ಅಹಮದಾಬಾದ್ (ಗುಜರಾತ್): ಹಾಲಿ ಚಾಂಪಿಯನ್‌ ಗುಜರಾತ್ ಟೈಟಾನ್ಸ್ ವಿರುದ್ಧ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ರೋಚಕ ಗೆಲುವು ದಾಖಲಿಸಿದೆ. ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ಡೆಲ್ಲಿ ತಂಡ 130 ರನ್ ಗಳಿಸಿತ್ತು. ಈ ಅಲ್ಪ ಮೊತ್ತದ ಗುರಿಯನ್ನು ಬೆನ್ನಟ್ಟಿದ ಗುಜರಾತ್ ಟೈಟಾನ್ಸ್ ಆರು ವಿಕೆಟ್ ನಷ್ಟಕ್ಕೆ ಕೇವಲ 125 ರನ್ ಗಳಿಸಿ, 5 ರನ್ಗಳಿಂದ ಸೋಲು ಕಂಡಿದೆ.
ಇಲ್ಲಿನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಗುಜರಾತ್ ನಾಯಕ ಹಾರ್ದಿಕ್ ಪಾಂಡ್ಯ ಬಾರಿಸಿದ ಅಜೇಯ 59 ರನ್ ಸಿಡಿಸಿದರೂ ತಂಡಕ್ಕೆ ಗೆಲುವು ತಂದುಕೊಡಲು ಸಾಧ್ಯವಾಗಲಿಲ್ಲ. 131 ರನ್ ಟಾರ್ಗೆಟ್ ಪಡೆದಿದ್ದ ಹಾರ್ದಿಕ್ ಪಡೆ ಆಘಾತ ಎದುರಿಸಿತು. ವೃದ್ಧಿಮಾನ್ ಸಹಾ ಶೂನ್ಯಕ್ಕೆ ವಿಕೆಟ್ ಒಪ್ಪಿಸಿದರೆ, ಶುಭಮನ್ ಗಿಲ್ ಕೇವಲ 6 ರನ್ ಗಳಿಸಿ ಪೆವಿಲಿಯನ್ ಸೇರಿದರು.
ಮೂರನೇ ಕ್ರಮಾಂಕದಲ್ಲಿ ನಾಯಕ ಹಾರ್ದಿಕ್ ಪಾಂಡ್ಯ ಕೊನೆಯವರೆಗೆ ಹೋರಾಟ ನಡೆಸಿದರು. ಇದರ ನಡುವೆ ವಿಜಯ್ ಶಂಕರ್ 6 ರನ್, ಡೇವಿಡ್ ಮಿಲ್ಲರ್ ಶೂನ್ಯಕ್ಕೆ ಓಟಾದರು. ಬಳಿಕ ಬಂದ ಅಭಿನವ್ ಮನೋಹರ್ ಮತ್ತು ರಾಹುಲ್ ತೆವಾಟಿಯಾ ನಾಯಕ ಪಾಂಡ್ಯಗೆ ಉತ್ತಮ ಸಾಥ್ ನೀಡಿದರು. ನಿಧಾನಗತಿ ಬ್ಯಾಟ್ ಬೀಸುತ್ತಿದ್ದ ಅಭಿನವ್ 33 ಎಸೆತ ಎದುರಿಸಿ ಒಂದು ಸಿಕ್ಸರ್ನೊಂದಿಗೆ 26 ರನ್ ಗಳಿಸಿ ವಿಕೆಟ್ ಒಪ್ಪಿಸಿದರು. ಆಗ ತಂಡ ಮೊತ್ತ 17.1 ಓವರ್ನಲ್ಲಿ 5 ವಿಕೆಟ್ ನಷ್ಟಕ್ಕೆ 94 ರನ್ ಆಗಿತ್ತು.
ಈ ವೇಳೆ ಬಂದ ರಾಹುಲ್ ತೆವಾಟಿಯಾ ಬಿರುಸಿನ ಬ್ಯಾಟಿಂಗ್ಗೆ ಮುಂದಾದರು. ಆದರೆ, ಏಳು ಎಸೆತಗಳಲ್ಲಿ ಮೂರು ಸಿಕ್ಸರ್ ಸಮೇತ 20 ರನ್ ಗಳಿಸಿದ್ದ ಅವರು ಕೊನೆಯ ಓವರ್ನಲ್ಲಿ ವಿಕೆಟ್ ಒಪ್ಪಿಸಿದರು. ಮತ್ತೊಂದೆಡೆ, ನಾಯಕ ಪಾಂಡ್ಯಕ್ಕೆ ಸೂಕ್ತವಾದ ಸ್ಟ್ರೈಕ್ ಸಿಗಲಿಲ್ಲ. ಇದರಿಂದ ಅಜೇಯವಾಗಿ ಉಳಿಸಿದರೂ ತಂಡವನ್ನು ಗೆಲುವಿನ ದಡ ಸೇರಿಸಲಾಗಲಿಲ್ಲ. ಡೆಲ್ಲಿ ಪರ ಖಲೀಲ್ ಅಹ್ಮದ್, ಇಶಾಂತ್ ಶರ್ಮಾ ತಲಾ ಎರಡು ವಿಕೆಟ್ ಪಡೆದರೆ, ಕುಲದೀಪ್ ಯಾದವ್, ಅನ್ರಿಚ್ ನಾರ್ಟ್ಜೆ ತಲಾ ಒಂದು ವಿಕೆಟ್ ಪಡೆದರು.
ಇದಕ್ಕೂ ಮುನ್ನ ಡೆಲ್ಲಿ ತಂಡ ಕೆಳ ಕ್ರಮಾಂಕದ ಬ್ಯಾಟರ್ಗಳಾದ ಅಮನ್ ಹಕೀಮ್ ಖಾನ್, ಅಕ್ಷರ್ ಪಟೇಲ್ ಮತ್ತು ರಿಪಾಲ್ ಪಟೇಲ್ ನೆರವಿನಿಂದ ಎಂಡು ವಿಕೆಟ್ ನಷ್ಟಕ್ಕೆ 130 ರನ್ ಗಳಿಸಿತ್ತು. ಒಣ ಪಿಚ್ನಲ್ಲಿ ಬೃಹತ್ ರನ್ ಕಲೆಹಾಕುವ ಉದ್ದೇಶದಿಂದ ಮೊದಲು ಬ್ಯಾಟಿಂಗ್ ಆಯ್ಕೆ ಮಾಡಿದ ಡೇವಿಡ್ ವಾರ್ನರ್ ನಿರ್ಣಯವನ್ನು ಮೊಹಮ್ಮದ್ ಶಮಿ ಅಡಿಮೇಲು ಮಾಡಿದರು. ಫಿಲಿಪ್ ಸಾಲ್ಟ್ (0), ಪ್ರಿಯಂ ಗಾರ್ಗ್ (10), ರಿಲೀ ರೊಸೊವ್ (8) ಮತ್ತು ಮನೀಶ್ ಪಾಂಡೆ (1) ಅವರ ವಿಕೆಟ್ ಕಬಳಿಸಿದ ಶಮಿ ಆಘಾತ ನೀಡಿದರು. ನಾಯಕ ಡೇವಿಡ್ ವಾರ್ನರ್ ರನ್ ಔಟ್ಗೆ ಬಲಿಯಾಗಿದ್ದರು. ಇದರಿಂದ ಐದು ಓವರ್ ಮುಕ್ತಾಯಕ್ಕೆ ಕೇವಲ 23 ರನ್ಗೆ 5 ವಿಕೆಟ್ ಕಳೆದುಕೊಂಡಿತ್ತು.
ನಂತರ ಬಂದ ಅಕ್ಷರ್ ಪಟೇಲ್ ಮತ್ತು ಅಮನ್ ಹಕೀಮ್ ಖಾನ್ ತಂಡಕ್ಕೆ ಆಸರೆಯಾದರು. ಈ ಜೋಡಿ 50 ರನ್ನ ಜೊತೆಯಾಟ ನೀಡಿತು. ಅಕ್ಷರ್ ಪಟೇಲ್ 30 ಬಾಲ್ನಲ್ಲಿ 2 ಬೌಂಡರಿ ಮತ್ತು 1 ಸಿಕ್ಸರ್ ಸಮೇತ 27 ರನ್ ಕಲೆಹಾಕಿ ಔಟಾದರು. ಅಕ್ಷರ್ ನಂತರ ಬಂದ ರಿಪಾಲ್ ಪಟೇಲ್ ಅಮನ್ ಹಕೀಮ್ಗೆ ಜೊತೆಯಾದರು. ಈ ಜೋಡಿಯೂ 50 ರನ್ನ ಜೊತೆಯಾಟ ಮಾಡಿ ತಂಡವನ್ನು 120ರ ಗಡಿದ ದಾಟಿಸಿತು. ಕೊನೆಯಲ್ಲಿ ಕುಲದೀಪ್ ಯಾದವ್, ಅನ್ರಿಚ್ ನಾರ್ಟ್ಜೆ ತಂಡವನ್ನು ಆಲೌಟ್ನಿಂದ ತಪ್ಪಿಸಿದ್ದರು. ಗುಜರಾತ್ ಪರ ಶಮಿ ನಾಲ್ಕು, ಮೋಹಿತ್ ಶರ್ಮಾ ಎರಡು, ರಶೀದ್ ಖಾನ್ ಒಂದು ವಿಕೆಟ್ ಪಡೆದಿದ್ದರು.
ಇದನ್ನೂ ಓದಿ: IPLನಲ್ಲಿ ಇಂದು: ಅಗ್ರಸ್ಥಾದಲ್ಲಿರುವ ಗುಜರಾತ್ ಪರೀಕ್ಷೆಗೆ ಡೆಲ್ಲಿ ಉತ್ತರ ಏನು? ಸಂಭಾವ್ಯ ಪಟ್ಟಿ ಹೀಗಿದೆ..
