ಶಾರ್ಜಾ(ಯುಎಇ): ಇಂಡಿಯನ್ ಪ್ರೀಮಿಯರ್ ಲೀಗ್ನ ದ್ವೀತಿಯಾರ್ಧದ ಪಂದ್ಯಗಳಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ ತಂಡ ಉತ್ತಮ ಪ್ರದರ್ಶನ ನೀಡುತ್ತಿದೆ. ಈಗಾಗಲೇ ಮೂರು ಪಂದ್ಯಗಳಲ್ಲಿ ಜಯದ ನಗೆ ಬೀರಿದೆ. ಈ ಗೆಲುವಿನ ಸಂಪೂರ್ಣ ಶ್ರೇಯ ತಂಡದ ಕೋಚ್ ಬ್ರೆಂಡಮ್ ಮೆಕಲಮ್ಗೆ ಸಲ್ಲಬೇಕು ಎಂದು ಕ್ಯಾಪ್ಟನ್ ಇಯಾನ್ ಮಾರ್ಗನ್ ಹೇಳಿದ್ದಾರೆ.
ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ನಡೆದ ಪಂದ್ಯದಲ್ಲಿ 3 ವಿಕೆಟ್ಗಳ ಗೆಲುವು ದಾಖಲು ಮಾಡಿರುವ ಕೋಲ್ಕತ್ತಾ ನೈಟ್ ರೈಡರ್ಸ್ ಸದ್ಯ 10 ಪಾಯಿಂಟ್ಗಳೊಂದಿಗೆ 4ನೇ ಸ್ಥಾನದಲ್ಲಿದೆ. ಜೊತೆಗೆ ಫ್ಲೇ-ಆಫ್ ರೇಸ್ ಜೀವಂತವಾಗಿರಿಸಿಕೊಂಡಿರುವ ಕೆಕೆಆರ್, ಮುಂದಿನ ಮೂರು ಪಂದ್ಯಗಳಲ್ಲಿ ಉತ್ತಮ ಪ್ರದರ್ಶನ ನೀಡುವ ಇರಾದೆ ಇಟ್ಟುಕೊಂಡಿದೆ.
ಡೆಲ್ಲಿ ವಿರುದ್ಧದ ಪಂದ್ಯ ಮುಗಿದ ಬಳಿಕ ಮಾತನಾಡಿರುವ ಕ್ಯಾಪ್ಟನ್ ಮಾರ್ಗನ್, ಮೂರು ದಿನಗಳ ಅಂತರದಲ್ಲಿ ಎರಡು ಪಂದ್ಯ ಆಡಿರುವುದು ನಿಜಕ್ಕೂ ಕಠಿಣ. ಟಾಸ್ ಗೆದ್ದು ಕ್ಷೇತ್ರ ರಕ್ಷಣೆ ಮಾಡುವುದು ಇಂತಹ ಸ್ಥಿತಿಗಳಲ್ಲಿ ತುಂಬಾ ಕಠಿಣ.
ಆದರೆ, ಇಂದಿನ ಪಂದ್ಯಕ್ಕಾಗಿ ಕೆಲ ಯೋಜನೆ ಹಾಕಿಕೊಂಡಿದ್ದೆವು. ಎರಡು ತಂಡಗಳಿಂದ ಉತ್ತಮ ಕ್ರಿಕೆಟ್ ಮೂಡಿ ಬಂದಿದೆ. ಗೆಲುವಿನ ಸಂಪೂರ್ಣ ಶ್ರೇಯ ಕೋಚ್ ಮೆಕಲಮ್ಗೆ ಸಲ್ಲಬೇಕು ಎಂದಿದ್ದಾರೆ. ತಂಡದಲ್ಲಿ ಅವರು ನಿಜವಾಗಿ ಅದ್ಭುತ ಪ್ರೇರಣೆ ತುಂಬುತ್ತಾರೆ ಎಂದಿದ್ದಾರೆ.
ಮಧ್ಯಮ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಕಠಿಣ ಎಂದ ನರೈನ್
ಡೆಲ್ಲಿ ವಿರುದ್ಧದ ಪಂದ್ಯದಲ್ಲಿ ಮಧ್ಯಮ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಲು ಕಣಕ್ಕಿಳಿಸಿದ್ದ ಸುನೀಲ್ ನರೈನ್, ಮಧ್ಯಮ ಕ್ರಮಾಂಕದಲ್ಲಿ ಬ್ಯಾಟ್ ಮಾಡುವುದು ಕಠಿಣ ಎಂದಿದ್ದಾರೆ. ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದು ಮಾತನಾಡಿರುವ ಅವರು, ಮೈದಾನದಲ್ಲಿ ಬಾಲ್ ಸ್ಪಿನ್ ಆಗುತ್ತಿತ್ತು.
ಹೀಗಾಗಿ, ಬ್ಯಾಟ್ ಮಾಡುವುದು ಕಠಿಣವಾಗುತ್ತಿತ್ತು ಎಂದಿದ್ದಾರೆ. ಇಂದಿನ ಪಂದ್ಯದಲ್ಲಿ ಮಧ್ಯಮ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿದ ನರೈನ್, 10 ಎಸೆತಗಳಲ್ಲಿ 2 ಸಿಕ್ಸರ್, 1 ಬೌಂಡರಿ ಸೇರಿ 21ರನ್ಗಳಿಕೆ ಮಾಡಿದರು.
ಸೋಲಿನಿಂದ ಪಾಠ ಕಲಿತು ಮುಂದೆ ಸಾಗುತ್ತೇವೆ : ಪಂತ್
ಕೋಲ್ಕತ್ತಾ ವಿರುದ್ಧದ ಪಂದ್ಯದಲ್ಲಿ ಸೋಲು ಕಂಡಿರುವ ಡೆಲ್ಲಿ ಇದೀಗ ಪಾಯಿಂಟ್ ಪಟ್ಟಿಯಲ್ಲಿ 2ನೇ ಸ್ಥಾನದಲ್ಲಿದೆ. ಪಂದ್ಯ ಮುಕ್ತಾಯದ ಬಳಿಕ ಮಾತನಾಡಿರುವ ಪಂತ್, ಈ ಸೋಲಿನಿಂದ ಪಾಠ ಕಲಿತು, ಮುಂದೆ ಸಾಗುತ್ತೇವೆ. ಮೈದಾನದಲ್ಲಿ ನಮ್ಮ ತಂಡದಿಂದ ಆಗಿರುವ ತಪ್ಪು ಸರಿಪಡಿಸಿಕೊಳ್ಳುತ್ತೇವೆ ಎಂದಿದ್ದಾರೆ. ಇಂದಿನ ಪಂದ್ಯದಲ್ಲಿ ಸ್ಪಿನ್ನರ್ ಉತ್ತಮ ಪ್ರದರ್ಶನ ನೀಡಿದ್ದಾರೆ ಎಂದರು.
