ಸಿಡ್ನಿ: ಆಸ್ಟ್ರೇಲಿಯಾ ತಂಡದ ಮುಖ್ಯ ಕೋಚ್ ಜಸ್ಟಿನ್ ಲ್ಯಾಂಗರ್ ಅವರನ್ನು ಕ್ರಿಕೆಟ್ ಆಸ್ಟ್ರೇಲಿಯಾ ರಾಕ್ಷಸನ ರೀತಿ ಬಿಂಬಿಸುತ್ತಿದೆ ಎಂದು ಮಾಜಿ ವಿಕೆಟ್ ಕೀಪರ್ ಆ್ಯಡಮ್ ಗಿಲ್ಕ್ರಿಸ್ಟ್ ಮಂಡಳಿ ವಿರುದ್ದ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಆಸ್ಟ್ರೇಲಿಯಾ ತಂಡ ಬಾಲ್ ಟ್ಯಾಂಪರಿಂಗ್ ಪ್ರಕರಣದಲ್ಲಿ ಸಿಲುಕಿದ್ದ ವೇಳೆ ಲ್ಯಾಂಗರ್ ತಂಡದ ಮುಖ್ಯ ಕೋಚ್ ಆಗಿ ನೇಮಕವಾಗಿದ್ದರು. ಆದರೆ, ಸಾಕಷ್ಟು ಗೊಂದಲಗಳ ನಡುವೆ ಶನಿವಾರ ದಿಢೀರ್ ರಾಜೀನಾಮೆ ಸಲ್ಲಿಸಿದ್ದರು. ರಾಷ್ಟ್ರೀಯ ತಂಡದ ಆಟಗಾರರಿಂದ ಸೂಕ್ತ ಬೆಂಬಲ ಇಲ್ಲದ ಕಾರಣ ಅವರು ಈ ನಿರ್ಧಾರ ತೆಗೆದುಕೊಂಡಿದ್ದಾರೆ ಎಂಬ ಕೂಗು ಸಹಾ ಕೇಳಿ ಬಂದಿತ್ತು. ಆದರೆ, ತಂಡವನ್ನು ಟಿ-20 ವಿಶ್ವಚಾಂಪಿಯನ್ ಮಾಡುವಲ್ಲಿ ಪ್ರಮುಖ ಪಾತ್ರವನ್ನು ವಹಿಸಿದ್ದ ಕೋಚ್ ಅವರನ್ನು ಕೀಳು ಮಟ್ಟದಲ್ಲಿ ನಡೆಸಿಕೊಂಡಿದೆ ಎಂದು ಕೆಲವು ಮಾಜಿ ಕ್ರಿಕೆಟಿಗರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
"ಕೋಚಿಂಗ್ ಸ್ಥಾನದ ಪರಿವರ್ತನೆ ಮತ್ತು ವಿಶ್ಲೇಷಣೆ ಹಾಗೂ ವಿಕಸದ ಅಗತ್ಯತೆ ಬಗ್ಗೆ ಕಾರ್ಪೋರೇಟ್ ಹೇಳಿಕೆಗಳನ್ನು ಕೇಳಲು ನಾನು ಬಯಸುವುದಿಲ್ಲ. ತಂಡದಲ್ಲಿ ಆಟಗಾರರು ಮತ್ತು ಕೆಲವು ಬೆಂಬಲ ಸಿಬ್ಬಂದಿ ಜಸ್ಟಿನ್ ಅವರನ್ನು ಮುಂದುವರಿಸಲು ಬಯಸುವುದಿಲ್ಲ ಎಂದು ತಿಳಿಸಿರುವುದನ್ನು ಮಂಡಳಿ ಮುಚ್ಚಿಡುತ್ತಿದೆ. ಕೆಲವು ನಿರ್ದಿಷ್ಠ ಜನರು ಲ್ಯಾಂಗರ್ರನ್ನು ರಾಕ್ಷಸನಂತೆ ಚಿತ್ರಿಸುತ್ತಿದ್ದಾರೆ" ಎಂದು ಗಿಲ್ಕ್ರಿಸ್ಟ್ ಮಾಧ್ಯಮವೊಂದಕ್ಕೆ ತಿಳಿಸಿದ್ದಾರೆ.
ಲ್ಯಾಂಗರ್ ಜೊತೆಗೆ ಜೊತೆಯಾಗಿ ಆಡಿರುವ ಗಿಲ್ಕ್ರಿಸ್ಟ್, ಲ್ಯಾಂಗರ್ ದೌರ್ಬಲ್ಯಗಳನ್ನು ಹೊಂದಿದ್ದಾರೆ, ಆದರೆ, ಎಲ್ಲಿ ತಾವು ದೌರ್ಬಲ್ಯ ಹೊಂದಿದ್ದೇನೆ ಎನ್ನುವುದನ್ನು ಒಪ್ಪಿಕೊಳ್ಳುವವರಲ್ಲಿ ಅವರು ಮೊದಲಿಗರಾಗುತ್ತಾರೆ. ಮತ್ತು ಅವರು ಅವುಗಳನ್ನು ಸರಿಪಡಿಸಿಕೊಳ್ಳಲು ನಿಮ್ಮೊಂದಿಗೆ ಕುಳಿತುಕೊಂಡು ಕೆಲಸ ಮಾಡುತ್ತಾರೆ. ಆದರೆ, ಅವರನ್ನು ದೈತ್ಯಾಕಾರವಾಗಿ ಚಿತ್ರಿಸಲಾಗುತ್ತಿದೆ ಎಂದು ಗಿಲ್ಕ್ರಿಸ್ಟ್ ಹೇಳಿದ್ದಾರೆ.
2021ರ ವಿಶ್ವಕಪ್ ಚಾಂಪಿಯನ್ ತಂಡದ ಮಾರ್ಗದರ್ಶಕರಾಗಿದ್ದ ಲ್ಯಾಂಗರ್ ತಾವೂ ಆಸ್ಟ್ರೇಲಿಯಾ ತಂಡಕ್ಕೆ ದೀರ್ಘಕಾಲದ ವರೆಗೆ ಕೋಚ್ ಆಗಿ ಮುಂದುವರಿಯಲು ಬಯಸಿದ್ದರು. ಆದರೆ, ಕ್ರಿಕೆಟ್ ಆಸ್ಟ್ರೇಲಿಯಾ ಮುಂದಿನ ಟಿ-20 ವಿಶ್ವಕಪ್ವರೆಗೆ ಮುಂದುವರಿಯಲು ಬಯಸಿತ್ತು. ಇದಕ್ಕೊಪ್ಪದ ಲ್ಯಾಂಗರ್ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದರು.
ಇದನ್ನೂ ಓದಿ:ರಾಜೀನಾಮೆ ನೀಡಿದ ಜಸ್ಟಿನ್ ಲ್ಯಾಂಗರ್ ಜಾಗಕ್ಕೆ ಆ್ಯಂಡ್ರ್ಯೂ ಮೆಕ್ಡೊನಾಲ್ಡ್: ಕ್ರಿಕೆಟ್ ಆಸ್ಟ್ರೇಲಿಯಾ
