ಮೆಲ್ಬೋರ್ನ್: ಮೇ 30 ರಂದು ಐಪಿಎಲ್ ಕೊನೆಗೊಳ್ಳುತ್ತಿದ್ದಂತೆ ಆಸ್ಟ್ರೇಲಿಯಾದ ಆಟಗಾರರು ತವರಿಗೆ ಮರಳಲು ಚಾರ್ಟಡ್ ಫ್ಲೈಟ್ ವ್ಯವಸ್ಥೆ ಮಾಡುವ ಯಾವುದೇ ತಕ್ಷಣದ ಯೋಜನೆಯಿಲ್ಲ ಎಂದು ಕ್ರಿಕೆಟ್ ಆಸ್ಟ್ರೇಲಿಯಾದ ಮಧ್ಯಂತರ ಸಿಇಒ ನಿಕ್ ಹಾಕ್ಲೇ ಸೋಮವಾರ ಹೇಳಿದ್ದಾರೆ.
ಭಾರತದಲ್ಲಿ ಕೊರೊನಾ ತಾಂಡವವಾಡುತ್ತಿದೆ. ದಿನವೊಂದಕ್ಕೆ 3 ಲಕ್ಷಕ್ಕೂ ಕೋವಿಡ್ 19 ಪ್ರಕರಣಗಳು ದಾಖಲಾಗುತ್ತಿವೆ. ಈ ಕಾರಣದಿಂದ ಆಸ್ಟ್ರೇಲಿಯಾ ಪ್ರಧಾನಿ ಕಳೆದ ವಾರವಷ್ಟೇ ಭಾರತದಿಂದ ಮೇ 15ರವರೆಗೆ ಪ್ಯಾಸೇಂಜರ್ ವಿಮಾನವನ್ನು ನಿಷೇಧಿಸಿರುವುದಾಗಿ ಘೋಷಿಸಿದ್ದಾರೆ. ಇದೇ ಸಂದರ್ಭದಲ್ಲಿ ಐಪಿಎಲ್ನಲ್ಲಿ ಆಡುತ್ತಿರುವ ಆಸ್ಟ್ರೇಲಿಯಾದ ಕ್ರಿಕೆಟಿಗರಿಗೆ ವಿಶೇಷ ವಿಮಾನದ ವ್ಯವಸ್ಥೆ ಕೂಡ ಮಾಡುವುದಿಲ್ಲ ಎಂದು ಹೇಳಿದ್ದರು.
"ಸದ್ಯಕ್ಕಂತೂ ಯಾವುದೇ ಚಾರ್ಟರ್ ವಿಮಾನ ವ್ಯವಸ್ಥೆಯ ಯೋಜನೆ ಮಾಡಿಲ್ಲ. ನಾವು ಎಸಿಎ (ಆಸ್ಟ್ರೇಲಿಯನ್ ಕ್ರಿಕೆಟಿಗರ ಸಂಘ), ಭಾರತದಲ್ಲಿರುವ ಆಟಗಾರರೊಂದಿಗೆ ಮತ್ತು ಬಿಸಿಸಿಐ (ಭಾರತದಲ್ಲಿ ಕ್ರಿಕೆಟ್ ನಿಯಂತ್ರಣ ಮಂಡಳಿ) ನೊಂದಿಗೆ ನಿಕಟ ಸಂಪರ್ಕದಲ್ಲಿದ್ದೇವೆ ಮತ್ತು ಎಲ್ಲರೊಂದಿಗೂ ಉತ್ತಮ ಸಂವಹನ ನಡೆಯುತ್ತಿದೆ ಎಂದು ಕ್ರಿಕೆಟ್ ಆಸ್ಟ್ರೇಲಿಯಾ ಸಿಇಒ ಹಾಕ್ಲೆ ಎಸ್ಇಎನ್ ರೇಡಿಯೊಗೆ ತಿಳಿಸಿದರು.
ನಾವು ಅಲ್ಲಿರುವ ನಮ್ಮ ಆಟಗಾರರೊಂದಿಗೆ ಸಂಪರ್ಕದಲ್ಲಿದ್ದೇವೆ. ಅವರು ಉತ್ತಮ ಉತ್ಸಾಹದಲ್ಲಿದ್ದಾರೆ. ಬಿಸಿಸಿಐ ಸುರಕ್ಷಿತವಾದ ಬಯೋ - ಬಬಲ್ ವ್ಯವಸ್ಥೆ ಮಾಡಿದೆ. ಹಾಗಾಗಿ ಅವರೆಲ್ಲರೂ ಸುರಕ್ಷಿತ ಭಾವನೆ ಹೊಂದಿದ್ದಾರೆ. ನಮ್ಮ ಆಟಗಾರರು ತಮ್ಮ ಆಟದ ಬದ್ಧತೆಗಳನ್ನು ಪೂರ್ಣಗೊಳಿಸಲು ಬಯಸಿದ್ದಾರೆ. ಬಿಸಿಸಿಐ ಕೂಡ ಟೂರ್ನಿ ಮುಗಿದ ಮೇಲೆ ಆಟಗಾರರನ್ನು ಸುರಕ್ಷಿತವಾಗಿ ಮನೆಗೆ ಕಳುಹಿಸುವುದನ್ನು ಬಯಸುತ್ತದೆ "ಎಂದು ಅವರು ಹೇಳಿದರು.
ಟೂರ್ನಿ ಮೇ 30ರ ವರೆಗೆ ಮುಗಿಯುವುದಿಲ್ಲ. ಈಗಾಗಲೇ ನಾವು ಟೂರ್ನಿಯ ಅಂತಿಮ ಘಟಕ್ಕೆ ಹತ್ತಿರವಾಗಿದ್ದೇವೆ. ನಾವು ಅಲ್ಲಿನ ಪರಿಸ್ಥಿತಿಯನ್ನು ಕಾದು ನೋಡಿ ಮುಂದಿನ ಆಲೋಚನೆ ಮಾಡಬೇಕಿದೆ ಎಂದು ಹಾಕ್ಲೇ ಹೇಳಿದ್ದಾರೆ.
ಇದನ್ನು ಓದಿ:ಐಪಿಎಲ್ ಆಟಗಾರರು ಸ್ವದೇಶಕ್ಕೆ ಮರಳುವ ವ್ಯವಸ್ಥೆಯನ್ನು ತಾವೇ ಮಾಡಿಕೊಳ್ಳಬೇಕು; ಆಸ್ಟ್ರೇಲಿಯಾ ಪ್ರಧಾನಿ
