IND vs NZ: ರಾಹುಲ್​ ದ್ರಾವಿಡ್​ ಗರಡಿಯಲ್ಲಿ ಅಭ್ಯಾಸ ಶುರು ಮಾಡಿದ ಟೀಂ ಇಂಡಿಯಾ

ಕ್ರಿಕೆಟ್​ ತಂಡಕ್ಕೆ ಹೊಸ ಕೋಚ್​​ ಆಗಿ ಆಯ್ಕೆಯಾಗಿರುವ ರಾಹುಲ್​ ದ್ರಾವಿಡ್​ ಈಗಾಗಲೇ ತಂಡ ಸೇರಿಕೊಂಡಿದ್ದು, ಅವರ ನೇತೃತ್ವದ ರೋಹಿತ್​ ಶರ್ಮಾ ಪಡೆ ನ್ಯೂಜಿಲ್ಯಾಂಡ್​ (India vs New Zealand) ವಿರುದ್ಧದ ಸರಣಿಗಾಗಿ ಅಭ್ಯಾಸ ಆರಂಭ ಮಾಡಿದೆ.

ಜೈಪುರ್​(ರಾಜಸ್ಥಾನ): ಟೀಂ ಇಂಡಿಯಾ ನೂತನ ಕೋಚ್​ ಆಗಿ ಆಯ್ಕೆಯಾಗಿರುವ ರಾಹುಲ್​ ದ್ರಾವಿಡ್ (Coach Rahul Dravid)​​ ಇದೀಗ ತಂಡ ಸೇರಿಕೊಂಡಿದ್ದು, ಅವರ ಗರಡಿಯಲ್ಲಿ ರೋಹಿತ್​ ಪಡೆ ಅಭ್ಯಾಸ ಶುರು ಮಾಡಿದೆ.

ನವೆಂಬರ್​ 17ರಿಂದ ಟೀಂ ಇಂಡಿಯಾ ಜೈಪುರ್​ನ ಸವಾಯಿ ಮಾನ್ಸಿಂಗ್ ಮೈದಾನದಲ್ಲಿ ನ್ಯೂಜಿಲ್ಯಾಂಡ್​ ವಿರುದ್ಧ ಮೊದಲ ಟಿ20 ಪಂದ್ಯದಲ್ಲಿ ಭಾಗಿಯಾಗಲಿದ್ದು, ಅದಕ್ಕಾಗಿ ಕೇವಲ ಎರಡು ದಿನ ಬಾಕಿ ಇರುವ ಕಾರಣ ತಂಡ ನೆಟ್​ ಅಭ್ಯಾಸ ಆರಂಭಿಸಿದೆ.

ಮುಖ್ಯ ಕೋಚ್​ ದ್ರಾವಿಡ್ ಜೊತೆಗೆ ಬ್ಯಾಟಿಂಗ್​ ಕೋಚ್​ ವಿಕ್ರಂ ರಾಥೋರ್​ ಹಾಗೂ ಬೌಲಿಂಗ್​ ಕೋಚ್ ಪಾರಸ್ ಮಾಂಬ್ರೆ ಕೂಡ ರೋಹಿತ್​ ಬಾಯ್ಸ್​ಗೆ ತರಬೇತಿ ನೀಡುತ್ತಿದ್ದಾರೆ.

ತರಬೇತಿ ವೇಳೆ ಆರ್​.ಅಶ್ವಿನ್​, ದೀಪಕ್ ಚಹರ್, ಮೊಹಮ್ಮದ್ ಸಿರಾಜ್​, ರಿಷಭ್ ಪಂತ್, ಯಜುಚೇಂದ್ರ ಚಹಲ್​, ಭುವನೇಶ್ವರ್ ಕುಮಾರ್​​, ಇಶನ್ ಕಿಶನ್, ಅಕ್ಸರ್ ಪಟೇಲ್​ ಹಾಜರಿದ್ದರು. ಕ್ಯಾಪ್ಟನ್ ರೋಹಿತ್ ಶರ್ಮಾ ಬ್ಯಾಟಿಂಗ್ ಕೋಚ್​ ವಿಕ್ರಂ ರಾಥೋರ್ ಜೊತೆ ಹೆಚ್ಚಿನ ಸಮಯ ಕಳೆದರು. ಟೀಂ ಇಂಡಿಯಾ (Team India) ಕ್ರಮವಾಗಿ ನವೆಂಬರ್ 17, 19 ಹಾಗೂ 21ರಂದು ಮೂರು ಟಿ20 ಪಂದ್ಯಗಳಲ್ಲಿ ಭಾಗಿಯಾಗಲಿದ್ದು, ತದನಂತರ ಟೆಸ್ಟ್​ ಸರಣಿ ಆರಂಭವಾಗಲಿದೆ.

ಮೊದಲ ಟಿ20 ಪಂದ್ಯ ರಾಜಸ್ಥಾನದ ಸವಾಯಿ ಮಾನ್ಸಿಂಗ್ (SMS Stadium Jaipur) ಮೈದಾನದಲ್ಲಿ ನವೆಂಬರ್​ 17ರಂದು ಆರಂಭಗೊಳ್ಳಲಿದೆ. ಟಿ20 ಸರಣಿಗಾಗಿ ರೋಹಿತ್ ಶರ್ಮಾ ಕ್ಯಾಪ್ಟನ್​​ ಆಗಿದ್ದು, ಕನ್ನಡಿಗ ಕೆ.ಎಲ್.​ ರಾಹುಲ್​ ಉಪನಾಯಕರಾಗಿ ಈಗಾಗಲೇ ಆಯ್ಕೆಯಾಗಿದ್ದಾರೆ.