ಹೈದರಾಬಾದ್ ಡೆಸ್ಕ್: ಆಸ್ಟ್ರೇಲಿಯಾ ಮತ್ತು ಭಾರತ ನಡುವಿನ ಮೂರನೇ ಮತ್ತು ಅಂತಿಮ ಟಿ20 ಪಂದ್ಯ ಸರಣಿ ಗೆಲುವಿಗೆ ನಿರ್ಣಾಯವಾಗಿದ್ದು, ಉಭಯ ತಂಡಗಳ ನಡುವಿನ ರೋಚಕ ಸೆಣಸಾಟಕ್ಕೆ ಇಲ್ಲಿನ ರಾಜೀವ್ ಗಾಂಧಿ ಅಂತಾರಾಷ್ಟ್ರೀಯ ಮೈದಾನ ಸಾಕ್ಷಿಯಾಗಲಿದೆ.
ಮೂರು ಪಂದ್ಯಗಳ ಸರಣಿಯಲ್ಲಿ ತಲಾ ಒಂದು ಪಂದ್ಯ ಗೆದ್ದಿರುವ ಉಭಯ ತಂಡಗಳು 1-1 ರಲ್ಲಿ ಸಮಬಲ ಸಾಧಿಸಿವೆ. ಇಂದು ನಡೆಯುವ ಕೊನೆಯ ಪಂದ್ಯವನ್ನು ಗೆಲ್ಲುವ ತಂಡ ಸರಣಿ ಜಯಿಸಲಿದೆ. ಹೀಗಾಗಿ ಪಂದ್ಯ ಎರಡೂ ತಂಡಗಳಿಗೆ ಮಹತ್ವದ್ದಾಗಿದೆ.
ಕಮಾಲ್ ಮಾಡ್ತಾರಾ ಹರ್ಷಲ್, ಚಹಲ್: ಬ್ಯಾಟಿಂಗ್ ವಿಭಾಗದ ಭಾರತ ತಂಡದ ಬಲ. ಇದು ಕಳೆದ ಪಂದ್ಯದಲ್ಲೂ ಸಾಬೀತಾಗಿತ್ತು. ಬೌಲಿಂಗ್ ವಿಭಾಗ ಮೊನಚು ಕಳೆದುಕೊಂಡಿದ್ದು, ಏಷ್ಯಾಕಪ್ ಸೋಲಿಗೂ ಕಾರಣವಾಗಿತ್ತು. ಇದಲ್ಲದೇ, ಆಸೀಸ್ ವಿರುದ್ಧದ ಮೊದಲ ಪಂದ್ಯದಲ್ಲಿ 208 ರನ್ ಗಳಿಸಿದಾಗ್ಯೂ ತಂಡ ಬೌಲರ್ಗಳ ವೈಫಲ್ಯದಿಂದ ಸೋಲು ಕಂಡಿತ್ತು.
ಮುಂಚೂಣಿ ವೇಗಿಗಳಾದ ಭುವನೇಶ್ವರ್ ಕುಮಾರ್, ಹರ್ಷಲ್ ಪಟೇಲ್, ಸ್ಪಿನ್ನರ್ ಯಜುವೇಂದ್ರ ಚಹಲ್ ವಿಕೆಟ್ ಪಡೆಯಲು ತಿಣುಕಾಡುತ್ತಿರುವುದು ತಂಡಕ್ಕೆ ತಲೆ ನೋವಾಗಿದೆ. ಭರಪೂರ ರನ್ ಬಿಟ್ಟುಕೊಟ್ಟು ಸೋಲಿಗೂ ಕಾರಣವಾಗುತ್ತಿದ್ದಾರೆ. ಮೊದಲ ಟಿ20ಯಲ್ಲಿ ಭುವನೇಶ್ವರ್, ಹರ್ಷಲ್, ಚಹಲ್ ಸೇರಿ 150 ರನ್ ಚಚ್ಚಿಸಿಕೊಂಡು ಪಂದ್ಯದ ಮುಕ್ಕಾಲು ರನ್ ಇವರಿಂದಲೇ ಪೋಲಾಗಿತ್ತು.
ಬಲ ನೀಡಿದ ಬೂಮ್ರಾ ಕಮ್ಬ್ಯಾಕ್: ಇನ್ನು 2ನೇ ಪಂದ್ಯದಲ್ಲಿ ಕಣಕ್ಕಿಳಿದ ಬೂಮ್ರಾ ಯಾರ್ಕರ್ ಮೂಲಕ ಆಸೀಸ್ ಬ್ಯಾಟರ್ಗಳ ದಿಕ್ಕು ತಪ್ಪಿಸಿದ್ದರು. ಗಾಯಗೊಂಡು ಕಮ್ಬ್ಯಾಕ್ ಆಗಿರುವ ಬೂಮ್ರಾ ಬೌಲಿಂಗ್ ಚಿಂತೆಯನ್ನು ಸ್ವಲ್ಪ ಕಡಿಮೆ ಮಾಡಿದ್ದಾರೆ ಎನ್ನಬಹುದು.
ಆಸೀಸ್ದೂ ಅದೇ ಸಮಸ್ಯೆ: ಇನ್ನು, ಆಸೀಸ್ ತಂಡವೂ ಕೂಡ ಬೌಲಿಂಗ್ನಲ್ಲಿ ಪೇಲ್ ಆಗಿದ್ದು, ಮಧ್ಯಮ ಕ್ರಮಾಂಕ ಸಿಡಿಯುತ್ತಿಲ್ಲ. ಇದು ನಾಯಕ ಆ್ಯರೋನ್ ಫಿಂಚ್ ಚಿಂತೆ ಹೆಚ್ಚಿಸಿದೆ. ನಂಬಿಕಸ್ಥ ಬ್ಯಾಟರ್ ಗ್ಲೆನ್ ಮ್ಯಾಕ್ಸವೆಲ್ 2 ಪಂದ್ಯಗಳಿಂದ ಕೇವಲ 1 ರನ್ ಗಳಿಸಿದ್ದಾರೆ. ಆಲ್ರೌಂಡರ್ ಕ್ಯಾಮರೂನ್ ಗ್ರೀನ್ ಮತ್ತೆ ಸಿಡಿಯಬೇಕಿದೆ. ಮ್ಯಾಥ್ಯೂ ವೇಡ್ ಎರಡೂ ಪಂದ್ಯಗಳಲ್ಲಿ ಉತ್ತಮವಾಗಿ ಬ್ಯಾಟ್ ಬೀಸಿ ತಂಡಕ್ಕೆ ನೆರವಾಗಿದ್ದರು.
ಬೌಲಿಂಗ್ ವಿಭಾಗದಲ್ಲಿ ಜೋಶ್ ಹೇಜಲ್ವುಡ್, ಪ್ಯಾಟ್ ಕಮ್ಮಿನ್ಸ್ ದುಬಾರಿಯಾಗಿದ್ದಾರೆ. ಸ್ಪಿನ್ನರ್ ಆ್ಯಡಂ ಜಂಪಾ ವಿಕೆಟ್ ಕೀಳುತ್ತಿದ್ದು ತಂಡದ ಧೈರ್ಯವಾಗಿದ್ದಾರೆ. ನಾಯಕ ಫಿಂಚ್ ಉಳಿದ ಆಟಗಾರರಿಂದ ಉತ್ತಮ ಪ್ರದರ್ಶನವನ್ನು ನಿರೀಕ್ಷೆ ಮಾಡುತ್ತಿದ್ದಾರೆ.
ತಂಡಗಳು ಇಂತಿವೆ- ಭಾರತ ಸಂಭಾವ್ಯ ತಂಡ: ರೋಹಿತ್ ಶರ್ಮಾ (ನಾಯಕ), ಕೆಎಲ್ ರಾಹುಲ್, ವಿರಾಟ್ ಕೊಹ್ಲಿ, ಸೂರ್ಯಕುಮಾರ್ ಯಾದವ್, ಹಾರ್ದಿಕ್ ಪಾಂಡ್ಯಾ, ದಿನೇಶ್ ಕಾರ್ತಿಕ್, ಅಕ್ಷರ್ ಪಟೇಲ್, ಹರ್ಷಲ್ ಪಟೇಲ್, ಭುವನೇಶ್ವರ್ ಕುಮಾರ್, ಜಸ್ಪ್ರೀತ್ ಬುಮ್ರಾ, ಯಜುವೇಂದ್ರ ಚಹಲ್.
ಆಸ್ಟ್ರೇಲಿಯಾ ಸಂಭಾವ್ಯ ತಂಡ: ಆ್ಯರೋನ್ ಫಿಂಚ್(ನಾಯಕ), ಕ್ಯಾಮರೂನ್ ಗ್ರೀನ್, ಸ್ಟೀವನ್ ಸ್ಮಿತ್, ಗ್ಲೆನ್ ಮ್ಯಾಕ್ಸ್‌ವೆಲ್, ಟಿಮ್ ಡೇವಿಡ್, ಮ್ಯಾಥ್ಯೂ ವೇಡ್, ಜೋಶ್ ಇಂಗ್ಲಿಸ್/ ಡೇನಿಯಲ್ ಸ್ಯಾಮ್ಸ್, ಸೀನ್ ಅಬ್ಬಾಟ್, ಪ್ಯಾಟ್ ಕಮ್ಮಿನ್ಸ್, ಆ್ಯಡಂ ಜಂಪಾ, ಜೋಶ್ ಹೇಜಲ್ವುಡ್.
ಪಂದ್ಯದ ಸಮಯ: ಸಂಜೆ 7ಕ್ಕೆ, ಹೈದರಾಬಾದ್
ಓದಿ: ಇಂಗ್ಲೆಂಡ್ ಮಣಿಸಿದ ಭಾರತದ ವನಿತೆಯರು: ಜೂಲನ್ ಗೋಸ್ವಾಮಿಗೆ ವೈಟ್ವಾಶ್ ಉಡುಗೊರೆ
