹ ಪ್ರಭುದೇಸಾಯಿ(10) ಕೂಡ ಹೆಚ್ಚು ಹೊತ್ತು ನಿಲ್ಲಿಲ್ಲ.
62ಕ್ಕೆ 4 ವಿಕೆಟ್ ಕಳೆದುಕೊಂಡು ಆಘಾತ ಅನುಭವಿಸಿದ್ದ ಆರ್ಸಿಬಿ ಒಂದು ಹಂತದಲ್ಲಿ ಅಲ್ಪಮೊತ್ತಕ್ಕೆ ಕುಸಿಯಬಹುದೆಂದು ನಿರೀಕ್ಷಿಸಲಾಗಿತ್ತು, ಆದರೆ ಡುಪ್ಲೆಸಿಸ್ ಯುವ ಆಲ್ರೌಂಡರ್ ಶಹಬಾಜ್(26) ಜೊತೆಗೂಡಿ 70 ರನ್ ಸೇರಿಸಿದರು. ಉತ್ತಮವಾಗಿ ಆಡುತ್ತಿದ್ದ ಶಹಬಾಜ್ ರನ್ಔಟ್ಗೆ ಬಲಿಯಾದರು.
ನಂತರ ದಿನೇಶ್ ಕಾರ್ತಿಕ್ ಜೊತೆಗೂಡಿದ ನಾಯಕ 49 ರನ್ಗಳ ಜೊತೆಯಾಟ ನೀಡಿದರು. 64 ಎಸೆತಗಳನ್ನೆದುರಿಸಿದ ಡುಪ್ಲೆಸಿಸ್ 11 ಬೌಂಡರಿ ಮತ್ತು 2 ಸಿಕ್ಸರ್ಗಳ ಸಹಿತ 96 ರನ್ಗಳಿಸಿ ಕೊನೆಯ ಓವರ್ನ 5ನೇ ಎಸೆತದಲ್ಲಿ ಔಟಾಗಿ 4 ರನ್ಗಳಿಂದ ಶತಕ ವಂಚಿತರಾದರು. ಕಾರ್ತಿಕ್ ಅಜೇಯ 13 ರನ್ಗಳಿಸಿದರು. ಈ ಮೂಲಕ ತಂಡ 20 ಓವರ್ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 181ರನ್ಗಳಿಕೆ ಮಾಡಿತು. ಲಖನೌ ಪರ ಜೇಸನ್ ಹೋಲ್ಡರ್ 25ಕ್ಕೆ2, ಕೃನಾಲ್ ಪಾಂಡ್ಯ 29ಕ್ಕೆ1, ಚಮೀರ 31ಕ್ಕೆ2 ವಿಕೆಟ್ ಪಡೆದರು.
ಲಖನೌ ಬ್ಯಾಟಿಂಗ್: 182ರನ್ಗಳ ಗುರಿ ಬೆನ್ನತ್ತಿದ ಲಖನೌ ಸೂಪರ್ ಜೈಂಟ್ಸ್ ತಂಡ 20 ಓವರ್ಗಳಲ್ಲಿ 8 ವಿಕೆಟ್ ಕಳೆದುಕೊಂಡು 163 ರನ್ ಮಾತ್ರ ಗಳಿಸಲು ಶಕ್ತವಾಗಿದ್ದರಿಂದ 18ರನ್ಗಳ ಸೋಲು ಕಂಡಿದೆ. ತಂಡದ ಪರ ಆರಂಭಿಕರಾಗಿ ಕಣಕ್ಕಿಳಿದ ಡಿಕಾಕ್-ಕ್ಯಾಪ್ಟನ್ ರಾಹುಲ್ ಜೋಡಿ ಆರಂಭದಲ್ಲಿ ವೈಫಲ್ಯ ಅನುಭವಿಸಿತು. ಕೇವಲ 3 ರನ್ಗಳಿಸಿದಾಗ ಡಿಕಾಕ್ ವಿಕೆಟ್ ಒಪ್ಪಿಸಿದರು. ಇದಾದ ಬಳಿಕ ಬಂದ ಪಾಂಡೆ ಕೂಡ 6ರನ್ಗಳಿಸಿ ಪೆವಿಲಿಯನ್ ಸೇರಿಕೊಂಡರು.
ಈ ವೇಳೆ ಒಂದಾದ ರಾಹುಲ್ ಹಾಗೂ ಕೃನಾಲ್ ಜೋಡಿ ಸ್ವಲ್ಪ ಪ್ರತಿರೋಧ ಒಡ್ಡಿತು. ಆದರೆ, 30ರನ್ಗಳಿಸಿದ್ದ ರಾಹುಲ್, ವೇಗಿ ಹರ್ಷಲ್ ಓವರ್ನಲ್ಲಿ ವಿಕೆಟ್ ಒಪ್ಪಿಸಿದರು. ಮಧ್ಯಮ ಕ್ರಮಾಂಕದಲ್ಲಿ ಕೃನಾಲ್ 42ರನ್ಗಳಿಕೆ ಮಾಡಿದರೆ, ಹೂಡಾ 13ರನ್, ಬಧೌನಿ 13,ಸ್ಟೋಯ್ನಿಸ್ 24ರನ್, ಹೊಲ್ಡರ್ 16ರನ್ಗಳಿಸಿದರು.
ಆರ್ಸಿಬಿ ಪರ ಹ್ಯಾಜಲ್ವುಡ್ 4ವಿಕೆಟ್, ಹರ್ಷಲ್ ಪಟೇಲ್ 2 ವಿಕೆಟ್ ಪಡೆದರೆ, ಮ್ಯಾಕ್ಸವೆಲ್ ಹಾಗೂ ಸಿರಾಜ್ ತಲಾ ವಿಕೆಟ್ ಪಡೆದರು.
