ದುಬೈ: ಟಿ10 ಲೀಗ್ನಲ್ಲಿ ಅಬುಧಾಬಿ ತಂಡಕ್ಕೆ ಸಹಾಯಕ ಕೋಚ್ ಆಗಿ ನೇಮಕವಾಗಿರುವ ಇಂಗ್ಲೆಂಡ್ ಮಹಿಳಾ ತಂಡದ ಮಾಜಿ ವಿಕೆಟ್ ಕೀಪರ್ ಸಾರಾ ಟೇಲರ್, ತಾವು ಪುರುಷ ತಂಡಕ್ಕೆ ಮೊದಲ ಮಹಿಳಾ ಕೋಚ್ ಆಗಿ ಆಯ್ಕೆಯಾಗಿರುವುದಕ್ಕೆ ಖುಷಿಯಿದೆ. ಆದರೆ ಫ್ರಾಂಚೈಸಿ ಕ್ರಿಕೆಟ್ನಲ್ಲಿ ಈ ರೀತಿ ಏನಾದರೂ ಸಾಧಿಸಿದ ಕೊನೆಯ ಮಹಿಳೆ ನಾನಾಗದಿರಲು ಬಯಸುತ್ತೇನೆ. ನನ್ನಂತೆ ಹಲವಾರು ಮಹಿಳೆಯರು ಇಂತಹ ಹುದ್ದೆಗಳಿಗೆ ಆಯ್ಕೆಯಾಗಬೇಕೆಂದು ಅಭಿಲಾಷೆ ವ್ಯಕ್ತಪಡಿಸಿದ್ದಾರೆ.
ಮಹಿಳಾ ಕ್ರಿಕೆಟ್ನಲ್ಲಿ ಅತ್ಯಂತ ಶ್ರೇಷ್ಠ ವಿಕೆಟ್ ಕೀಪರ್ ಎಂಬ ಖ್ಯಾತಿಗೆ ಪಾತ್ರರಾಗಿರುವ ಇಂಗ್ಲೆಂಡ್ ತಂಡದ ಮಾಜಿ ನಾಯಕಿ ಟೇಲರ್, ಪುರುಷರ ತಂಡಕ್ಕೆ ಸಹಾಯಕ ಕೋಚ್ ಆಗಿ ನೇಮಕವಾಗುತ್ತಿದ್ದಂತೆ ಕ್ರಿಕೆಟ್ ಲೋಕದಲ್ಲಿ ಈ ಸುದ್ದಿ ಭಾರಿ ಸದ್ದು ಮಾಡಿತ್ತು. ಏಕೆಂದರೆ ಟೇಲರ್ ಈ ಗೌರವಕ್ಕೆ ಪಾತ್ರರಾದ ಮೊದಲ ಮಹಿಳಾ ಕ್ರಿಕೆಟರ್ ಆಗಿದ್ದರು. ಅವರು ಈ ಹಿಂದೆಯೇ ಕೌಂಟಿ ಪುರುಷರ ತಂಡಕ್ಕೆ ವಿಕೆಟ್ ಕೀಪರ್ ಕೋಚ್ ಆಗಿದ್ದರು. ಆದರೆ ಫ್ರಾಂಚೈಸಿ ಕ್ರಿಕೆಟ್ನಲ್ಲಿ ಇದೇ ಮೊದಲ ಬಾರಿಗೆ ಕೋಚ್ ಹುದ್ದೆ ಪಡೆದಿದ್ದರು.
" ಈ ಅವಕಾಶ ಸಿಕ್ಕಿರುವುದು ಮೊದಲ ಹೆಜ್ಜೆ ಎಂದು ನಾನು ಭಾವಿಸುತ್ತೇನೆ. ಮಹಿಳಾ ಆಟಗಾರ್ತಿಯರಿಗೆ ಈ ರೀತಿಯ ಉದ್ಯೋಗಗಳು ಮತ್ತು ಪಾತ್ರಗಳು ಮುಂದೆ ಸಾಮಾನ್ಯವಾಗಿ ಸಿಗಬಹುದು ಎಂದು ತೋರುತ್ತಿದೆ. ಆಶಾದಾಯಕವಾಗಿ, ಇದು ಹೀಗೆ ಮುಂದುವರಿಯುತ್ತದೆ ಎಂಬ ವಿಶ್ವಾಸವಿದೆ. ಆದರೆ ನಮ್ಮನ್ನು ಕೋಚ್ ಎಂದು ನೋಡಬೇಕೆ ಹೊರತು, ಮಹಿಳಾ ಕೋಚ್ ಎಂದು ನೋಡಬಾರದು" ಎಂದು ಭಾನುವಾರ ನಡೆದ ಸಂವಾದವೊಂದರಲ್ಲಿ ಟೇಲರ್ ಹೇಳಿದ್ದಾರೆ.
ಈ ಅವಕಾಶ ಸಿಕ್ಕಿರುವುದು ನನಗೆ ಆಶ್ಚರ್ಯಕ್ಕೀಡು ಮಾಡಿತ್ತು. ನಾನು ಅಬುಧಾಬಿಗೆ ತೆರಳಲು ದಿನಗಳನ್ನು ಎಣಿಸುತ್ತಿದ್ದೇನೆ. ನಾನೊಬ್ಬಳು ಒಳ್ಳೆಯ ಕೋಚ್ ಎಂದು ಗುರುತಿಸಿಕೊಳ್ಳಲು ಬಯಸುತ್ತೇನೆ. ಈ ಹಿಂದೆ ಸಸೆಕ್ಸ್ ತಂಡದಲ್ಲಿ ಸಾಕಷ್ಟು ಕಲಿತಿದ್ದೇನೆ. ಅದು ನನ್ನ ಮೊದಲ ಕೋಚ್ ಹುದ್ದೆಯಾಗಿತ್ತು. ಅಲ್ಲಿ ನನಗೆ ಹಲವಾರು ಉತ್ತಮ ಮಾರ್ಗದರ್ಶಕರು ನನ್ನ ಬೆನ್ನಿಗೆ ನಿಂತಿದ್ದರು. ಹಾಗಾಗಿ ಕೋಚ್ ಆಗಿ ನಿರ್ವಹಿಸಬೇಕಾದ ಜವಾಬ್ದಾರಿಯ ಬಗ್ಗೆ ಕಲಿತಿದ್ದೇನೆ. ನನ್ನ ರೀತಿ ಕ್ರಿಕೆಟ್ನಲ್ಲಿ ಮಹಿಳಾ ಕೋಚ್ಗಳ ಹುದ್ದೆಗೇರುವುದನ್ನು ನೋಡಲು ಬಯಸುತ್ತೇನೆ ಎಂದು ಸಾರಾ ಹೇಳಿಕೊಂಡಿದ್ದಾರೆ.
ಇದನ್ನು ಓದಿ:ಸೆಮಿಫೈನಲ್ಸ್, ಫೈನಲ್ಸ್ ತಂಡಗಳನ್ನು ಹೆಸರಿಸಿದ ಶೇನ್ ವಾರ್ನ್
