ಅಬುಧಾಬಿ: ಐಪಿಎಲ್ ಟೂರ್ನಿಯ ಆರಂಭದಿಂದ ಉತ್ತಮ ಪ್ರದರ್ಶನ ತೋರಿದ್ದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಅಂತಿಮ ಹಂತದಲ್ಲಿ ತನ್ನ ಹಳೆಯ ಚಾಳಿ ಮುಂದುವರೆಸಿದೆ. ಸತತ 3 ಪಂದ್ಯಗಳಲ್ಲಿ ಸೋಲು ಕಂಡು ಸಂಕಷ್ಟಕ್ಕೆ ಸಿಲುಕಿದೆ.
ಇಂದಿನ ಪಂದ್ಯ ಕೇವಲ ಆರ್ಸಿಬಿಗೆ ಮಾತ್ರವಲ್ಲ ಡೆಲ್ಲಿ ತಂಡಕ್ಕೂ ನಿರ್ಣಾಯಕವಾಗಿದೆ. ಯಾವ ತಂಡ ಸೋತರೂ ನಾಳೆ ನಡೆಯುವ ಹೈದರಾಬಾದ್ ಮತ್ತು ಮುಂಬೈ ಪಂದ್ಯದ ಫಲಿತಾಂಶದ ಮೇಲೆ ಪ್ಲೇ-ಆಫ್ ಹಣೆಬರಹ ನಿರ್ಧಾರವಾಗಲಿದೆ.
ಆರ್ಸಿಬಿ ಮತ್ತು ಡೆಲ್ಲಿ ತಂಡ ತಲಾ 14 ಪಾಯಿಂಟ್ಸ್ಗಳೊಂದಿಗೆ ಅಂಕಪಟ್ಟಿಯಲ್ಲಿ ಕ್ರಮವಾಗಿ ಎರಡು ಮತ್ತು 3ನೇ ಸ್ಥಾನದಲ್ಲಿವೆ. ಇಂದು ಗೆದ್ದ ತಂಡ 16 ಪಾಯಿಂಟ್ಸ್ನೊಂದಿಗೆ ಅಂಕಪಟ್ಟಿಯಲ್ಲಿ 2ನೇ ಸ್ಥಾನ ಪಡೆಯಲಿದೆ. ಸೋತ ತಂಡದ ರನ್ರೇಟ್, ಪ್ಲೇ-ಆಫ್ ಅರ್ಹತೆಯಲ್ಲಿ ನಿರ್ಣಾಯಕ ಪಾತ್ರ ವಹಿಸಲಿದೆ.
ಆರ್ಸಿಬಿ ಸೋತರ ಮುಂದೆ ಏನು?
ಒಂದು ವೇಳೆ ಆರ್ಸಿಬಿ ತಂಡ ಇಂದಿನ ಪಂದ್ಯದಲ್ಲಿ ಸೋಲು ಕಂಡರೆ ರನ್ರೇಟ್ ಆಧಾರದ ಮೇಲೆ ಮೂರು ಅಥವಾ 4ನೇ ಸ್ಥಾನಕ್ಕೆ ಕುಸಿಯಲಿದೆ. ಸೋಲಿನ ಅಂತರ ಕಡಿಮೆಯಾದಷ್ಟೂ ಆರ್ಸಿಬಿ ತಂಡ ಸೇಫ್ ಆಗಲಿದೆ. ಒಂದು ವೇಳೆ ಕೋಲ್ಕತ್ತಾ ತಂಡಕ್ಕಿಂತ ಕಳಪೆ ರನ್ರೇಟ್ ಹೊಂದಿದ್ರೆ, ಆರ್ಸಿಬಿ ಅಭಿಮಾನಿಗಳು ಹೈದರಾಬಾದ್ ಸೋಲಿಗೆ ಪ್ರಾರ್ಥಿಸಬೇಕಾಗುತ್ತದೆ.
ಆರ್ಸಿಬಿ ಸೋತು, ಹೈದರಾಬಾದ್ ಗೆದ್ದರೆ :
ಇಂದಿನ ಪಂದ್ಯದಲ್ಲಿ ಬೆಂಗಳೂರು ತಂಡ ಸೋಲು ಕಂಡು, ನಾಳಿನ ಪಂದ್ಯದಲ್ಲಿ ಹೈದರಾಬಾದ್ ಗೆದ್ದರೂ ಆರ್ಸಿಬಿಗೆ ಫ್ಲೇ-ಆಫ್ ಸುತ್ತಿನಲ್ಲಿ ಸ್ಥಾನ ಸಿಗಲಿದೆ. ಹೇಗೆ ಅಂದ್ರೆ, ಡೆಲ್ಲಿ ವಿರುದ್ಧ ಕಡಿಮೆ ಅಂತರದಲ್ಲಿ ಪಂದ್ಯ ಸೋಲಬೇಕು. ಕೋಲ್ಕತ್ತಾಗಿಂದ ಉತ್ತಮ ರನ್ರೇಟ್ ಹೊಂದಿದ್ರೆ ಅಂಕಪಟ್ಟಿಯಲ್ಲಿ ನಾಲ್ಕನೇ ಸ್ಥಾನ ಪಡೆಯುವ ಮೂಲಕ ಅರ್ಹತೆ ಗಿಟ್ಟಿಸಲಿದೆ.
