ಬೆಂಗಳೂರು: ದಕ್ಷಿಣ ಆಫ್ರಿಕಾ ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ತಂಡದ ಬ್ಯಾಟರ್ ಫಾಫ್ ಡು ಪ್ಲೆಸಿಸ್ ಟಿ20 ಮಾದರಿ ಕ್ರಿಕೆಟ್ನಲ್ಲಿ 300 ಸಿಕ್ಸರ್‌ಗಳನ್ನು ಪೂರೈಸಿದ್ದಾರೆ. ಬೆಂಗಳೂರಿನ ಎಂ.ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಸೋಮವಾರ ನಡೆದ ಲಖನೌ ಸೂಪರ್ ಜೈಂಟ್ಸ್ (ಎಲ್ಎಸ್ಜಿ) ವಿರುದ್ಧದ ಪಂದ್ಯದಲ್ಲಿ 5 ಸಿಕ್ಸರ್ ಬಾರಿಸುವ ಮೂಲಕ 38 ವರ್ಷದ ಈ ಕ್ರಿಕೆಟರ್ ಹೊಸ ಮೈಲಿಗಲ್ಲು ತಲುಪಿದರು.
ಇದನ್ನೂ ಓದಿ: ಟಿ-20 ಕ್ರಿಕೆಟ್ನಲ್ಲಿ ಚೇಸ್ ಮಾಸ್ಟರ್ ವಿರಾಟ್ ಕೊಹ್ಲಿ ಹೊಸ ಮೈಲಿಗಲ್ಲು
ರೋಚಕ ಪಂದ್ಯ: ಐಪಿಎಲ್ 2023ರ ಆವೃತ್ತಿಯ 15ನೇ ಪಂದ್ಯಯಲ್ಲಿ ಆರ್ಸಿಬಿ ಮತ್ತು ಎಲ್ಎಸ್ಜಿ ಮುಖಾಮುಖಿಯಾಗಿದ್ದವು. ಕೆ.ಎಲ್.ರಾಹುಲ್ ನಾಯಕತ್ವದ ಲಖನೌ ಟಾಸ್ ಗೆದ್ದು ಫೀಲ್ಡಿಂಗ್ ಆಯ್ದುಕೊಂಡಿತ್ತು. ಆರ್ಸಿಬಿ ಪರ ವಿರಾಟ್ ಕೊಹ್ಲಿ ಮತ್ತು ಡು ಪ್ಲೆಸಿಸ್ ಮೊದಲು ಬ್ಯಾಟಿಂಗ್ ಮಾಡಲು ಕ್ರೀಸಿಗಿಳಿದರು. ಸಂಪೂರ್ಣ ಇನ್ನಿಂಗ್ಸ್ ಮುಗಿಯುವವರೆಗೂ ಕ್ರೀಸ್ನಲ್ಲಿದ್ದ ಪ್ಲೆಸಿಸ್ 46 ಎಸೆತಗಳಲ್ಲಿ ಐದು ಬೌಂಡರಿ ಮತ್ತು ಐದು ಸಿಕ್ಸರ್‌ಗಳ ನೆರವಿನೊಂದಿಗೆ ಅಜೇಯ 79 ರನ್ ಸಿಡಿಸಿದ್ದರು.
ಇದನ್ನೂ ಓದಿ: 'ಕ್ರಿಕೆಟ್ ಆಡ್ಬೇಡ ಓದಿಗೆ ಗಮನ ಕೊಡು ಎಂದಿದ್ದೆ, ಮಾತು ಕೇಳಿರಲಿಲ್ಲ': ಸಿಕ್ಸರ್ ಸಾಧಕನ ತಂದೆಯ ಮಾತು
ಕೊಹ್ಲಿ ಮತ್ತು ಪ್ಲೆಸಿಸ್ ಮೊದಲ ವಿಕೆಟ್ಗೆ 69 ಎಸೆತಗಳಲ್ಲಿ 96 ರನ್‌ಗಳ ಜೊತೆಯಾಟ ನೀಡಿದರು. ಪ್ಲೆಸಿಸ್ ಅವರೊಂದಿಗೆ ಗ್ಲೆನ್ ಮ್ಯಾಕ್ಸ್‌ವೆಲ್ ಕೂಡ ಉತ್ತಮ ಪ್ರದರ್ಶನ ನೀಡಿದರು. ಈ ಜೋಡಿ ಕೇವಲ 50 ಎಸೆತಗಳಲ್ಲಿ 115 ರನ್‌ಗಳನ್ನು ಕಲೆ ಹಾಕಿತ್ತು. ಪ್ಲೆಸಿಸ್ ಬ್ಯಾಟ್ನಿಂದ ಐದು ಸಿಕ್ಸರ್ಗಳೊಂದಿಗೆ ಟಿ20ಯಲ್ಲಿ ಅವರು 301ಕ್ಕೆ ಸಿಕ್ಸರ್ ಬಾರಿಸಿದ ವಿನೂತನ ದಾಖಲೆ ಸೃಷ್ಟಿಸಿದರು.
ಇವರು ಜಾಗತಿಕ ಕ್ರಿಕೆಟ್‌ನ ಸಿಕ್ಸರ್ ದಾಂಡಿಗರು: ಹೊಡಿಬಡಿ ಆಟದಲ್ಲಿ ಅನೇಕ ಆಟಗಾರರು ಪ್ರೇಕ್ಷಕರಿಗೆ ಮನರಂಜನೆಯ ರಸದೌತಣವನ್ನೇ ಉಣಬಡಿಸಿದ್ದಾರೆ. ವೆಸ್ಟ್ ಇಂಡೀಸ್ನ ಖ್ಯಾತ ಬ್ಯಾಟರ್ ಕ್ರಿಸ್ ಗೇಲ್ ಹೆಸರಲ್ಲಿ ಅತಿ ಹೆಚ್ಚು 1,056 ಸಿಕ್ಸರ್ ಬಾರಿಸಿದ ದಾಖಲೆ ಇದೆ. ಮತ್ತೊಬ್ಬ ವಿಂಡೀಸ್ ಮಾಜಿ ಆಲ್ರೌಂಡರ್ ಕೀರಾನ್ ಪೊಲಾರ್ಡ್ 812 ಸಿಕ್ಸರ್ಗಳೊಂದಿಗೆ ಎರಡನೇ ಸ್ಥಾನ ಹೊಂದಿದ್ದಾರೆ. ಮೂರನೇ ಅಗ್ರ ಸಿಕ್ಸ್ ಹಿಟ್ಟರ್ ಸಹ ವೆಸ್ಟ್ ಇಂಡೀಸ್ ಬ್ಯಾಟರ್ ಆಗಿದ್ದು, ಆಲ್ರೌಂಡರ್ ಆಂಡ್ರೆ ರಸೆಲ್ 589 ಸಿಕ್ಸರ್ ಬಾರಿಸಿದ ದಾಖಲೆ ಹೊಂದಿದ್ದಾರೆ. ನ್ಯೂಜಿಲೆಂಡ್‌ನ ಮಾಜಿ ವಿಕೆಟ್ ಕೀಪರ್ ಕಂ ಬ್ಯಾಟರ್ ಬ್ರೆಂಡನ್ ಮೆಕಲಮ್ 485 ಸಿಕ್ಸರ್ ಮತ್ತು ಮತ್ತೊಬ್ಬ ಕೀವಿಸ್ ಬ್ಯಾಟರ್ ಕಾಲಿನ್ ಮುನ್ರೊ 480 ಸಿಕ್ಸರ್ಗಳೊಂದಿಗೆ ಕ್ರಮವಾಗಿ ನಾಲ್ಕನೇ ಮತ್ತು ಐದನೇ ಅಗ್ರ ಸಿಕ್ಸ್ ಹಿಟ್ಟರ್ಗಳು.
ಭಾರತದ ಸಿಕ್ಸರ್ ಕ್ರಿಕೆಟರ್ಗಳ ಬಗ್ಗೆ ಗೊತ್ತೇ?: ಭಾರತದ ಬ್ಯಾಟರ್ಗಳು ಸಹ ಟಿ20ಯಲ್ಲಿ ಸಿಕ್ಸರ್ ಸುರಿಮಳೆ ಹರಿಸಿದ್ದಾರೆ. ರೋಹಿತ್ ಶರ್ಮಾ (462 ಸಿಕ್ಸರ್), ವಿರಾಟ್ ಕೊಹ್ಲಿ (360 ಸಿಕ್ಸರ್), ಸುರೇಶ್ ರೈನಾ (325 ಸಿಕ್ಸರ್), ಕೆ.ಎಲ್.ರಾಹುಲ್ (289 ಸಿಕ್ಸರ್) ಮತ್ತು ರಾಬಿನ್ ಉತ್ತಪ್ಪ 267 ಸಿಕ್ಸರ್ ಬಾರಿಸಿದ ದಾಖಲೆ ಹೊಂದಿದ್ದಾರೆ.
ಇದನ್ನೂ ಓದಿ: ಮಾರ್ಕಸ್, ಪೂರನ್ ಸಿಡಿಲಬ್ಬರದ ಬ್ಯಾಟಿಂಗ್: ಬೆಂಗಳೂರು ವಿರುದ್ಧ ರಾಹುಲ್ ಪಡೆಗೆ ರೋಚಕ ಗೆಲುವು
