ಮುಂಬೈ: ಅನುಭವಿ ಭುವನೇಶ್ವರ್ ಕುಮಾರ್ ಮತ್ತು ಯುವ ವೇಗಿ ಉಮ್ರಾನ್ ಮಲಿಕ್ ಅವರ ಶಿಸ್ತಿನ ಬೌಲಿಂಗ್ ದಾಳಿ ಮತ್ತು ಬ್ಯಾಟರ್ಗಳ ಸಂಘಟಿತ ಪ್ರದರ್ಶನದ ನೆರವಿನಿಂದ ಸನ್ರೈಸರ್ಸ್ ಹೈದರಾಬಾದ್ ತಂಡ ಪಂಜಾಬ್ ಕಿಂಗ್ಸ್ ವಿರುದ್ಧ 7 ವಿಕೆಟ್ಗಳ ಜಯ ಸಾಧಿಸಿದೆ.
ಪಂಜಾಬ್ ಕಿಂಗ್ಸ್ ನೀಡಿದ್ದ 152 ರನ್ಗಳ ಸಾಧಾರಣ ಗುರಿಯನ್ನು ಬೆನ್ನಟ್ಟಿದ ಹೈದರಾಬಾದ್ ತಂಡ ಆರಂಭದಲ್ಲಿ ತಂಡದ ನಾಯಕ ಕೇನ್ ವಿಲಿಯಮ್ಸನ್(3) ವಿಕೆಟ್ ಕಳೆದುಕೊಂಡು ಆಘಾತಕ್ಕೆ ಒಳಗಾಯಿತು. ಆದರೆ ಇನ್ಫಾರ್ಮ್ ಬ್ಯಾಟರ್ಗಳಾದ ಅಭಿಷೇಕ್ ಶರ್ಮಾ ಮತ್ತು ರಾಹುಲ್ ತ್ರಿಪಾಠಿ 2ನೇ ವಿಕೆಟ್ಗೆ 48 ರನ್ ಸೇರಿಸಿ ಆರಂಭಿಕ ಆಘಾತದಿಂದ ಪಾರು ಮಾಡಿದರು.
22 ಎಸೆತಗಳಲ್ಲಿ 34 ರನ್ಗಳಿಸಿದ್ದ ತ್ರಿಪಾಠಿ ಮತ್ತು 25 ಎಸೆತಗಳಲ್ಲಿ 31 ರನ್ಗಳಿಸಿದ್ದ ಅಭಿಷೇಕ್ ಶರ್ಮಾ ಸ್ಪಿನ್ನರ್ ರಾಹುಲ್ ಚಾಹರ್ ಬೌಲಿಂಗ್ನಲ್ಲಿ ಕೇವಲ 11 ರನ್ಗಳ ಅಂತರದಲ್ಲಿ ವಿಕೆಟ್ ಒಪ್ಪಿಸಿದರು.
ಆದರೆ 4ನೇ ವಿಕೆಟ್ ಜೊತೆಯಾದ ಐಡೆನ್ ಮಾರ್ಕ್ರಮ್ ಮತ್ತು ನಿಕೋಲಸ್ ಪೂರನ್ ನಾಲ್ಕನೇ ವಿಕೆಟ್ 75 ರನ್ಗಳ ಅಜೇಯ ಜೊತೆಯಾಟ ನಡೆಸಿ ತಂಡವನ್ನು ಇನ್ನು 7 ಎಸೆತಗಳಿರುವಂತೆ ಗೆಲುವಿನ ದಡ ಸೇರಿಸಿದರು. ಈ ಮೂಲಕ ಸತತ 4 ಜಯ ಸಾಧಿಸಿ ಅಂಕಪಟ್ಟಿಯಲ್ಲಿ 7ನೇ ಸ್ಥಾನದಿಂದ 4ನೇ ಸ್ಥಾನಕ್ಕೆ ಬಡ್ತಿಪಡೆಯಿತು.
ಇದಕ್ಕೂ ಮುನ್ನ ಟಾಸ್ ಸೋತು ಬ್ಯಾಟಿಂಗ್ ಇಳಿದ ಪಂಜಾಬ್ ಕಿಂಗ್ಸ್ ಆರಂಭದಿಂದಲೂ ರನ್ಗಳಿಸಲು ಪರದಾಡಿತು. ಹಂಗಾಮಿ ನಾಯಕ ಶಿಖರ್ ಧವನ್ 11 ಎಸೆತಗಳಲ್ಲಿ 8 ರನ್ , ಇಂದೇ ಮೊದಲ ಅವಕಾಶ ಪಡೆದಿದ್ದ ಪ್ರಭಸಿಮ್ರಾನ್ ಸಿಂಗ್ 11 ಎಸೆತಗಳಲ್ಲಿ 14, ಬೈರ್ಸ್ಟೋವ್ 10 ಎಸೆತಗಳಲ್ಲಿ 12 ರನ್ಗಳಿಸಿ 7 ಓವರ್ಗಳೊಳಗೆ ಪೆವಿಲಿಯನ್ ಸೇರಿಕೊಂಡರು.
ನಂತರ ಬಂದ ಜಿತೇಶ್ ಶರ್ಮಾ ಕೂಡ ಕೇವಲ 11ಕ್ಕೆ ವಿಕೆಟ್ ಒಪ್ಪಿಸಿದರು. ತಂಡದ ಮೊತ್ತ 61ರನ್ ಆಗುವಷ್ಟರಲ್ಲಿ ಪಂಜಾಬ್ನ ಪ್ರಮುಖ 4 ವಿಕೆಟ್ ಕಳೆದುಕೊಂಡಿತ್ತು. 100ರ ಗಡಿ ದಾಟಲು ಕಷ್ಟಸಾಧ್ಯವಾಗಿದ್ದ ಸಂದರ್ಭದಲ್ಲಿ ಲೀಲಾಜಾಲವಾಗಿ ಬ್ಯಾಟ್ ಬೀಸಿದ ಲಿವಿಂಗ್ಸ್ಟೋನ್ ಕೇವಲ 33 ಎಸೆತಗಳಲ್ಲಿ 5 ಬೌಂಡರಿ ಮತ್ತು 4 ಭರ್ಜರಿ ಸಿಕ್ಸರ್ಗಳ ಸಹಿತ 60 ರನ್ಗಳಿಸಿ ತಂಡದ ಮೊತ್ತವನ್ನು ಹೆಚ್ಚಿಸಿದರು.
ಆದರೆ ಇವರಿಗೆ ಸೂಕ್ತ ಬೆಂಬಲ ಸಿಗಲಿಲ್ಲ. ಇವರ ಜೊತೆಗಾರ ಶಾರುಖ್ ಖಾನ್ 28 ಎಸೆತಗಳಲ್ಲಿ ಕೇವಲ 26 ರನ್ಗಳಿಸಿದರೆ, ನಂತರ ಬಂದ ಒಡಿಯನ್ ಸ್ಮಿತ್ ಕೇವಲ 13 ರನ್ಗಳಿಸಿ ವಿಕೆಟ್ ಒಪ್ಪಿಸಿದರು. ಇವರಿಬ್ಬರು ಸಾಕಷ್ಟು ಎಸೆತಗಳನ್ನು ವ್ಯರ್ಥಮಾಡಿದ್ದರಿಂದ ಪಂಜಾಬ್ ಕಿಂಗ್ಸ್ ಸ್ಪರ್ಧಾತ್ಮಕ ಮೊತ್ತ ದಾಖಲಿಸಲು ವಿಫಲವಾಯಿತು. ಒಟ್ಟಾರೆ ಪಂಜಾಬ್ ಕಿಂಗ್ಸ್ ಇನ್ನಿಂಗ್ಸ್ನಲ್ಲಿ ಲಿವಿಂಗ್ಸ್ಟೋನ್ 33 ಎಸೆತಗಳಲ್ಲಿ 60 ರನ್ಗಳಿಸಿದರೆ, ಉಳಿದ ಬ್ಯಾಟರ್ಗಳು 87 ಎಸೆತಗಳಲ್ಲಿ ಕೇವಲ 84 ರನ್ಗಳಿಸಿದರು.
ಉಮ್ರಾನ್ ಮಲಿಕ್ ಎಸೆದ ಕೊನೆಯ ಓವರ್ನಲ್ಲಿ ಒಂದು ರನ್ಗಳಿಸಲಾಗದೆ ಪಂಜಾಬ್ 4 ಬ್ಯಾಟರ್ಗಳು ವಿಕೆಟ್ ಒಪ್ಪಿಸಿದರು. ಉಮ್ರಾನ್ 28ಕ್ಕೆ4, ಭುವನೇಶ್ವರ್ ಕುಮಾರ್ 22ಕ್ಕೆ 3, ನಟರಾಜನ್ 38ಕ್ಕೆ1 ಮತ್ತು ಜಗದೀಶ್ ಸುಚಿತ್ 29ಕ್ಕೆ 1 ವಿಕೆಟ್ ಪಡೆದು ಮಿಂಚಿದರು.
ಇದನ್ನೂ ಓದಿ:ಇಶಾನ್ ಕಿಶನ್ ಅಷ್ಟು ವೇತನಕ್ಕೆ ಯೋಗ್ಯರಲ್ಲ, ಜೋಫ್ರಾ ಮೇಲೆ ಹಣ ಹೂಡಿದ್ದು ವ್ಯರ್ಥ: ಶೇನ್ ವಾಟ್ಸನ್ ಟೀಕೆ
