ಅಹಮದಾಬಾದ್ (ಗುಜರಾತ್): ಡೇವಿಡ್ ಮಿಲ್ಲರ್ ಮತ್ತು ಶುಭಮನ್ ಗಿಲ್ ಅವರ 40 ಪ್ಲಸ್ ರನ್ಗಳ ಕೊಡುಗೆಯಿಂದ ಗುಜರಾತ್ ಟೈಟಾನ್ಸ್ ನಿಗದಿತ ಓವರ್ನಲ್ಲಿ 7 ವಿಕೆಟ್ ನಷ್ಟಕ್ಕೆ 177 ರನ್ ಗಳಿಸಿತು. ರಾಜಸ್ಥಾನ ರಾಯಲ್ಸ್ ವಿಕೆಟ್ಗಳನ್ನು ಉರುಳಿಸಿದರೂ ರನ್ ರಭಸಕ್ಕೆ ನಿಯಂತ್ರಣ ಹೇರಲಾಗದೇ ಗೆಲುವಿಗಾಗಿ 178 ರನ್ ಗಳಿಸಬೇಕಿದೆ.
ಟಾಸ್ ಸೋತು ಮೊದಲು ಬ್ಯಾಟಿಂಗ್ಗೆ ಆಗಮಿಸಿದ ಟೈಟಾನ್ಸ್ ತಂಡವು ವೃದ್ಧಿಮಾನ್ ಸಹಾರನ್ನು ಬೇಗ ಕಳೆದುಕೊಂಡಿತು. ಮೊದಲ ಓವರ್ನ ಮೂರನೇ ಎಸೆತದಲ್ಲಿ 4 ರನ್ ಗಳಿಸಿದ್ದ ಸಹಾ ಬೋಲ್ಟ್ಗೆ ವಿಕೆಟ್ ಕೊಟ್ಟರು. ಕಳೆದ ಪಂದ್ಯಗಳಲ್ಲಿ ಉತ್ತಮ ಪ್ರದರ್ಶನ ನೀಡಿದ್ದ ಸಾಯಿ ಸುದರ್ಶನ್ 20 ರನ್ ಗಳಿಸಿ ಜೊತೆಯಾಟ ಉತ್ತಮಗೊಳಿಸುತ್ತಿರುವಾಗ ರನೌಟ್ಗೆ ಬಲಿಯಾದರು.
ನಂತರ ಬಂದ ನಾಯಕ ಹಾರ್ದಿಕ್ ಪಾಂಡ್ಯ ಮತ್ತೋರ್ವ ಆರಂಭಿಕ ಶುಭಮನ್ ಗಿಲ್ ಜೊತೆ ಸೇರಿ ರನ್ ಕಲೆ ಹಾಕಿದರು. ಈ ಜೋಡಿ 50 ರನ್ಗಳ ಜೊತೆಯಾಟ ಮಾಡಿತು. 19 ಬಾಲ್ನಲ್ಲಿ 1 ಸಿಕ್ಸ್, ಮೂರು ಬೌಂಡರಿಯಿಂದ 28 ರನ್ ಗಳಿಸಿ ಆಡುತ್ತಿದ್ದ ಹಾರ್ದಿಕ್ ಚಹಾಲ್ ಔಟಾದರು. ಗಿಲ್ (45) ತಮ್ಮ ಫಾರ್ಮ್ ಮುಂದುವರೆಸಿದರು. ಆದರೆ ಅರ್ಧಶತಕಕ್ಕೆ 5 ರನ್ ಬಾಕಿ ಇರುವಂತೆ ವಿಕೆಟ್ ಕೊಟ್ಟರು.
ನಂತರ ಬಂದ ಡೇವಿಡ್ ಮಿಲ್ಲರ್ ರನ್ಗೆ ಮತ್ತಷ್ಟು ವೇಗ ಕೊಟ್ಟರು. ಅವರಿಗೆ ಅಭಿನವ್ ಮನೋಹರ್ ಸಹ ಸಾಥ್ ನೀಡಿದರು. ಡೆತ್ ಓವರ್ಗಳಲ್ಲಿ ಈ ಜೋಡಿ ಬಿರುಸಿನ ಬ್ಯಾಟಿಂಗ್ ಮಾಡಿತು. ಅಭಿನವ್ 3 ಸಿಕ್ಸ್ನಿಂದ 27 ರನ್ ಗಳಿಸಿ ಔಟಾದರೆ ಡೇವಿಡ್ ಮಿಲ್ಲರ್ (46) ನಾಲ್ಕು ರನ್ನಿಂದ ಅರ್ಧಶತಕದಿಂದ ವಂಚಿತರಾದರು.
ತಂಡಗಳು ಇಂತಿವೆ: ಗುಜರಾತ್ ಟೈಟಾನ್ಸ್: ವೃದ್ಧಿಮಾನ್ ಸಹಾ(ವಿಕೆಟ್ ಕೀಪರ್), ಶುಭಮನ್ ಗಿಲ್, ಸಾಯಿ ಸುದರ್ಶನ್, ಹಾರ್ದಿಕ್ ಪಾಂಡ್ಯ(ನಾಯಕ), ಅಭಿನವ್ ಮನೋಹರ್, ಡೇವಿಡ್ ಮಿಲ್ಲರ್, ರಾಹುಲ್ ತೆವಾಟಿಯಾ, ರಶೀದ್ ಖಾನ್, ಅಲ್ಜಾರಿ ಜೋಸೆಫ್, ಮೊಹಮ್ಮದ್ ಶಮಿ, ಮೋಹಿತ್ ಶರ್ಮಾ
ರಾಜಸ್ಥಾನ ರಾಯಲ್ಸ್: ಜೋಸ್ ಬಟ್ಲರ್, ಯಶಸ್ವಿ ಜೈಸ್ವಾಲ್, ಸಂಜು ಸ್ಯಾಮ್ಸನ್ (ವಿಕೆಟ್ ಕೀಪರ್/ನಾಯಕ), ರಿಯಾನ್ ಪರಾಗ್, ಶಿಮ್ರಾನ್ ಹೆಟ್ಮೆಯರ್, ಧ್ರುವ್ ಜುರೆಲ್, ರವಿಚಂದ್ರನ್ ಅಶ್ವಿನ್, ಟ್ರೆಂಟ್ ಬೌಲ್ಟ್, ಆಡಮ್ ಝಂಪಾ, ಸಂದೀಪ್ ಶರ್ಮಾ, ಯುಜ್ವೇಂದ್ರ ಚಾಹಲ್
ಇದನ್ನೂ ಓದಿ: ಮಹಿಳಾ ಪ್ರೀಮಿಯರ್ ಲೀಗ್ ಜರ್ಸಿಯಲ್ಲಿ ಮೈದಾನಕ್ಕಿಳಿದ ಮುಂಬೈ ಇಂಡಿಯನ್ಸ್‌
