ಕೊಲಂಬೊ : ಶ್ರೀಲಂಕಾ ತಂಡದ ಬ್ಯಾಟಿಂಗ್ ಕೋಚ್ ಗ್ರಾಂಟ್ ಫ್ಲವರ್ ಅವರಿಗೆ ಗುರುವಾರ ಕೊರೊನಾ ದೃಢಪಟ್ಟಿದೆ. ಸದ್ಯ ಮುಂಬರುವ ಭಾರತದ ವಿರುದ್ಧದ ಸೀಮಿತ ಓವರ್ಗಳ ಸರಣಿಯಲ್ಲಿ ಲಂಕಾ ತಂಡ ಭಾಗಿಯಾಗುವ ಹಿನ್ನೆಲೆ ಭೀತಿ ಮೂಡಿಸಿದೆ. ಇಂಗ್ಲೆಂಡ್ ಸರಣಿಯಿಂದ ಮರಳಿದ 48 ಗಂಟೆಗಳ ಬಳಿಕ ಕೋವಿಡ್ ಪರೀಕ್ಷೆಗೆ ಒಳಪಟ್ಟಿದ್ದರು.
ಜುಲೈ 13ರಿಂದ ಪ್ರಾರಂಭವಾಗುವ ಆರು ಪಂದ್ಯಗಳ ವೈಟ್-ಬಾಲ್ ಕ್ರಿಕೆಟ್ ಸರಣಿಯಲ್ಲಿ ಶ್ರೀಲಂಕಾ ಭಾರತವನ್ನು ಎದುರಿಸಲು ಸಜ್ಜಾಗಿದೆ. ಫ್ಲವರ್ಗೆ ಪಾಸಿಟಿವ್ ಕಂಡು ಬಂದ ಹಿನ್ನೆಲೆ ಅವರು ತಂಡದಿಂದ ದೂರವುಳಿದು ಪ್ರತ್ಯೇಕ ಕ್ವಾರಂಟೈನ್ಗೆ ಒಳಗಾಗಿದ್ದಾರೆ. ಬ್ಯಾಟಿಂಗ್ ಕೋಚ್ ಗ್ರಾಂಟ್ ಫ್ಲವರ್ಗೆ ಕೋವಿಡ್ ತಗುಲಿರುವುದನ್ನು ಶ್ರೀಲಂಕಾ ಕ್ರಿಕೆಟ್ (SLC) ಖಚಿತಪಡಿಸಿದೆ.
ಇದನ್ನೂ ಓದಿ: "ಕನ್ನಡ್ ಅಲ್ಲ, ಕನ್ನಡ..." ಮಹಾರಾಷ್ಟ್ರ ಕ್ರಿಕೆಟಿಗನಿಗೆ ಕನ್ನಡ ಮೇಷ್ಟ್ರಾದ ಕೆ.ಗೌತಮ್- ವಿಡಿಯೋ ನೋಡಿ..
ಪಿಸಿಆರ್(PCR) ಪರೀಕ್ಷೆ ವೇಳೆ ಸೋಂಕು ತಗುಲಿರುವುದು ತಿಳಿದು ಬಂದಿದೆ. ತಕ್ಷಣ ಅವರು ಪ್ರತ್ಯೇಕವಾಗಿ ಉಳಿದುಕೊಂಡಿದ್ದಾರೆ. ಇಂಗ್ಲೆಂಡ್ನಿಂದ ಮರಳಿರುವ ಇತರ ಆಟಗಾರರು ಸದ್ಯ ಕೋಚ್ ಸಂಪರ್ಕದಲ್ಲಿಲ್ಲ ಎಂದು ಎಸ್ಎಲ್ಸಿ ತಿಳಿಸಿದೆ.
ಲಂಕಾದ ಇತರ ಆಟಗಾರರಿಗೂ ಕೋವಿಡ್ ಪರೀಕ್ಷೆ ನಡೆಸಲಾಗಿದ್ದು, ಎಲ್ಲರೂ ಕ್ವಾರಂಟೈನ್ನಲ್ಲಿದ್ದಾರೆ. ಮುಂಬರುವ ಸರಣಿಯಲ್ಲಿ ಭಾರತ ತಂಡವನ್ನು ಮೊದಲ ಬಾರಿಗೆ ಶಿಖರ್ ಧವನ್ ಮುನ್ನಡೆಸುತ್ತಿದ್ದು, ಮೂರು ಏಕದಿನ ಹಾಗೂ 3 ಟಿ-20 ಪಂದ್ಯಗಳಲ್ಲಿ ಉಭಯ ತಂಡಗಳು ಮುಖಾಮುಖಿಯಾಗಲಿವೆ.
ಇದನ್ನೂ ಓದಿ: SL vs IND: ಸರಣಿ ಆಯೋಜನೆಯಿಂದ ಶ್ರೀಲಂಕಾಗೆ 89.7 ಕೋಟಿ ರೂ. ಆದಾಯ