ಹೈದರಾಬಾದ್: ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕ ಎಂ.ಎಸ್.ಧೋನಿ ಇತ್ತೀಚೆಗೆ ಪುಣೆಯ ಪಿಂಪ್ರಿ-ಚಿಂಚ್‌ವಾಡ್‌ನಲ್ಲಿ ಹೊಸ ಮನೆಯನ್ನು ಖರೀದಿಸಿದ್ದಾರೆ. ಈ ಹಿಂದೆ ಅವರ ಪತ್ನಿ ಸಾಕ್ಷಿ ಮುಂಬೈನಲ್ಲಿ ನಿರ್ಮಿಸುತ್ತಿರುವ ತಮ್ಮ ಹೊಸ ಮನೆಯ ನಿರ್ಮಾಣದ ಚಿತ್ರಗಳನ್ನು ಹಂಚಿಕೊಂಡಿದ್ದರು. ಧೋನಿ ಈಗ ಪುಣೆಯಲ್ಲಿ ಹೊಸ ಮನೆ ಖರೀದಿಸಿದ್ದು, ಮನೆಯ ಫೋಟೋವನ್ನ ತಮ್ಮ ಇನ್ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿದ್ದಾರೆ.
ಧೋನಿ ಈಗಾಗಲೇ ಹಲವು ಜಾಹೀರಾತು, ಸಾಕ್ಷ್ಯಚಿತ್ರ, ಎಂಟರ್ಟೇನ್ಮೆಂಟ್ ವ್ಯವಹಾರದಲ್ಲಿ ತೊಡಗಿಕೊಂಡಿದ್ದಾರೆ. ಮುಂಬೈನಲ್ಲಿ ಕಚೇರಿ ಹೊಂದಿರುವ ಧೋನಿ, ‘ಎಂಎಸ್‌ಡಿ ಎಂಟರ್ಟೇನ್ಮೆಂಟ್’ ಎಂಬ ನಿರ್ಮಾಣ ಕಂಪನಿಯನ್ನು ಹೊಂದಿದ್ದಾರೆ. ಕಳೆದ ವರ್ಷ ಧೋನಿಯ ಎಂಎಸ್‌ಡಿ ಎಂಟರ್ಟೇನ್ಮೆಂಟ್ ಕಂಪನಿ ಸಾಕ್ಷ್ಯಚಿತ್ರವನ್ನು ನಿರ್ಮಿಸಿತ್ತು. ಈ ನಿರ್ಮಾಣ ಕಂಪನಿಯ ನೇತೃತ್ವವನ್ನು ಅವರ ಪತ್ನಿ ಸಾಕ್ಷಿ ವಹಿಸಿಕೊಂಡಿದ್ದಾರೆ.
ಇತ್ತೀಚೆಗೆ ಸಾಕ್ಷಿ ರಾಂಚಿ ತೋಟದ ಮನೆಯಲ್ಲಿ ಧೋನಿ ತನ್ನ ಕುದುರೆ ಚೇತಕ್ಅನ್ನು ಮುದ್ದಿಸುವ ವಿಡಿಯೋವನ್ನು ಹಂಚಿಕೊಂಡಿದ್ದರು. ಸಾಕುಪ್ರಾಣಿ ಪ್ರಿಯರಾದ ಧೋನಿ ದಂಪತಿ ಇತ್ತೀಚೆಗೆ ಚೇತಕ್ನನ್ನು ತಮ್ಮ ಮನೆಗೆ ಸ್ವಾಗತಿಸಿದರು. ಈ ದಂಪತಿ ಈಗಾಗಲೇ ತಮ್ಮ ತೋಟದ ಮನೆಯಲ್ಲಿ ಹಲವಾರು ಸಾಕು ನಾಯಿಗಳನ್ನು ಹೊಂದಿದ್ದು, ಸಾಕ್ಷಿ ಆಗಾಗ್ಗೆ ಅದರ ವಿಡಿಯೋಗಳನ್ನು ಅಭಿಮಾನಿಗಳೊಂದಿಗೆ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳುತ್ತಲೇ ಇರುತ್ತಾರೆ.
